စစ်ကိုင်းတိုင်း၊ စစ်ကိုင်းနှင့် ဝက်လက်မြို့နယ်အစပ်ရှိ PDFတပ်ဖွဲ့နှင့် မြို့ပြပြောက်ကျားတပ်ဖွဲ့၏ ယာယီစခန်း စီးနင်းခံရပြီး လူထိခိုက်မှုမရှိသော်လည်း လက်နက်ခဲယမ်းနှင့်ရိက္ခာများ ဆုံးရှုံးခဲ့ရကြောင်း ပြင်ဦးလွင်ခရိုင် ပ.က.ဖ နဂါးနီပြောက်ကျားတပ်ဖွဲ့က သတင်းထုတ်ပြန်သည်။
ဧပြီ ၈ ရက် နံနက် ၁၀နာရီဝန်းကျင်က ပြင်ဦးလွင်ခရိုင် ပ.က.ဖ နဂါးနီပြောက်ကျားတပ်ဖွဲ့နှင့် ညီနောင်မဟာမိတ် MDY- UG မြို့ပြပြောက်ကျားတပ်ဖွဲ့များ၏ ယာယီစခန်းတည်နေရာသို့ တံတားဦးလေတပ်မှ Mi-35နှစ်စီးဖြင့် နာရီဝက်ကြာ ပစ်ခတ်ပြီးနောက် ရဟတ်ယာဉ်ပေါ်မှ စစ်ကောင်စီတပ်သားများ မြေပြင်သို့ ချ၍ လာရောက်တိုက်ခိုက်ခဲ့ကြောင်း နဂါးနီပြောက်ကျားတပ်ဖွဲ့က ပြောသည်။
ပြင်ဦးလွင်ခရိုင် ပ.က.ဖနဂါးနီတပ်ဖွဲ့နှင့် MDY-UGရဲဘော်အချို့ ထိခိုက်ဒဏ်ရာများရရှိခဲ့ရပြီး တည်နေရာမှ စွန့်ခွာထွက်ပြေးရစဉ် မုံရွာ(နမခ)လေတပ်မှ ရဟတ်ယာဉ် နှစ်စီးဖြင့် ဆေးခန်းနှင့် စာသင်ကျောင်းများသို့ ထပ်မံ၍ လာရောက်ပစ်ခတ်တိုက်ခိုက်ခဲ့သည်ဟု ဆိုသည်။
ပြည်သူအချို့နှင့် ဆေးရုံ၊ ဆေးခန်း၊ စာသင်ကျောင်းနှင့် ပြည်သူများ၏နေအိမ်များ ပျက်စီးဆုံးရှုံးခဲ့ကြောင်း နဂါးနီပြောက်ကျားတပ်ဖွဲ့က ပြောသည်။
Public Service Announcement
နဂါးနီတပ်ဖွဲ့နှင့်အတူ မြို့ပြ MDY-UGများ၏ လက်နက်ခဲယမ်း၊ စားနပ်ရိက္ခာ ၊ ဆိုင်ကယ်၊ ဆေးပစ္စည်း၊ ယူနီဖောင်းနှင့်အသုံးအဆောင် ပစ္စည်းအမြောက်အများ ဆုံးရှုံးလိုက်ရပြီးရဲဘော်အချို့ ထိခိုက်ဒဏ်ရာရရှိခဲ့ကြောင်း နဂါးနီပြောက်ကျားတပ်ဖွဲ့က ပြောသည်။
“နေရာအတိအကျကို ရဟတ်ယာဥ်နှစ်စီးနဲ့ လာရောက်ပစ်ခတ်သွားတာပါ။ သူတို့က ရဟတ်ယာဥ်နဲ့ပစ်ပြီး လူချတဲ့အချိန်မှာ ကျွန်တော်တို့ဘက်က ချက်ချင်းကြီးတိုက်ခိုက်မှု မလုပ်နိုင်ဘူး။ အဲဒီအချိန်မှာ တည်နေရာတွေကို ဝင်စီးသွားတယ်။ လက်နက်ခဲယမ်းတွေကို သိမ်းတယ်။ ရဲဘော်တွေ အထိအခိုက်တော့ရှိတယ်။ အသက်အန္တရာယ်တော့မစိုးရိမ်ရဘူး။”ဟု နဂါးနီပြောက်ကျားတပ်ဖွဲ့သတင်းနှင့်ပြန်ကြားရေးတာဝန်ခံက ပြောသည်။
စခန်းစီးနင်းခံရခြင်းနှင့်ပတ်သက်၍ စခန်းအား ခိုလှုံခဲ့ဖူးသည့် မြို့ပြပြောက်ကျားရဲဘော်အချို့ မြို့ပြတွင် ဖမ်းဆီးခံလိုက်ရ၍ သတင်းရရှိသွားခြင်းဖြစ်နိုင်ကြောင်း မှတ်ချက်ပြုသည်။
ယင်းနေ့ မွန်းလွဲ ၂နာရီခန့်တွင် အဆိုပါစစ်ကောင်စီတပ်အား ဒေသတွင်း PDFအဖွဲ့များပူးပေါင်း၍ ဝိုင်းဝန်းပိတ်ဆို့တိုက်ခိုက်ခဲ့ရာ စစ်အုပ်စုအထိအခိုက်များ၍ ညနေတွင် မုံရွာအနောက်မြောက်တိုင်းစစ်ဌာနချုပ်(နမခ)မှ Mi-35 ဖြင့် လာရောက်ပစ်ခတ်ခဲ့ကြောင်း နဂါးနီပြောက်ကျားတပ်ဖွဲ့သတင်းနှင့်ပြန်ကြားရေးတာဝန်ခံက ပြောသည်။
စစ်ကောင်စီဘက်က အများအပြားထိခိုက်သေဆုံး၍ ဧပြီ ၉ ရက် နံနက် ၂ နာရီခန့်တွင် ရေကြောင်းမှတဆင့် အလောင်းများ ပြန်လည်သယ်ယူ၍ ဆုတ်ခွာသွားကြောင်း ဒေသကာကွယ်ရေးအဖွဲ့များက ပြောသည်။
စစ်ကောင်စီတပ်သည် စစ်ကိုင်းမြို့နယ်ရှိ တလိုင်းကျေးရွာကိုပါ ရဟတ်ယာဥ်နှစ်စီးဖြင့် ဝင်ရောက်ပစ်ခတ်ပြီး နေအိမ် ၁၀လုံး၊ ကျေးလတ်ဆေးပေးခန်း၊ ထရန်စဖော်မာနှင့် သုံးဘီးယာဥ်များအား မီးရှို့ဖျက်ဆီးသွားခဲ့ကြောင်း ဒေသခံများက ပြောသည်။
