နှစ်သစ်ကူးပွဲမှစ၍ လူစုလူဝေး ဖြစ်နိုင်သည့် နေရာများကို စစ်ကောင်စီက တမင်ဖန်တီးသည့် ဖောက်ခွဲမှုများ ဖြစ်ပေါ်လာနိုင်၍ ပြည်သူများ အထူးသတိထားရန် အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးချုပ် မန်းဝင်းခိုင်သန်းက ယနေ့ သတိပေးလိုက်သည်။
စစ်ကောင်စီသည် ရန်ကုန်နှင့် မန္တလေးမြို့အပါအဝင် မြို့ကြီးများ၌ နှစ်သစ်ကူးပွဲကျင်းပရန် စီစဉ်နေပြီး နှစ်သစ်ကူးညတွင် ညမထွက်ရအမိန့် သတ်မှတ်ချက်များ ခေတ္တပယ်ဖျက်ကြောင်း ကြေညာထားသည်။
“အတိတ်ကာလက အကြမ်းဖက်စစ်အာဏာရှင် အဆက်ဆက်ဟာ သူတို့ရဲ့အာဏာသက်ဆိုးရှည်ဖို့အတွက် ပြည်သူလူထုရဲ့အသက်သွေးချွေးတွေကိုထင်သလို သတ်ဖြတ်ပြီး စတေးခဲ့တဲ့ သာဓကတွေများစွာရှိခဲ့သလို လက်ရှိ အကြမ်းဖက်စစ်ကောင်စီဟာလည်း ဒီအတိုင်းပဲ ဆက်လက် ကျူးလွန်နေတာကို တွေ့နိုင်ပါတယ်။မကြာမီကျရောက်မယ့် နှစ်သစ်ကူးပွဲကစလို့ လူစုလူဝေး ဖြစ်နိုင်တဲ့ နေရာဒေသတွေမှာ တမင်ဖန်တီးတဲ့ ဖောက်ခွဲမှုတွေ ဖြစ်လာနိုင်ပြီး တော်လှန်ရေးအင်အားစုတွေကို လုပ်ကြံလွှဲချတဲ့ ဖြစ်စဉ်တွေ ရှိလာနိုင်တာကြောင့် ပြည်သူလူထုကိုအထူးပဲ သတိထားကြဖို့ သတိပေးလိုပါတယ်”ဟု ပြည်ထောင်စုဝန်ကြီးချုပ်က ပြောသည်။
Public Service Announcement
အမျိုးသားညီညွတ်ရေးအစိုးရအနေဖြင့် ပြည်သူ လူထု တစ်ရပ်လုံးကို ကိုယ်ထိလက်ရောက်ကာကွယ်စောင့်ရှောက်နိုင်ရန် တက်စွမ်းနိုင်သရွေ့ကြိုးစားဆောင်ရွက်နေသကဲ့သို့ ပြည်သူလူထုအနေဖြင့်လည်း အသိသတိမလွတ်ဘဲ နေထိုင်ကြခြင်းအားဖြင့် အချင်းချင်းစောင့်ရှောက်ကြရန် ဝန်ကြီးချုပ်က ပြောကြားသည်။
ဒီဇင်ဘာ ၁၈ရက်ကလည်း ပန်းဆိုးတန်း – ဒလ ကူးတို့သင်္ဘောပေါ်တွင် ပေါက်ကွဲမှု ဖြစ်ခဲ့ရာ အရပ်သားပြည်သူများ ထိခိုက်သေဆုံးမှုရှိခဲ့သည်။ ထိုသို့ ပြည်သူများအား ပစ်မှတ်ထား ဖောက်ခွဲတိုက်ခိုက်ခြင်းသည် တော်လှန်ရေးအင်အားစုများအား စွပ်စွဲလိုသည့် စစ်ကောင်စီ၏ လက်ချက်ဟု ပြည်သူများက ယူဆထားသည်။
ထို့အပြင် ဒီဇင်ဘာ ၂၃ရက်ကလည်း တာမွေမြို့မယ် ကျောက်မြောင်းဈေးပွဲတော်၌ ပေါက်ကွဲမှုဖြစ်ခဲ့သေးသည်။
