ပုလဲနယ်တွင် လေးရက်ကြာ စစ်ကြောင်းထိုးနေသော စစ်ကောင်စီတပ်ကြောင့် ဒေသခံထောင်ချီထွက်ပြေးတိမ်းရှောင်နေရ

အမျိုးသမီးတစ်ဦး ပစ်ခတ်သတ်ဖြတ်ခံရ၊ PDF ရဲဘော်နှစ်ဦးလည်း ဖမ်းဆီးသတ်ဖြတ်ခံရ

စစ်ကိုင်းတိုင်း၊ ပုလဲမြို့နယ်ဘက်မှ ယင်းမာပင်မြို့နယ်သို့ဝင်ရောက်ပြီး လေးရက်ကြာ စစ်ကြောင်းထိုးနေသော စစ်ကောင်စီတပ်ကြောင့် ကျေးရွာအများအပြားမှ ဒေသခံထောင်ချီ ထွက်ပြေးတိမ်းရှောင်နေရပြီး အမျိုးသမီးတစ်ဦး ပစ်ခတ်သတ်ဖြတ်ခံထားရကြောင်း ဒေသခံများက ပြောသည်။

ပုလဲမြို့နယ်ဘက်မှ စစ်ကြောင်းထိုးလာသော စစ်ကောင်စီတပ်သား အင်အား ၁၀၀ခန့်သည် ဖေဖော်ဝါရီ ၂၂ ရက်မှစတင်ကာ ယင်းမာပင်မြို့နယ်အတွင်းသို့ ရောက်ရှိလာပြီး အထက်ငါးနန်းကျေးရွာအတွင်းသို့ သေနတ်များ ရမ်းသမ်းပစ်ခတ်ဝင်ရောက်ခဲ့သည်။

ထိုသို့ ရမ်းသမ်းပစ်ခတ်မှုကြောင့် အထက်ငါးနန်းကျေးရွာနေ အမျိုးသမီးတစ်ဦး ကျည်ထိမှန်သေဆုံးခဲ့ကြောင်း ဒေသခံများက ပြောသည်။

“ထွက်ပြေးတဲ့အချိန် အပစ်ခံရတာပြောတယ်။ ကလေး၃ ယောက်အမေတဲ့”ဟု ဒေသခံတစ်ဦးက ပြောသည်။

Public Service Announcement

ထို့နောက် မောက်လုပ်ကျေးရွာ၌ ညအိပ်တပ်စွဲခဲ့ပြီး ဖေဖော်ဝါရီ ၂၃ ရက်တွင် ဆက်လက်ထွက်ခွာခဲ့ရာ ထိုနေ့မွန်းလွဲပိုင်းတွင် တာဝကျေးရွာအနီးသို့ ရောက်ရှိလာပြီး တောတဲတိုက်အချို့ကို မီးရှို့ဖျက်ဆီးခဲ့သည်။

ထို့နောက် တာဝရွာသို့ဝင်ရောက်ရာတွင် PDF ရဲဘော်များနှင့်ပစ်ခတ်မှုဖြစ်ပွားခဲ့ပြီး ရဲဘော်သုံးဦးဖမ်းဆီးခံခဲ့ရကာ တစ်ဦးထွက်ပြေးလွတ်မြောက်ခဲ့ကြောင်း၊ ကျန်နှစ််ဦးမှာ သတ်ဖြတ်ခံခဲ့ရကြောင်း ဒေသတွင်းသတင်းရင်းမြစ်များက ပြောသည်။

ယမန်နေ့ (ဖေဖော်ဝါရီ ၂၄ ရက်)တွင် တာဝကျေးရွာနေအိမ်အချို့အား မီးရှို့ဖျက်ဆီးခဲ့ပြီး အိမ်ခြေ ၂၂လုံး မီးလောင်ကျွမ်းပျက်စီးခဲ့ကြောင်း ဒေသခံများက ပြောသည်။

ယနေ့ (ဖေဖော်ဝါရီလ ၂၅ ရက်)မွန်းလွဲပိုင်းတွင်မူ စစ်ကောင်စီတပ်သည် ချောင်းကောက်ကျေးရွာအနီးသို့ ရောက်ရှိနေပြီး ထိုစစ်အုပ်စု၏ စစ်ကြောင်းထိုးမှုများကြောင့် ဒေသခံပြည်သူအများအပြား ထွက်ပြေးတိမ်းရှောင်နေရကြောင်း ယင်းမာပင်မြို့နယ်သတင်းမှန်ပြန်ကြားရေးအဖွဲ့က ပြောသည်။