သေနတ် ၂လက်၊ ကားတစ်စီးနှင့်ကျည်များ သိမ်းဆည်းရရှိဟု Earthquake PDF အသိပေး
မကွေးတိုင်း ပခုက္ကူမြို့ရှိ စစ်ကောင်စီတပ် စစ်ဆေးရေးဂိတ်တစ်ခုကို ယနေ့ နေ့လယ်ပိုင်းက တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်ရှိခဲ့သည်ဟု Earthquake ပြည်သူ့ကာကွယ်ရေးတပ်(PDF) က သတင်းထုတ်ပြန်သည်။
ဒီဇင်ဘာ ၁၈ရက် နေ့လယ် ၁နာရီခွဲခန့်တွင် ပခုက္ကူတက္ကသိုလ်နှင့် ခြောက်ကန်ကျေးရွာအကြားရှိ စစ်ဆေးရေးဂိတ်အား တိုက်ခိုက်ခဲ့ခြင်းဖြစ်သည်ဟု ဆိုသည်။
စစ်ဆေးရေးပြုလုပ်နေသော စစ်ကောင်စီတပ်သား လေးဦးအား ဝင်ရောက်ပစ်ခတ်ခဲ့ရာ သုံးဦးမှာ နေရာတင် ပွဲချင်းပြီး သေဆုံးပြီး ကျန် တစ်ဦးမှာ အပြင်းအထန်ဒဏ်ရာရရှိပြီး သေဆုံးနိုင်ချေရှိကြောင်း ထုတ်ပြန်သည်။
အဆိုပါ တိုက်ခိုက်မှုအတွင်း စစ်ကောင်စီဘက်မှ MA3 (၁)လက်၊ အူစီ(၁)လက်၊ G3 ကျည် (၅၀၀)၊ G3 ကျည်ဘောက်(၂)ခု၊ ကား(၁)စီး၊ လက်ထိပ်၊ ဆပ်ကြေးကောက်ခံသော စာအုပ်(၁)အုပ်၊ မှတ်ပုံတင်၊ ဖိနပ်၊ ဦးထုပ်၊ ငွေသား(၃)သိန်းနှင့် လက်ကိုင်ဖုန်း(၂)လုံးတို့ကို သိမ်းဆည်းရမိခဲ့သည်ဟု ဓာတ်ပုံများနှင့်အတူ ဖော်ပြထားသည်။
Public Service Announcement
ယခု စစ်ဆင်ရေးအတွင်း ပြည်သူကာကွယ်ရေးတပ်ဖွဲ့ဝင်များ ထိခိုက်ကျဆုံးမရှိဘဲ အောင်မြင်စွာ ဆုတ်ခွာနိုင်ခဲ့သည်ဟု အသိပေးထားသည်။
“တစ်ယောက်က ထွက်ပြေးဆို ဒဏ်ရာအပြင်းအထန်ရပြီး ဆေးရုံရောက်သွားတယ်ပြောတယ်။ ဆေးရုံရောက်ချိန်မှာ အမျိုးသားအင်္ဂါပါမလာတော့ဘူးလို့ သိရတယ်။ သေဖို့ များမယ်ထင်ပါတယ်”ဟု Earthquake People’s Defence Force မှ တော်လှန်ရေးရဲဘော်တစ်ဦးက ပြောသည်။
ထို့အပြင် စစ်ကောင်စီစစ်ဆေးရေးဂိတ်အား တိုက်ခိုက်ရန်သွားရောက်ရာတွင် အသုံးပြုခဲ့သည့် ဖောကားတစ်စီးမှာ စစ်တပ်ဂိတ်အနီးအရောက်တွင် စက်ချို့ယွင်းကာနှိုးမရတော့၍ ယင်းဖောကားကိုထားခဲ့ပြီး သိမ်းဆည်းရမိသောကားဖြင့် ပြန်ခဲ့ရကြောင်း ၎င်းတော်လှန်ရေးရဲဘော်က ရှင်းပြသည်။
