မကွေးတိုင်း၊ ဆိပ်ဖြူမြို့နယ်တွင် အာဏာသိမ်းစစ်ကောင်စီအား အခွန်ပေးဆောင်နေသည့် ဆုံဆည်းရာ KTVဆိုင်အား မိုင်းခွဲတိုက်ခိုက်ခဲ့ကြောင်း OAK AWE UG GROUP(Salay)၏ တာဝန်ခံ ကိုဥသြက ပြောသည်။
ဇန်နဝါရီ ၁၃ရက် ညပိုင်းက ဆိပ်ဖြူနှင့် ပွင့်ဖြူလမ်းမပေါ်၊ အောက်ဆိပ်ကျေးရွာ၌ ဖွင့်လှစ်ထားသော ဆုံဆည်းရာ KTVဆိုင်အား မိုင်းခွဲတိုက်ခိုက်ခဲ့ခြင်းဖြစ်သည်။
“ အဲဒီKTVက စစ်ကောင်စီထောက်တိုင် အမာခံလည်းဖြစ်တယ်။ အရင်တုန်းကတည်းက သတင်းကြိုရတယ်။ စီစဥ်ထားတာကြာပါပြီ။” ဟု ကိုဥသြက ပြောသည်။
အဆိုပါ စစ်ဆင်ရေးများခုကို Oak Awe UG Group မြို့ပြပြောက်ကျားတပ်ဖွဲ့ ( စလေ)နှင့် သိန်းငှက်နက်ဆိပ်ဖြူတော်လှန်ရေးတပ်ဦး (B.H.S.R.F)တို့ ပူးပေါင်းကာ တိုက်ခိုက်ခဲ့ပြီးရဲဘော်များအထိအခိုက်မရှိကြောင်း အသိပေးထားသည်။
Oak Awe UG Group မြို့ပြပြောက်ကျားတပ်ဖွဲ့(စလေ)နှင့် သိန်းငှက်နက်ဆိပ်ဖြူတော်လှန်ရေးတပ်ဦး (B.H.S.R.F)တို့ နှစ်ဖွဲ့ပူးပေါင်းတိုက်ခိုက်မှုအဖြစ် ဒီဇင်ဘာ၂၇ ရက်နံနက် ၇ နာရီခန့်က ဆိပ်ဖြူမြို့နယ် တရားရုံးအား ဗုံးခွဲတိုက်ခိုက်ခြင်း၊ ဒီဇင်ဘာ ၃၁ ရက်က ဆိပ်ဖြူမြို့ရှိ စစ်ကောင်စီခန့် ရပ်ကျေးအုပ်ချုပ်ရေးမှူးနေအိမ် မိုင်းခွဲတိုက်ခိုက်ခြင်း၊ ဇန်နဝါရီ၁ ရက် နံနက်ပိုင်းက ဝါဇီစက်ရုံ ဆက်သွယ်ထားသည့် တံတားအား မိုင်းခွဲတိုက်ခိုက်ခြင်း၊ ဇန်နဝါရီ၁၂ ရက်က (၁ဝ)မိုင်း လမ်းဆုံနှင့် ရိက္ခာသယ်ကားအား မိုင်းဆွဲတိုက်ခိုက်ခြင်းများ ပြုလုပ်ခဲ့သည်။
