စစ်ကိုင်းတိုင်း၊ ဖောင်းပြင်မြို့နယ်တွင် စစ်ကောင်စီလက်အောက်ခံ ပျူစောထီးစခန်းနှစ်ခုကို ပြည်သူ့ကာကွယ်ရေးမဟာမိတ်တပ်ဖွဲ့က နှစ်ရက်ဆက်တိုက်ခိုက်ခဲ့ကြောင်း ဒေသခံနှင့် တော်လှန်ရေးအင်အားစုများကပြောသည်။
အဆိုပါတိုက်ခိုက်မှုတွင်ပျူစောထီး (၇) ဦးထက်မနည်းသေပြီး စစ်ကောင်စီကလေကြောင်းမှလာရောက်ပစ်ခတ်ခဲ့ကြောင်းသိရသည်။
ဖောင်းပြင်မြို့နယ် ၊ဆယ်ချောင်းရွာရှိ ပျူစောထီး စခန်းကို မြို့နယ်ပြည်သူ့ကာကွယ်ရေးတပ်ဖွဲ့အပါအဝင် ပူးပေါင်းမဟာမိတ်များက ယမန်နေ့(ဧပြီ ၂၈ရက် )နံနက်အစောပိုင်းတွင် တိုက်ခိုက်ခဲ့ခြင်းဖြစ်ကြောင်း ဒေသခံတော်လှန်ရေးအင်အားစုများကပြောသည်။တိုက်ပွဲတွင် ပျူစောထီး ခုနှစ် ဦးထက်မနည်းသေဆုံးပြီး သေနတ် ငါးလက် သိမ်းဆည်းနိုင်ခဲ့ကြောင်း ပြည်သူ့ကာကွယ်ရေးရဲဘော်တစ်ဦးကပြောသည်။
ပျူစောထီးများသေဆုံးမှု အခြေအနေကို People’s Spring ကသီးခြားအတည်မပြုနိုင်ပါ ။
Public Service Announcement
ထို့အပြင်ယနေ့( ဧပြီလ ၂၉ ရက်)နံနက်၅နာရီခန့်တွင်လည်းဟုမ္မလင်းနှင့်ဖောင်းပြင်နယ်စပ်ရှိ ပျူစောထီးများ တပ်စွဲထားသော စခန်းတစ်ခုကို ပြည်သူ့ကာကွယ်ရေးမဟာမိတ်တပ်ဖွဲ့ကထပ်မံ တိုက်ခိုက်ခဲ့ကြောင်းဒေသခံအချို့ကပြောသည်။
“မြေပြင်တိုက်ပွဲပြင်းထန်တယ်။မနက် ၈နာရီ ၇ မိနစ်မှာ တံတားဦးလေဆိပ်ကနေ ဂျက်ဖိုက်တာတက်ပြီး ၈ နာရီ ၂၇ မိနစ်မှာ ဖောင်းပြင်မြစ်ကမ်းဘေးကို ဗုံးကြဲသွားတယ်”ဟု ဖောင်းပြင်မြို့မှ ပြည်သူ့ကာကွယ်ရေးတပ်ဖွဲ့ဝင်တစ်ဦးကပြောသည်။ ယနေ့တိုက်ပွဲအခြေအနေအသေးစိတ်ကိုမူမသိရသေးပေ။
