▪︎စစ်ကူလာသည့်ယာဥ်ကိုပါ PDFများကမိုင်းဆွဲတိုက်ခိုက်
စစ်ကိုင်းတိုင်း၊ မုံရွာ-မန္တလေးလမ်းပေါ်တွင် ညောင်ပင်ဝန်းရဲစခန်းကိုPDFများကတိုက်ခိုက်နေစဥ် စစ်ကူလာသည့်စစ်ကောင်စီတပ်ကိုပါ ထပ်မံမိုင်းဆွဲတိုက်ခိုက်ခဲ့ကြောင်း တိုက်နယ်စွန် PDF အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
ဖေဖော်ဝါရီလ ၈ ရက်နေ့ မွန်းလွဲ ၂ နာရီခန့်က စစ်ကောင်စီတပ်သည် ညောင်ပင်ဝန်းရွာက ပြည်သူ ၃ ဦးအား သတ်ဖြတ်ခဲ့ပြီးပြည်သူ ၇ ဦးခန့် ဖမ်းဆီးသွားခဲ့သည်။
ထို့ကြောင့် မွန်းလွဲ ၂ နာရီ ၄၄ မိနစ်ခန့်တွင် ညောင်ပင်ဝန်းရဲစခန်းကို မဟာမိတ် အဖွဲ့များနှင့်အတူ လက်နက်ကြီး လက်နက်ငယ်၊ တာဝေးပစ်များ၊မိုင်းများဖြင့် တိုက်ခိုက်ခဲ့ကြောင်း အထက်ပါပုဂ္ဂိုလ်ကဆက်ပြောသည်။
ထို့အပြင် တိုက်နယ်စွန် PDF အဖွဲ့၏ ကင်းပုန်းအဖွဲ့သည် စစ်ကိုင်း တပ်မ ၃၃ မှ စစ်ကူလာသော စစ်ကားကိုပါ ည ၈ နာရီကျော်ကျော်တွင် မိုင်း ၂ လုံးခွဲ၍ တိုက်ခိုက်ပြီး တာဝေးပစ်လက်နက်ဖြင့်လည်း ပစ်ခက်တိုက်ခိုက်ခဲ့ကြောင်း သတင်းနှင့် ပြန်ကြားရေးတာဝန်ခံက ဆက်ပြောသည်။
Public Service Announcement
ည ၈ နာရီခန့်ကစပြီး တိုက်နယ်စွန် PDFက ၁၂၀ မမ ၅ လုံး ၊ ၈၀ မမ ၃ လုံး၊ ၆၀ မမ ၁၀ လုံး၊ ဒုံးပစ် ၅ လုံး နှင့် ပစ်ခတ်တိုက်ခိုက်ခဲ့ပြီး ဗိုလ်ရာမ အဖွဲ့မှ ၆၀ မမ ၁၀လုံးဖြင့် ပစ်ခတ်တိုက်ခိုက်ခဲ့သည်ဟုဆိုသည်။
နံနက် ၃ နာရီဝန်းကျင်တွင် အထိခိုက်မရှိ ပြန်လည်ဆုတ်ခွာနိုင်ခဲ့ပြီး စစ်ကောင်စီဘက်က ထိခိုက်မှုအခြေအနေ မသိရသေးကြောင်းလည်းဖော်ပြထားသည်။
“လက်ရှိကတော့ညောင်ပင်ဝန်းစခန်းဘက်မှာ အင်းအားထပ်ဖြည့်ထားတယ်။ ညောင်ပင်ဝန်း ရွာတောင်ဘက်မှာ ခုလက်ရှိ ဝင်ရောက်မွှေနှောက်နေတယ်ဗျ။ ရွာခံတွေကတော့ ထွက်ပြေးတိမ်းရှောင်နေရတယ်။”ဟု တိုက်နယ်စွန် PDF အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
ထိုစစ်ဆင်ရေးကို တိုက်နယ်စွန် PDF နှင့်အတူ မဟာမိတ်အဖွဲ့များဖြစ်သော ရင်း ၈၊ ဗိုလ်ရာမ၊ဒေါင်းနီခွဲ ၁၊ Zero power၊ စွန်ရဲ၊ ပ.က.ဖ အဖွဲ့ ၂ ဖွဲ့ တို့နှင့် ပူးပေါင်း ဆောင်ရွက်ခဲ့ကြောင်း အသိပေးထားသည်။
ဖေဖော်ဝါရီလ ၇ရက်နေ့ကလည်းညောင်ပင်ဝန်းရဲစခန်းမှ ခြေလျင်ထွက်လာသော ရဲ ၇ဦးအား ပဒေသာမိုင်းများ၊ လက်နက်ကြီးလက်နက်ငယ်များဖြင့် ပစ်ခတ်တိုက်ခိုက်ခဲ့ရာ ၅ ဦးပွဲချင်းပြီးသေဆုံးကြောင်း Moe Nyo Revolution Force MNRFက ထုတ်ပြန်ထားသည်။
