'/%3E%3C/svg%3E){kind=small}
မန္တလေးတိုင်း၊ စဥ့်ကူးမြို့နယ်တွင် သတင်းကြိုရခြင်းမရှိဘဲ ရုတ်တရတ်ဖြတ်သန်းလာသည့် စစ်ကောင်စီယာဥ်တန်းအား မိုင်းဆွဲတိုက်ခိုက်ရာ နောက်ဆုံးယာဥ်နှစ်စီးမိုင်းထိပြီး သုံးဦးသေဆုံးကြောင်း ဥဒေါင်းမင်းပြောက်ကျားတပ်ဖွဲ့ခေါင်းဆောင် ဗိုလ်ဒေါင်းမင်းက ပြောသည်။
ယနေ့ (မတ်လ ၃ဝရက်) နံနက် ၁၁နာရီကျော်က စဥ့်ကူးမြို့နယ် ပင်လယ်ကြီးဂိတ်ဘက်မှ မောင်းလာသော ခုနစ်စီးပါယာဥ်တန်းအား စဥ့်ကူးမြို့နယ် ခူလယ်ကျေးရွာ(ရွာထိပ်)တံတားအနီးတွင် ပဒေသာမိုင်း ၁၀လုံးဖြင့် မိုင်းဆွဲတိုက်ခိုက်ခဲ့ရာ စစ်ကောင်စီတပ်သား သုံးဦးသေဆုံးပြီး အများအပြားထိခိုက်ဒဏ်ရာရရှိကြောင်း စဥ့်ကူး(ပကဖ) လက်အောက်ခံ ဥဒေါင်းမင်းပြောက်ကျားတပ်ဖွဲ့ခေါင်းဆောင် ဗိုလ်ဒေါင်းမင်းက ပြောကြားသည်။
“ခုနစ်စီးပါယာဥ်တန်းကားဗျ။ ကင်းပုန်းချဖို့အင်အားသွားဖြည့်မယ့်ကားတွေကို ကြားဖြတ်မိုင်းဆွဲတိုက်ခိုက်ခဲ့တာပါ။ အင်အားစုစုပေါင်း ၁၀၀ နီးပါးလောက်ပါတယ်။ ခုနစ်စီးမှာ နောက်ဆုံး နှစ်စီးမိတယ်။ ကျွန်တော်တို့က ကားလာတာမသိဘူး။ သတင်းလည်းမရဘူး။ ကားက အပျောက်လာတာ။ ပွိုင့်နားရောက်ခါမှသတင်းရတာ။ ကျော်ကျော်ဆွဲဆွဲ ဆွဲလိုက်တဲ့အချိန်မှာ နှစ်စီးကျန်တဲ့အချိန်မိလိုက်တာ။”ဟု ဗိုလ်ဒေါင်းမင်းက ဆိုသည်။
မိုင်းဆွဲတိုက်ခိုက်ခံရပြီးနောက် စစ်ကောင်စီတပ်က အနီးရှိ ခူလယ်ကျေးရွာ ဝင်ရောက်ကာ နောက်တစ်ကြိမ်ထပ်ဖြစ်ပါက ရွာကိုမီးရှို့မည်ဟု ခြိမ်းခြောက်သွားကြောင်း ဒေသတွင်းသတင်းရင်းမြစ်က ပြောသည်။
Public Service Announcement
စဥ့်ကူး – ကျောက်မြောင်းလမ်းပိုင်းအား ပြည်သူများသတိပြုသွားလာကြရန်နှင့် စစ်ကောင်စီတပ်နှင့်ပျူ ယာဥ်များနှင့်ဝေးရာက မောင်းနှင်ကြလည်းရန်လည်း ဥဒေါင်းမင်းပြောက်ကျားတပ်ဖွဲ့က သတိပေးထားသည်။
