မြန်မာပိုင် ကိုကိုးကျွန်းပေါ်မှာ တရုတ်အကူအညီနဲ့ စစ်ဘက်ဆိုင်ရာအဆောက်အဦးတွေတိုးချဲ့ ဆောက်လုပ်နေတယ်ဆိုတဲ့သတင်းတွေကျယ်ကျယ်လောင်လောင်ထွက်နေချိန်မှာပဲ အာဏာသိမ်းစစ်ကောင်စီ ခေါင်းဆောင်ဟာ အဲဒီကျွန်းကို သွားရောက်နေပါတယ်။
စစ်ကောင်စီခေါင်းဆောင်ဟာ ကိုကိုးကျွန်း ကိုမနေ့က ရောက်ရှိလာတယ်လို့ စစ်ကောင်စီထိန်းချုပ်ထားတဲ့ သတင်းစာတွေက ဖော်ပြပါတယ်။
ခရီးစဉ်ကတော့ ကပ္ပလီပင်လယ်ပြင်နဲ့ဘင်္ဂလားပင်လယ်အော် ပင်လယ်နှစ်ခု ဆုံမှတ်တည်ရာ ကျောက်တိုင် စိုက်ထူ တဲ့အခမ်းအနားတက်ရောက်တာလို့ စစ်ကောင်စီဝါဒဖြန့်သတင်းစာတွေက ဆိုကြပါတယ်။
ပြီးခဲ့တဲ့ ရက်ပိုင်းတွေက အိန္ဒိယသတင်းတွေမှာ မြန်မာစစ်တပ်ဟာ ဘင်္ဂလားပင်လယ်အော်ထဲက မဟာဗျုဟာအရ အရေးပါတဲ့ ကိုကိုးကျွန်းပေါ်မှာ တရုတ်အကူအညီနဲ့ စစ်ဘက်ဆိုင်ရာအဆောက်အအုံတွေ တိုးချဲ့ ဆောက်လုပ်နေတယ်လို့ ဂြိုလ်တုဓာတ်ပုံတွေနဲ့ဖော်ပြကြတာတွေရှိလာပါတယ်။
Public Service Announcement
တရုတ်အကူအညီနဲ့ ကျွန်းပေါ်မှာလေယာဉ်ပြေးလမ်း တစ်ခုကိုပါ တိုးချဲ့ဆောက်လုပ်ထားတယ်ဆိုတာကို ဂြိုလ်တုဓာတ်ပုံတွေအရ အတည်ပြုနိုင်ခဲ့တယ်လို့ Bloomberg သတင်းဌာန ကလည်းဖော်ပြပါတယ်။
ဗြိတိန်က မူဝါဒရေးရာဌာနတစ်ခုဖြစ်တဲ့ Chatham House ကလည်း ဂြိုလ်တု ဓာတ်ပုံဆိုင်ရာကျွမ်းကျင်သူတွေရဲ့ သုံးသပ်ချက်အရ ကျွန်းပေါ်မှာ လေယာဉ် ရုံ အသစ် နှစ် ရုံ ၊ ပေ ၇,၅၀၀ ကျော်တဲ့ လေယာဉ်ပြေးလမ်း နဲ့ ရေဒါစခန်းအသစ် တို့ကိုတွေ့မြင်ရတယ်လို့ ထုတ်ပြန်ပါတယ်။
အိန္ဒိယဘက်ကလည်း ကိုကိုးကျွန်းပေါ်မှာ တရုတ်အကူအညီနဲ့မြန်မာစစ်တပ်ဟာ ထောက်လှမ်းရေး စခန်း တည်ဆောက်နေတယ်လို့ စွပ်စွဲပါတယ်။
စစ်ကောင်စီရဲ့ပြောရေးဆိုခွင့်ရှိသူကတော့ စွပ်စွဲချက်တွေဟာအခြေအမြစ်မရှိဘူးလို့ ပြန်လည်တုံ့ပြန်ထားပါတယ်။
ကိုကိုးကျွန်းဟာ ရန်ကုန်တိုင်းထဲမှာပါဝင်ပြီး ရန်ကုန်မြို့ကနေရေမိုင်၂၆၀ ခန့် ကွာဝေးကာ ကျွန်းဆီကို အရပ်သားတွေ လွတ်လပ်စွာခရီးသွားလာခွင့်မရှိပါဘူး။
