ဖားကန့်၊ရှ​ရော်ခရွာမှပြည်သူများကိုစစ်တပ်ကနာရီ ၂၀​ကျော်ဖမ်းပြီး KIA နှင့်PDF မ​ကောင်း​ကြောင်း​ပြော၍ပြန်လွှတ်

ဖားကန့်မြို့နယ်၊ ရှရော်ခကျေးရွာ ဒေသခံ ၁၀၀ ​ကျော်ကို စစ်ကောင်စီတပ်ကတစ်ရက်ကြာ ဖမ်း‌ဆီးပြီး​နောက်KIA နှင့်PDFအကြောင်း မ​ကောင်းပြောပြး ပြန်လွှတ်ပေးခဲ့ကြောင်း ဒေသခံများကပြောသည်။

ရှရော်ခကျေးရွာကို စစ်ကောင်စီတပ်က မတ်လ ၁ရက် ညနေ ၃ နာရီခွဲခန့်တွင်သေနတ်များပစ်ဖောက်ဝင်ရောက်ပြီး ဒေသခံ ၁၂၈ ဦးကိုဖမ်းဆီးခဲ့သည်။ ထို့‌နောက် မတ်လ ၂ရက် နေ့လယ်နှင့်ညနေတွင် လူခွဲ၍ အားလုံးကို ပြန်လွှတ်ပေးခဲ့သည်။

“ဖမ်းထားတဲ့အချိန်တချိန်လုံးမှာ KIA နဲ့ PDFက လူထုရဲ့ ရန်သူတွေဆိုတာကို ပြောတယ်တဲ့။ နောက်ပြီး သတင်းပေးဖို့နဲ့ သူတို့နဲ့ ပူးပေါင်းဖို့ စစ်ခွေးတပ်က ပြောတယ်။ ပြီးတော့ ပြန်လွှတ်ပေးလိုက်တယ်” ဟုဖားကန့်မြို့နယ်မှ​ဒေသခံတစ်ဦးကပြောသည်။

ရှရော်ခကျေးရွာဒေသခံ ၁၂၈ ဦးကို ဖမ်းဆီးပြီး အသက် ၅၀နှစ်အထက်များအပါအဝင် ၉၂ဦးကို နာရီ ၂၀ ကျော်အကြာမတ်လ ၂ရက် နေ့လည် ၁၂နာရီခန့်တွင် ပထမပြန်လွှတ်ခဲ့သည်။ စစ်ကိုင်းတိုင်း မှတ်ပုံတင် ၅မျဉ်းစောင်း ကိုင်ထားသူများအပါအဝင် ၃၀ဦးကို ပြန်မလွှတ်သေးဘဲ ဆက်လက်ဖမ်းဆီးထားပြီး ညနေ ၃နာရီခန့်တွင်မှ ပြန်လွှတ်ပေးခဲ့သည်ဟု သတင်းရရှိသည်။

Public Service Announcement

” အသက်ကြီးတဲ့သူတွေကို တစ်ယောက်တစ်သောင်း ပေးပြီ ပြန်လွှတ်တယ်။ လူငယ်တွေကိုကျတော့ အအေးဗူးတွေတိုက်တယ်။ တမင်ကို ဖမ်းဆီးပြီးမှ ပြန်လွှတ်ပေးပြီး သူတော်ကောင်းဘွဲ့ခံတဲ့သဘောပဲ။ ဒါက နိုင်ငံရေးမှာ အရပ်သားကို အသုံးချတာ”ဟု ဒေသခံတစ်ဦးကပြောသည်။

ဖားကန့်မြို့နယ်အေးမြသာယာရပ်ကွက်တွင်နေထိုင်သူတစ်ဦးကလည်း” ဖားကန့်လူထုက KIA နဲ့ PDF ကို ထောက်ခံတယ်။ စစ်ကောင်စီကိုလက်မခံဘူး။ ဒီတော့ စစ်ကောင်စီက လူတွေကိုဖမ်းပြီးပြန်လွှတ်ပေးပြတယ်။KIA၊PDFမကောင်းကြောင်းတွေပြောပြီးငွေနည်းနည်းပေးတယ်။ပြန်လွှတ်တယ်သူတို့ စည်းရုံးရေးဆင်းနေတာ” ဟုပြောသည်။

ဖမ်းဆီးခံရသူများသည် ရှရော်ခကျေးရွာအနီးရှိ ရတနာမိုးမြေ ကျောက်စိမ်းလုပ်ကွက်အတွင်း နာရီ၂၀မှ ၂၄နာရီနီးပါး ချုပ်နှောင်ခံခဲ့ရသည်။ အရပ်သားများအား အကြောင်းပြချက်မရှိဘဲ ဖမ်းဆီးပြီးမှ အပြစ်မရှိဟုဆိုကာ ပြန်လွှတ်ပေးခြင်းအတွက် ကျေးဇူးတင်နေမည်မဟုတ်ဘဲ စစ်အာဏာရှင်တော်လှန်ရေးအတွက်KIA နှင့်PDF ကိုဆက်လက်အားပေးထောက်ခံသွားမည်ဟု ဒေသခံများကပြောသည်။