အလောင်းများကို စစ်ဘေးရှောင်စခန်းတဲများအတွင်းထည့်ကာ မီးရှို့ဟု ဒေသခံပြော
မကွေးတိုင်း ဆောမြို့နယ် စံကျေးရွာအနီးတွင် ယနေ့ဖြစ်ပွားခဲ့သည့် တိုက်ပွဲအတွင်း စစ်ကောင်စီတပ်မှ ၃၀ ကျော် သေဆုံးခဲ့ကြောင်း ဆောဒေသ ပြည်သူ့ကာကွယ်ရေးတပ်(PDF)နှင့် နီးစပ်သည့် သတင်းရင်းမြစ်က ပြောသည်။
မဟာမိတ်ပူးပေါင်းတပ်ဖွဲ့နှင့် စစ်ကောင်စီတပ်တို့ မတ်လ ၃၀ရက် ညနေ ၃နာရီခွဲက တိုက်ပွဲဖြစ်ပွားခဲ့ကြောင်း၊ အထိနာသည့် စစ်ကောင်စီတပ်က လေကြောင်း ပစ်ကူသုံးကြိမ် တိုက်ခိုက်ခဲ့ကြောင်း ၎င်းက ဆိုသည်။
ယနေ့ ည ၇နာရီခန့်တွင် စစ်ကောင်စီတပ်က စံကျေးရွာအနီးရှိ စစ်ဘေးရှောင်စခန်းကို မီးရှို့နေသည်ဟု ဆိုသည်။စံကျေးရွာသည် ဆောမြို့နှင့် ၃၅ မိုင်ကျော်ကွာဝေးသည်။
“စကစတွေရဲ့ အလောင်းကို စစ်ဘေးရှောင်စခန်းမှ တဲများအတွင်းထည့်ကာ မီးရှို့နေကြကြောင်း သတင်းရ။ ဘယ်လောက်ဆိုတာ အတိအကျတော့ မသိရသေးဘူး။ ၃၀ကျော်လို့ ကြားနေရ”ဟု ဆောဒေသခံ သတင်းရင်းမြစ်က ပြောသည်။
Public Service Announcement
စစ်ကောင်စီတပ်က လေကြောင်းပစ်ကူဖြင့် တိုက်ခိုက်လာ၍ လက်နက်များ ကောက်ယူနိုင်ခြင်းမရှိဟု ဆိုသည်။
အဆိုပါ ဒေသသည် ဆောနယ်အနောက်မြောက်ပိုင်း ချင်းပြည်နယ်အစပ်၌ တည်ရှိပြီး စစ်ကောင်စီတပ်က ပြီးခဲ့သည့် ရက်ပိုင်းကတည်းက စစ်ကြောင်းထိုး လှုပ်ရှားနေခြင်းဖြစ်သည်။
