၁၀ရက်အတွင်း ရွာပေါင်း ၁၉ရွာမီးရှို့ခံရပြီး ဒေသခံ သောင်းနှင့်ချီ အကူအညီလိုအပ်နေ
၁၀ရက်အတွင်း ရွာပေါင်း ၁၉ရွာမီးရှို့ခံရပြီး ဒေသခံ သောင်းနှင့်ချီ အကူအညီလိုအပ်နေစစ်ကိုင်းတိုင်း၊ ဒီပဲယင်းမြို့နယ်တွင် လေကြောင်းပစ်ခတ်တိုက်ခိုက်ခံရဖူးသည့် လက်ယက်ကုန်းကျေးရွာအပါအဝင် ကျေးရွာ ခြောက်ရွာကို စစ်ကောင်စီတပ်က ဝင်ရောက်ဖျက်ဆီးမီးရှို့နေကြောင်း ဒေသခံများက ပြောသည်။
ဒီပဲယင်းမြို့နယ်အတွင်း မီးရှို့ဖျက်ဆီးမှုများ ဆက်တိုက်လုပ်နေသော စစ်ကောင်စီတပ်သည် ယနေ့(ဒီဇင်ဘာ ၁၀ ရက်) နံနက်ပိုင်းတွင် မူးခံတွင်းကျေးရွာကို ထပ်မံမီးရှို့ခဲ့သည်။
ထို့နောက် လက်ယက်ကုန်းနှင့် ညောင်ကြီးကုန်းကျေးရွာများဘက်သို့ ဆက်လက် ဝင်ရောက် မီးရှို့ဖျက်ဆီးနေကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
အလားတူ ဝဲကြီးကျေးရွာကို မီးရှို့ဖျက်ဆီးနေသည့် စစ်ကောင်စီတပ်သည် ညောင်လှနှင့် သရက်တော ကျေးရွာများကို မီးရှို့ဖျက်ဆီးနေကြောင်း ဒေသခံများက ပြောသည်။
Public Service Announcement
“မူးခံတွင်းရွာဘက်ကထွက်လာတဲ့ စစ်သားတွေက ညောင်ကြီးကုန်းရွာကိုဝင်ပြီး နေရာလေးနေရာခွဲပြီး မီးရှို့နေတယ်လို့သိရတယ်။”ဟု ဒေသခံတစ်ဦးက ပြောသည်။
စစ်ကောင်စီတပ်သည် ဒီပဲယင်းမြို့နယ်အတွင်း ဒီဇင်ဘာလ၁ရက်နေ့မှစတင်ကာ ယနေ့အထိ ဘုန်းကြီးကျောင်း သုံးကျောင်းနှင့် ကျေးရွာ(၁၉)ရွာထက်မနည်း မီးရှို့ဖျက်ဆီးထားပြီး ဖမ်းဆီးသတ်ဖြတ်ခံရသူများလည်းရှိနေသည်။
စားသောက်နေထိုင်ရေးနှင့် အဝတ်အထည်၊ စောင်များ အရေးပေါ်လိုအပ်နေကြောင်း ဒေသခံများက ပြောသည်။
ဒီပဲယင်းမြို့နယ်တွင် စစ်ကောင်စီက စစ်ကြောင်းနှစ်ကြောင်းထိုးနေ၍ ကျေးရွာ (၃၁)ရွာမှ ဒေသခံ ပြည်သူ သုံးသောင်းတစ်ထောင်ကျော် ထွက်ပြေးတိမ်းရှောင်နေရကြောင်း ဒီပဲယင်း ပကဖအဖွဲ့က အသိပေးသည်။
