စစ်ကိုင်းတိုင်း၊ ရေဦးမြို့နယ်တွင် စစ်ကောင်စီတပ် ထောင်ထားခဲ့သော နင်းမိုင်းများကြောင့် ၃ရက်အတွင်း ကလေးငယ်တစ်ဦးအပါအဝင် ပြည်သူနှစ်ဦး ခြေတစ်ဖက်စီ မိုင်းထိဆုံးရှူံးခဲ့ကြောင်း ဒေသခံများက ပြောသည်။
စစ်ကောင်စီတပ်သည် ဇန်နဝါရီလ ၁၅ ရက်နေ့က ကုန်းသာ ချမ်းသာရွာက်ို မီးရှို့ဖျက်ဆီးခဲ့သည်။
ယနေ့ ဇန်နဝါရီလ ၁၈ ရက်နေ့ နံနက် ၁၁ နာရီ ၅၅ မိနစ်ခန့်တွင် ကျေးရွာအတွင်းသို့ ပြည်သူအချို့ ပြန်လည်ဝင်ရောက်ခဲ့ရာ စစ်ကောင်စီတပ်က နင်းမိုင်းများထောင်ထားခဲ့သောကြောင့် အသက် ၁၄ နှစ်အရွယ် မိန်းကလေးတစ်ဦးခြေထောက်တစ်ဖက် ဆုံးရူံးခဲ့ရကြောင်း ဒီပဲယင်းမြို့ကသတင်းတစ်ချို့က ဖော်ပြသည်။
ဇန်နဝါရီလ ၁၆ ရက်နေ့ကလည်း ရေဦးမြို့နယ်၊ ကုန်းသာရွာတံတားထိပ်၊ ကွမ်းယာဆိုင်အနီးတွင် ၌ပင် ပြည်သူတစ်ဦး နင်းမိုင်းမိကာ ခြေထောက်တစ်ဖက်ဆုံးရှုံးခဲ့ကြောင်း ဒေသခံများက ပြောသည်။
Public Service Announcement
“စစ်တပ်က စစ်ကြောင်းထိုးပြီးအပြန် ထောင်ထားခဲ့တဲ့ မိုင်းထိတာ။”ဟု ဒေသခံတစ်ဦးက ပြောသည်။
ပြည်သူများအနေဖြင့် စစ်ကြောင်းထွက်ပြီးနောက်ရဲဘော်များရှင်းလင်းရေးဝင်ပြီးမှသာရွာထဲသို့ပြန်ဝင်ကြရန် ဒေသတွင်း တော်လှန်ရေးအင်အားစုများက တိုက်တွန်းသည်။
စစ်ကောင်စီတပ်သည် ဇန်နဝါရီလ ၁၅ ရက်နေ့က ရေဦးမြို့နယ် ၊ ချမ်းသာကျေးရွာ၌ နှစ်ပေါင်းတစ်ရာကျော်သက်တမ်းရှိ ခရစ်ယာန်ဘုရားရှိခိုးကျောင်းနှင့် ဘုန်းတော်ကြီးကျောင်းများအပါအဝင် နေအိမ်အဆောက်အအုံအများအပြားအား မီးရှို့ဖျက်ဆီးသွားခဲ့သည်။
