ကေအဲန်ယူ ဗဟိုဌာနချုပ်တွင် ကျင်းပပြုလုပ်သော ကရင့်တော်လှန်ရေးနေ့ အခမ်းအနားကို တက်ရောက်လာသော ဧည့်သည်တော်များ၊ ခေါင်းဆောင်များမှ ကရင်အမျိုးသားအလံတော်အား အလေးပြုခြင်းဖြင့် အစီအစဉ်စတင်ခဲ့ပြီး ကေအဲန်ယူ ဒုတိယဥက္ကဌ ပဒိုစောကွယ်ထူးဝင်း၊ တွဲဖက်အထွေထွေအတွင်းရေးမှူး (၂) ပဒိုစောလှထွန်း၊ ဗဟိုအလုပ်အမှုဆောင်ကော်မတီဝင် ပဒိုစောသမိန်ထွန်းနှင့် စအောင်မျိုးထက်တို့မှ ကြိုဆိုနှုတ်ခွန်းဆက်စကား ပြောကြားခြင်း၊ သဝဏ်လွှာဖတ်ကြားခြင်း၊ မိန့်ခွန်းပြောကြားခြင်းများ လုပ်ဆောင်ခဲ့သည်။
ထို့နောက် (၇၄) နှစ်မြောက် ကရင်အမျိုးသားတော်လှန်ရေးနေ့သို့ ပေးပို့သော ကရင်လူငယ်အစည်းအရုံး၏ သဝဏ်လွှာနှင့် ကရင်အမျိုးသမီးအစည်းအရုံး၏ သဝဏ်လွှာအား ဖတ်ကြားခဲ့ပြီး ကေအဲန်ယူ ဗဟိုကော်မတီဝင် ပဒိုစောကလယ်စေးမှ အသိပေးကြေညာခြင်းနှင့် ကျေးဇူးတင်စကားပြောကြားခဲ့ကြောင်း၊ တော်လှန်ရေးနေ့အစီအစဉ်ကို ကရင်အမျိုးသားသီချင်းဖြင့် သီဆိုကာ ရုတ်သိမ်းခဲ့ကြောင်း KYO ၏ ထုတ်ပြန်ထားချက်မှ သိရသည်။
ကေအဲန်ယူ ဥက္ကဌ ဗိုလ်ချုပ်ကြီးစောမူတူးစေဖိုးက ဖက်ဒရယ်ဒီမိုကရေစီ ပြည်ထောင်စုကြီးတည်ဆောက်နိုင်ရေး၊ မိမိတို့ ကရင်အမျိုးသားများနှင့် ပြည်သူလူထုတစ်ရပ်လုံးအတွက် တရားမျှတမှု၊ တန်းတူညီမျှမှုနှင့် ကိုယ်ပိုင်ပြဌာန်းခွင့်များအတွက် ပြီးမြောက်အောင်မြင်သည်အထိ ကြိုးပမ်းအားထုတ်ကြရမည်ဖြစ်သလို မိမိတို့၏ ကြိုးပမ်းအားထုတ်မှုများ ပိုမိုအားကောင်းစေရေးနှင့် အောင်မြင်ရေးအတွက် အခြားသော လူမျိုးများ၊ အစုအဖွဲ့များနှင့် လက်တွဲလုပ်ဆောင်ကာ ကြိုးပမ်းအားထုတ်ကြရမည်ဟု ကရင့်တော်လှန်ရေးနေ့မိန့်ခွန်း၌ တိုက်တွန်းပြောကြားထားသည်။
