ကချင်ပြည်နယ် ဖားကန့်မြို့နယ် ဆိုင်းဘရာကျေးရွာမှ ကလေးငယ်များ၊သက်ကြီးရွယ်အိုများ နှင့် မသန်စွမ်းအချို့အပါအဝင် အရပ်သား ၃၀၀ကျော်ကို လူသားတံတိုင်းအဖြစ် စစ်ကောင်စီတပ်စစ်ကြောင်းက ဖမ်းဆီးခေါ်ဆောင်လာကာ ဖားကန့်မြို့ဘက်သို့ ထွက်ခွာလာနေကြောင်း ဒေသခံများက ပြောသည်။
မိုးကောင်း – ဖားကန့်လမ်းပိုင်းရှိ ဆိုင်းဘရာကျေးရွာမှ အရပ်သားများကို ဖမ်းဆီးခေါ်ဆောင်လာသော စစ်ကောင်စီစစ်ကြောင်းသည် ယနေ့(ဧပြီ ၁၈ရက်) နံနက်တွင် နမ့်ယမ်းကျေးရွာ( ဖားကန့်မြို့နယ် လုံးခင်းကျေးရွာ မရောက်ခင်ကျေးရွာ) အနီးသို့ ရောက်ရှိလာသည်ဟု ဖားကန့်မြို့နယ်ပြည်သူ့ကာကွယ်ရေးတပ်ဖွဲ့ထောက်ပို့ ရဲဘော်တစ်ဦးက ပြောသည်။
“ဆိုင်းဘရာရွာက မသန်းစွမ်းသူတွေရော ဘွားတော် ဘိုးတော်တွေရော အကုန်လုံးကို ဆွဲလာတာ။ ဒုက္ခပဲဗျာ။ အခု တံတားညီနောင်( နမ့်ယမ်းနှင့် လုံးခင်းကြား) ရောက်နေပြီ” ဟု ၎င်းကပြောသည်။
တံတားညီနောင်သည် စစ်ကောင်စီတပ်ကို ကချင်လွတ်မြောက်ရေးတပ်မတော်(KIA)u မကြာခဏတိုက်ခိုက်နေသည့်နေရာဖြစ်ပြီး ယနေ့နံနက်တွင်လည်း စစ်ရေးတင်းမာနေသည်ဟု အထက်ပါ ထောက်ပို့ရဲဘော်က ပြောသည်။
Public Service Announcement
“သူတို့ တိုက်ခိုက်ခံရမှာစိုးလို့ အရပ်သားတွေကို ဓားစာခံအနေနဲ့ ဖမ်းခေါ်လာတာ ။ ဒါက ယုတ်မာတာပါ။ တိုက်ပွဲဖြစ်နေပြီလို့လည်း ကြားတယ်”ဟု လုံးခင်းဒေသခံတစ်ဦးက ပြောသည်။
တံတားညီနောင်နေရာတွင် ယနေ့နံနက် တိုက်ပွဲဖြစ်နေပြီဟု People’s Springထံ ဖားကန့်ဒေသခံသုံးဦးက အတည်ပြုသည်။ အသေးစိတ်ကို အတည်ပြုရန် ကြိုးစားနေဆဲဖြစ်သည်။
ယမန်နေ့ကလည်း ဖားကန့်မြို့နယ် ဆည်ဆင်းကျေးရွာရှိ စစ်ကောင်စီနှင့် စစ်ကောင်စီလက်အောက်ခံ ရှမ်းနီတပ်ဖွဲ့(SNA) ပူးပေါင်းစခန်း သုံးခုကို KIA နှင့်PDF ပူးပေါင်းတပ်ဖွဲ့က တိုက်ခိုက်သိမ်းပိုက်ခဲ့သည်။ ထို့ကြောင့် စစ်ကောင်စီက ဖားကန့်ဒေသကို အင်အားတိုးမြှင့်နေခြင်းဟု ဒေသခံတော်လှန်ရေးအင်အားစုများက ပြောသည်။
