နောင်ချိုမြို့ တိုက်ပွဲတွေကြောင့် စစ်ရှောင်တွေ နေအိမ်မပြန်နိုင်သေး

ရှမ်းပြည်နဲ့ မန္တလေးအစပ် နောင်ချိုမြို့နယ်ထဲမှာ စစ်ကောင်စီတပ်နဲ့ မန္တလေး PDF တပ်တွေကြား တိုက်ပွဲတွေကြောင့် တိမ်းရှောင်နေရတဲ့ ဒေသခံတွေ နေရပ်မပြန်နိုင်သေးဘူးလို့ သိရပါတယ်။

ဒီနှစ် ဖေဖော်ဝါရီ ဒုတိယပတ်အတွင်း ဖြစ်ပွားခဲ့တဲ့ စစ်ကောင်စီတပ်နဲ့ မန္တလေး PDF တို့ ကြားတိုက်ပွဲတွေဟာ နောင်ချိုမြို့နယ်၊ဒိုးပင်ကျေးရွာအုပ်စု ၊လုံခန်ရွာအနီးမှာ ဖြစ်ပွားခဲ့တာပါ။

ဒါကြောင့် လုံခန်ရွာနဲ့အနီးတဝိုက်က ဒေသခံ ပြည်သူ ၅၀၀ ကျော်ဟာ ထွက်ပြေးတိမ်းရှောင်နေကြရပါတယ်။

“တချို့တွေလည်း နေအိမ်ပြန်တဲ့သူရှိပေမယ့် လုံခန်ရွာကတော့ အဓိကပေါ့၊ မပြန်နိုင်ကြသေးပါဘူး၊ အိမ်တွေပျက်စီးတာတွေရှိတယ်”လို့ စစ်ရှောင်ပြည်သူတွေကို ကူညီကယ်ဆယ်ရေး လုပ်ကိုင်ပေးနေသူတစ်ဦးကပြောပါတယ်။

Public Service Announcement

နေအိမ်စိတ်မချလို့ အိမ်ပြန်သူတွေရှိပေမယ့် စစ်ကောင်စီတပ်တွေရှိနေတဲ့အတွက် မပြန်နိုင်သေးသူတွေလည်းရှိနေပါတယ်။

ပြီးခဲ့တဲ့ ရက်ပိုင်းက စစ်ကောင်စီတပ်ဟာ လုံခန် ရွာသား ၇ ဦးကို ဖမ်းဆီးသွားခဲ့ပြီး ၁ ဦးကို သတ်ဖြတ်ခဲ့တဲ့ သတင်းတွေလည်းထွက်နေပါတယ်။

ဒါပေမယ့် အဲဒီသတင်းကို သီးခြားအတည်မပြုနိုင်သေးဘူးလို့ MDY PDFက တာဝန်ရှိသူတစ်ဦးကပြောပါတယ်။

” သတင်းကြားတယ်၊ လောလောဆယ်တော့ အတည်မပြုနိုင်သေးဘူး၊စစ်ကောင်စီနဲ့ကလည်း တိုက်ပွဲပြီးသွားတဲ့သဘောမဟုတ်သေးပါဘူး၊သူတို့တွေဆက်ရှိနေဆဲပါပဲ”လို့ တာဝန်ခံကဆိုပါတယ်။

နောင်ချိုမြို့နယ် လုံခန်ရွာတိုက်ပွဲမှာ စစ်ကောင်စီဘက်က ၂၅ ဦး သေဆုံးပြီး MDY PDFက ရဲဘော်၂ဦးကျဆုံးခဲ့တယ်လို့ မန္တလေး PDF က ထုတ်ပြန်ထားပါတယ်။

မန္တလေး PDF နဲ့ စစ်ကောင်စီတပ်ကြား တိုက်ပွဲဖြစ်ပွားခဲ့တဲ့ နောင်ချိုမြို့ဟာ စစ်တပ်မြို့ လူသိများတဲ့ ပြင်ဦးလွင်မြို့နဲ့ ထိစပ်နေတဲ့ ဒေသဖြစ်ပါတယ်။