စစ်ကောင်စီနဲ့ ရှမ်းနီတပ်အထိနာဟု ဒေသခံပြော
ကချင်ပြည်နယ် ဖားကန့်မြို့နယ် ဆယ်ဇင်းဒေသ၌ ယနေ့နံနက်တွင် တိုက်ပွဲဖြစ်ပွားနေပြီး စစ်ကောင်စီဘက်က ထိခိုက်သေဆုံးများသည်ဟု သိရကြောင်း ဆယ်ဇင်းဒေသခံက ပြောသည်။
ဆယ်ဇင်းဒေသ မှန်စိမ်းကျေးရွာအနီးရှိ ကချင်လွတ်လပ်ရေးတပ်မတော်(KIA)က သိမ်းပိုက်ထားသည့် နေရာသို့ စစ်ကောင်စီတပ်က ထိုးစစ်ဆင် တိုက်ခိုက်လာ၍ မတ်လ ၆ရက် နံနက်မှစ၍ တိုက်ပွဲ ပြင်းထန်နေသည်ဟု ဆိုသည်။
“အခုလောလောဆယ် ဆယ်ဇင်းနားမှာ ဖြစ်နေတာ။ အခု မနက်ကနေဖြစ်တာ အခုအချိန်ထိ မပြီးသေးဘူး။ ဆယ်ဇင်းဘေးနားတင်ပဲ။ SNA နဲ့ ဒီဘက်က KIA/PDFနဲ့ ဖြစ်တာပေါ့။ SNAဘက်မှာက စစ်ကောင်စီလည်း ပါမှာပေါ့။ သူတို့ကအမြဲတမ်း ပူးပေါင်းနေတဲ့သူတွေဆိုတော့လေ။ သူတို့ဘက်က အထိအခိုက်တော်တော်များတယ်လို့ ကြားပါတယ်။ မပြီးတော့ မပြီးသေးဘူး ပွဲက။ အခုထိဖြစ်နေတုန်း” ဟု ဆယ်ဇင်းဒေသခံက ပြောသည်။
ဖားကန့်မြို့နယ် ဆိုင်းတော်(ဆိပ်မူ)ရွာရှိ စစ်ကောင်စီတပ်စခန်းကိုလည်း KIAနှင့်PDF ပူးပေါင်းတပ်က ယမန်နေ့ ညပိုင်းတွင် တိုက်ခိုက်ခဲ့ကြောင်း အဆိုပါ ဒေသခံက ပြောသည်။ အဆိုပါ တိုက်ပွဲဖြစ်စဉ်နှင့်ပတ်သက်၍ အသေးစိတ်မသိရသေးဟုဆိုသည်။
Public Service Announcement
Kachin News Group ၏ ဆိုင်းတောင် တိုက်ပွဲ ဖော်ပြချက်တွင် စစ်ကောင်စီတပ်က လက်နက်ကြီးဖြင့် ပြန်လည်ပစ်ခတ်၍ အရပ်သား နှစ်ဦး ဒဏ်ရာရခဲ့သည်ဟု ဆိုသည်။
ဖားကန့်နယ် ဆယ်ဇင်းဒေသ၌ KIAနှင့် စစ်ကောင်စီတပ်အကြား တိုက်ပွဲများ မကြာခဏ ဖြစ်ပွားလျက်ရှိသည်။
