ဖားကန့်တွင်ယမန်နေ့ညမှယနေ့နံနက်အစောပိုင်းအထိတိုက်ပွဲအပြင်းအထန်ဖြစ်ခဲ့ပြီးမှော်ပုံကျေးရွာဘုန်းကြီးကျောင်းမှ စစ်ဘေးရှောင် ၂၁ဦးကို စစ်ကောင်စီတပ်ကဖမ်းဆီးပြီးနောက်ဆုတ်ခွာသွားကြောင်းဒေသခံများကပြောသည်။
“တိုက်ပွဲကမှော်ပုံဘုန်းကြီးကျောင်းဝန်းကျင်မှာဖြစ်တာ။ဘုန်းကြီးကျောင်းလည်း တော်တော် ပျက်စီးသွားပြီ။တိုက်ပွဲမဖြစ်ခင်ကျောင်းမှာခိုလှုံနေကြရတဲ့ဒေသခံ ၂၁ယောက်ကိုလည်းဖမ်းခေါ်သွားတယ်”ဟု မှော်ပုံဒေသခံတစ်ဦးကပြောသည်။
တိုက်ပွဲသည် ယမန်နေ့(ဒီဇင်ဘာလ ၆ရက်) ည ၈ နာရီခန့်မှ ည ၁၀ ရီခန့်အထိ တစ်ကြိမ်၊ယနေ့(ဒီဇင်ဘာလ ၇ရက်)နံနက် ၂ နာရီခန့်မှ ၄ နာရီခန့်အထိ တစ်ကြိမ် ဖြစ်ပွားခဲ့ခြင်းဖြစ်သည်။
“ဖမ်းသွားတဲ့အထဲမှာအမျိုးသားတွေရော၊အမျိုးသမီးတွေရောပါတယ်။ ပြီးတော့ သူတို့ မှော်ပုံကနေ ပြန်ဆုတ်ခွာသွားတယ်”ဟုအခြားဒေသခံတစ်ဦးကပြောသည်။
Public Service Announcement
စစ်ကောင်စီသည်ယမန်နေ့ညကတိုက်ပွဲတွင်လက်နက်ကြီး အလုံး ရှစ်ဆယ်ထက်မနည်းပစ်ခဲ့သည်ဟုလည်း ဒေသခံများကပြောသည်။
ဖားကန့်တွင် ဖုန်းလိုင်းများ ပြတ်တောက်နေ၍ ထိခိုက်မှုသတင်းကို အသေးစိတ်မသိရသေးပေ။
“စစ်ေ-တွေ ဘာတွေနဲ့ ပစ်တယ်တော့မသိဘူး။ ကရင်နီမှာ ပစ်တုန်းကလို မီးလုံးအနီကြီးတွေ တွေ့ရတယ်။ တောထဲကျတာတွေလည်း ရှိတယ်” ဟု ဒေသခံတစ်ဦးကပြောသည်။
ယမန်နေ့က မြေပြင် တိုက်ပွဲပုံစံသည် ပြည်သူများရှိနေသည့် ရွာကို ဝိုင်းထားသည့် စစ်ကောင်စီတပ်အား KIA ၊ PDF ပူးပေါင်းအဖွဲ့ကထပ်ဝိုင်းကာတိုက်ခိုက်ကြခြင်းဟုသိရသည်။ မြေပြင်တွင် အထိနာသည့်စစ်ကောင်စီတပ်ကလက်နက်ကြီးအများအပြားအသုံးပြုခဲ့သည်ဟုတော်လှန်ရေးအင်အားစုများကပြောသည်။
စစ်ကောင်စီတပ်ကလေကြောင်းမှ တိုက်ခိုက်ခဲ့ကြောင်း ဒေသခံများက ကနဦးပြောခဲ့သော်လည်း အမှန်တကယ်တွင် လေကြောင်းမပါဘဲလက်နက်ကြီးမျိုးစုံအသုံးပြုတိုက်ခိုက်ခဲ့ခြင်းဟုယနေ့နံနက်တွင်ပြောသည်။
KIA ၊ PDF ပူးပေါင်းအဖွဲ့နှင့် စစ်ကောင်စီတပ်တို့ကြား ယခုရက်ပိုင်းအတွင်းဖားကန့်ဒေသ၌စစ်ရေးတင်းမာနေပြီအချိန်မရွေးတိုက်ပွဲဖြစ်ပွားနိုင်သောအခြေအနေဖြစ်ကြောင်းဒေသခံများကပြောသည်။
