သင်္ကြန်အကြတ်နေ့မှာ ရန်ကုန်မြို့ရဲ့နေရာတော်တော်များများမှာ ရှင်းလင်းနေသော်လည်း မဏ္ဍပ်ကြီးတွေမှာတော့ ရေကစားသူအချို့ကို တွေ့ရရပါတယ်။
မဏ္ဍပ်အသေးတွေမှာတော့ ရေကစားသူတချို့ကိုသာတွေ့ရပြီး ပြည်သူ့ရင်ပြင်နဲ့မြို့တော်ခန်းမရှေ့ကမဏ္ဍပ်တွေမှာတော့ ရေကစားသူတွေကိုတွေ့ရပါတယ်။
ပြည်သူ့ရင်ပြင်ရဲ့ ဝင်ပေါက်မှာ စစ်ဆေးရေးတင်းတင်းကျပ်ကျပ်လုပ်ဆောင်တာကြောင့် တန်းစီဝင်နေရတာကို မြင်ခဲ့ရပါတယ်။
မြို့တော်ခန်းမရှေ့မှာလည်း ဝင်ဖို့သတ်မှတ်ထားတဲ့ဘက်မှာ စစ်ဆေးရေးများပြီး တန်းစီဝင်နေရတာကိုတွေ့ရပါတယ်။
Public Service Announcement
ကားတွေလည်း ပါဝင်တာကြောင့် ဝင်မယ့်အပေါက်မှာ ပိတ်နေပြီး ပန်းဆိုးတန်းလမ်းပေါ်မှာ ယာဉ်ကြောပိတ်ဆို့မှုဖြစ်ခဲ့ပါတယ်။
တခြားနေရာတွေမှာတော့ မဏ္ဍပ်တွေရှိပေမယ့် စည်စည်ကားကားမတွေ့ရသလို ဆိုင်တော်တော်များများလည်း ပိတ်ထားတာကြောင့် ပုံမှန်လူစည်လေ့ရှိတဲ့ လှည်းတန်းတောင် ခြောက်ကပ်ကပ်ဖြစ်နေပါတယ်။
တချို့ရပ်ကွက်တွေမှာတော့ ကလေးတွေ ရေပက်ကစားနေတာတွေလည်းရှိပါတယ်။
အာဏာသိမ်းဖြစ်စဉ်မတိုင်မီသင်္ကြန်တွေနဲ့ယှဉ်ရင်တော့ လူအနည်းငယ်သာ စစ်ကောင်စီသင်္ကြန်မှာပါဝင်တယ်ဆိုရမှာပါ။
စစ်ကောင်စီက တစ်နိုင်ငံလုံးအတိုင်းအတာနဲ့ မီးရှို့ လူသတ် အကြမ်းဖက်မှုတွေပြုလုပ်နေပေမယ့် မြို့ကြီးတွေမှာတော့ သင်္ကြန်ကိုစည်ကားအောင်နည်းမျိုးစုံနဲ့ ကြိုးစားနေတာပါ။
ဝန်ထမ်းတွေကိုလည်း သင်္ကြန်မဏ္ဍပ်တွေကို မဖြစ်မ နေလာရောက်ရေကစားဖို့ စာထုတ်ထားတယ်လို့လည်းသိရပါတယ်။
တော်လှန်ရေးအင်အားစုတွေကတော့ ပြည်သူတွေကို စစ်ကောင်စီသင်္ကြန်မှာ မပါဝင်ကြဖို့ တောင်းဆိုထားပါတယ်။
ရန်ကုန်မြို့မှာရှိတဲ့ မဏ္ဍပ်တစ်ချို့ကို သင်္ကြန်မတိုင်မီက ဖောက်ခွဲတိုက်ခိုက်မှုတွေရှိပေမယ့် သင်္ကြန်ကာလမှာတော့ သတင်းမကြားရသေးပါဘူး။
ပြည်သူအများစုကတော့ ယခင်နှစ်တွေအတိုင်း တော်လှန်သင်္ကြန်မှာ ပါဝင်နေကြဆဲပါ။
