“ပြည်သူတွေအနေနဲ့ စိုးရိမ်ဖို့မလိုဘူး။ ငွေလွှဲစရာလည်းမလိုဘူး။ တော်လှန်ရေးအင်အားစုတွေအနေနဲ့ ဒါတွေကိုဖြေရှင်းနိုင်အောင် ကြိုးစားနေတယ်” -မတ္တရာပကဖတာဝန်ရှိသူ
မန္တလေးတိုင်း၊ မတ္တရာမြို့ရှိ စျေးဆိုင်များအား PDFအဖွဲ့အယောင်ဆောင်ကာ ခြိမ်းခြောက်စာများပို့ပြီး ငွေကျပ်သုံးသိန်းစီ တောင်းခံနေကြောင်း ဒေသခံများကပြောသည်။
မတ္တရာမြို့ပေါ်ရှိ စျေးဆိုင်များအား မြေလတ်သံ PDF အဖွဲ့ဟုဆိုကာ ပစ်စာများပစ်ပြီး ခြိမ်းခြောက်ငွေကြေးတောင်းခံနေကြောင်း ဒေသခံများက ပြောသည်။
ထိုပစ်စာထဲတွင် မဟာမိတ်စုပေါင်းရေးတပ်၊ တိုင်းရင်းသားလက်နက်ကိုင်အားလုံးနှင့် ကချင်အဖွဲ့အစည်း၊ မိုးမိတ်ရှမ်းလက်နက်ကိုင်၊ ပလောင်လက်နက်ကိုင်အဖွဲ့၊ လီဆူးစုပေါင်းရေးတပ်၊ မြို့ခံနယ်ခံရွာခံစုပေါင်းပြီး ငွေကြေးတက်နိုင်သည့်အိမ်များကို အလှူခံရခြင်းဖြစ်ကြောင်း၊ အလှူငွေ ၃ သိန်းကျပ်ကို ဖုန်းနံပါတ် ၀၉၈၉၉၈၈၃၁၂၁သို့ လွှဲပေးရန်နှင့် မပေးပါက နေအိမ်နှင့်ဆိုင်များကို ဒလန်ရှင်းလင်းရေးအဖွဲ့က အသံတိတ်သေနတ်ဖြင့်သုတ်သင်ရှင်းလင်းခြင်း၊ မိုင်းခွဲခြင်းများ ပြုလုပ်သွားမည်ဟု ခြိမ်းခြောက်ရေးသားထားသည်။
ခြိမ်းခြောက်သည့်စာထဲတွင် ဖောက်ခွဲရေး မြေလတ်သံပူးပေါင်းရေး PDF အဖွဲ့၊ ကောင်းကင်ရံဒရုန်းစကြာအဖွဲ့၊ မလွတ်တမ်းမိုင်းခွဲဒင်ကြီးစသည့် အဖွဲ့အမည်များဖြင့် ငွေတောင်းခဲ့ခြင်းဖြစ်သည်။
Public Service Announcement
ထိုအဖွဲ့များအား နာမည်ပင်မကြားဖူးဘဲမည်သည့်စစ်ဆင်ရေးမှလည်း မရှိကြောင်း၊ လွန်ခဲ့သောနှစ်လခန့်ကလည်း ကျောက်တံတားကျေးရွာက ပြည်သူတစ်ဦးထံ ပစ်စာပေးခြိမ်းခြောက်ခဲ့ဖူးကြောင်း၊ ပြည်သူကတိုင်ကြားသည့်အတွက် စစ်ဆေးခဲ့ပြီး စာတွင်ပါသည့်ဖုန်းနံပါတ်ကိုဆက်သွယ်သောအခါ မြေလတ်သံLocal PDF၏ တာဝန်ရှိသူက အဖွဲ့ဝင်ကလေးများ နားမလည်၍ ပို့ခဲ့ခြင်းဖြစ်ပြီးနောင်မဖြစ်စေရန်လုပ်ဆောင်မည်ဟုတောင်းပန်သွားကြောင်း မတ္တရာပကဖတာဝန်ရှိသူကပြောသည်။
“အခုဒီရက်ပိုင်းမှာပဲ မတ္တရာမြို့ပေါ်မှာရှိတဲ့စျေးဆိုင်တွေ လေးဆိုင်ကိုပစ်စာတွေထပ်ပစ်တယ်။ ဒီလက်ရေးပဲ။ ဒီစာပဲ။ အရင်တခါရတာလည်းဒီလက်ရေးပဲ ဒီစာပဲ။ အရင်ကခရိုင်အဆင့်၊ တိုင်းအဆင့် တိုင်ကြားထားတာရှိတယ်။ သို့သော်အရေးယူမှုမလာသေးဘူး။ ပြည်သူတွေဆီကိုတော့ ဒီပစ်စာထပ်ရောက်ဦးမယ့်သဘောရှိတယ်။”ဟု မတ္တရာပကဖတာဝန်ရှိသူက ပြောသည်။
“ပြည်သူတွေအနေနဲ့ စိုးရိမ်ဖို့မလိုဘူး။ ငွေလွှဲစရာလည်းမလိုဘူး။ တော်လှန်ရေးအင်အားစုတွေအနေနဲ့ ဒါတွေကိုဖြေရှင်းနိုင်အောင် ကြိုးစားနေတယ်။ သူတို့အဖွဲ့အနေနဲ့ ငွေရဖို့သက်သက် အချောင်နှိုက်တဲ့အဖွဲ့ပါပဲ။ ပစ်စာပစ်တာပဲရှိတယ်။ သူတို့စာထဲကအတိုင်း ခြိမ်းခြောက်ဆောင်ရွက်တာမျိူး မရှိပါဘူး။ ငွေရလိုရငြားလုပ်တယ်လို့ ယူဆတယ်။”ဟု မတ္တရာပကဖတာဝန်ရှိသူကပြောသည်။
PDFအဖွဲ့ဆိုပါကလည်း ယခုလိုအပြုအမူမျိုး လုပ်ဆောင်နေခြင်းကို အပြင်းအထန်ကန့်ကွက်ကြောင်း မတ္တရာပကဖတာဝန်ရှိသူကပြောသည်။
နယ်ဒေသအသီးသီးတွင် တော်လှန်ရေးအင်အားစုများများပြားနေခြင်းကို အခွင့်ကောင်းယူကာ မသမာသူများက PDFအဖွဲ့အယောင်ဆောင်၍ ခြိမ်းခြောက်ငွေတောင်းမှုများ ရှိနေသည်။
တနင်္သာရီတိုင်း၊ လောင်းလုံးမြို့နယ်၊ မောင်းမကန်ကျေးရွာဘက်တွင်လည်း ပြီးခဲ့သည့်ဇန်နဝါရီလအတွင်းက ဒေသခံများထံဖုန်းဆက်ပြီး PDFအဖွဲ့ဟုဆိုကာ ငွေကြေးတောင်းခံမှုများ ရှိနေသည်။
