မြန်မာ MMAဖိုက်တာ အောင်လအန်ဆန်သည် ယနေ့ (ဇန်နဝါရီ ၁၄) နံနက်ပိုင်းတွင် ယှဉ်ပြိုင်ထိုးသတ်သည့် ပွဲစဉ်၌ ဘရာဇီးဖိုက်တာ ဂယ်ဗာအိုကို အနိုင်ရအပြီးတွင် မြန်မာပြည်ငြိမ်းချမ်းရေးအတွက် အားလုံးဆုတောင်းပေးကြရန် တိုက်တွန်းပြောကြားခဲ့သည်။
” ဒီအရင် နှစ်နှစ်က ကျွန်တော်တို့အတွက် အရမ်းခက်ခဲတယ်။ ကျွန်တော်လည်း စိတ်ဓာတ်ကျမိတယ်။ ဒါပေမယ့်အားလုံးစိတ်ကို တင်းထားကြပါ။ ငြိမ်းချမ်းရေးက ကျွန်တော်တို့အားလုံးအတွက် အရေးကြီးဆုံးပဲ။ ကျွန်တော့်တစ်သက်တာမှာ ငြိမ်းချမ်းရေးအတွက် ဘုရားက လုပ်ဆောင်ပေးတယ်။ အားလုံးဆက်ပြီးတော့ ဆုတောင်းပါ။ ငြိမ်းချမ်းရေးအတွက် အားလုံးဆုတောင်းပေးပါလို့ ကျွန်တော် တိုက်တွန်းချင်ပါတယ် “ဟု အောင်လအန်ဆန်က ပွဲအပြီးတွင် ပြောကြားခဲ့သည်။
အောင်လအန်ဆန်သည် ယနေ့နံနက် ထိုင်းနိုင်ငံတွင် ပြုလုပ်သည့် One Championship MMA (Catch Weight) စိန်ခေါ်ပွဲတွင် ဘရာဇီးဖိုက်တာ ဂယ်ဗာအိုနှင့် ထိုးသတ်ခဲ့ပြီး ပွဲအစ ၁ မိနစ်ကျော်အတွင်း ၎င်း၏ ဘယ်၊ ညာ လက်သီးချက်များဖြင့် ဂယ်ဗာအိုကို အလဲထိုးအနိုင်ရခဲ့ခြင်း ဖြစ်သည်။
အောင်လအန်ဆန်သည် ပြီးခဲ့တဲ့ နိုဝင်ဘာလအတွင်းက ကျင်းပခဲ့သည့် MMA မစ်ဒယ်ဝိတ်တန်း စိန်ခေါ်ပွဲတွင်လည်း ဂျပန်ဖိုက်တာ အိုကာမီကို အလဲထိုး အနိုင်ရရှိခဲ့သည်။
Public Service Announcement
အောင်လအန်ဆန်သည် One Championship MMA ပြိုင်ပွဲတလျောက် ၄၂ ပွဲ ထိုးသတ်ခဲ့ပြီး ၂၉ ပွဲနိုင် ၁၃ ပွဲ ရှုံးနိမ့်ထားသည်။ အောင်လအန်ဆန်သည် One Champion ပြိုင်ပွဲတွင် Middleweight နှင့်Light Heavyweight တန်းတို့၏ ချန်ပီယံဟောင်းဖြစ်ပြီး ချန်ပီယံခါးပတ်ကို ပြန်လည်သိမ်းပိုက်နိုင်ရန် ကြိုးစားနေခြင်းဖြစ်သည်။
