စစ်ကိုင်းတိုင်း ကလေးမြို့မှချင်းပြည်နယ်ဘက်သို့စစ်ကောင်စီတပ်များ ဝင်ရောက်လာ၍ တိုက်ပွဲ အချိန်မရွေး ဖြစ်ပွားနိုင်ကြောင်းပြည်သူ့ကာကွယ်ရေးတပ်(PDF)-ဇိုလဲန်း(Zoland)က ယနေ့မတ်လ ၇ရက်တွင်သတင်းထုတ်ပြန်သည်။
စစ်ကောင်စီတပ်သည် ကလေး-သိုင်းငင်း-တီးတိန်လမ်းမကို အသုံးပြုလာခြင်းကြောင့် ထိုလမ်းမကြီးပေါ်တွင် အချိန်မရွှေးတိုက်ပွဲများဖြစ်လာသည်ဟု PDF-Zolandကသတိပေးထားသည်။ ထိုကြောင့် မိဘပြည်သူများအနေဖြင့် ထိုလမ်းမကြီးပေါ်တွင် ခရီးသွားလာခြင်း၊ တောထွက်ခြင်းမပြုရန်လည်း အသိပေးထားသည်။
“သူတို့က ရှုခင်းသာကနေ ခြေလျင်နဲ့တက်လာတာ။ အဓိကက ခရီးသွားယာဉ်တွေ ပြည်သူတွေဘက်ကနည်းနည်း သတိထားရင် ပိုကောင်းတာပေါ” ဟု PDF-Zoland တာဝန်ရှိသူ တစ်ဦးက People’s Spring သတင်းဌာနသို့ပြောသည်။
စစ်ကောင်စီတပ်သည် ချင်းပြည်နယ်အတွင်း စစ်ကြောင်းထိုးမှုကို ၂၀၂၂ နှစ် မိုးကုန်ပိုင်းတွင် နောက်ဆုံးပြုလုပ်ခဲ့ခြင်းဖြစ်ပြီး ထိုနောက်ပိုင်းတွင် ပထမဦးဆုံးအကြိမ်ပြန်လည် စစ်ကြောင်းထိုးလာခြင်းဖြစ်သည်ဟု PDF Zoland တာဝန်ရှိသူကပြောသည်။
Public Service Announcement
“သူတို့တက်လာတာ နှစ်ရက်လောက်ရှိပြီ တောင်ပေါ်ကို စစ်ကြောင်းထိုးဖို့ တက်လာတာ။ ကျွန်တော်တို့ သူတို့အင်အားနဲ့ အခြေအနေကို စုံစမ်းနေဆဲပါ”ဟု၎င်းကဆက်ပြောသည်။
ထိုစစ်ကြောင်းသည် တီးတိန်မြို့ကို ထိုးစစ်ဆင်ရန်ဖြစ်နိုင်သည်ဟုလည်း တာဝန်ရှိသူကသုံးသပ်ပြောသည်။
PDF ဇိုလဲန်းသည် ချင်းပြည်နယ် တီးတိန်မြို့နယ်အတွင်း လှုပ်ရှားနေသည့် ကာကွယ်ရေးတပ်ဖြစ်ပြီး စစ်ကောင်စီတပ်ကို ခုခံတိုက်ခိုက်လျက်ရှိသည်။
