ဟားခါးဆေးရုံရောက် ဒဏ်ရာရ စစ်ကောင်စီတပ်ဖွဲ့ဝင်များ မင်းအောင်လှိုင်ကို ဆဲဆိုညည်းတွားနေဟုဆို
ဟားခါးဆေးရုံရောက် ဒဏ်ရာရ စစ်ကောင်စီတပ်ဖွဲ့ဝင်များ မင်းအောင်လှိုင်ကို ဆဲဆိုညည်းတွားနေဟုဆိုကလေးမြို့မှ ဟားခါးမြို့ စစ်ဗျူဟာသို့ လက်နက်ခဲယမ်းအင်အားလာပို့သည့် သံချပ်ကာယာဉ် နှစ်စီးအပါအဝင် ယာဉ်အစီး ၃၀ခန့်ပါ ထောက်ပို့ ယာဉ်တန်းတစ်ခုလုံးကို ချင်းပူးပေါင်းတပ်ဖွဲ့ တိုက်ခိုက်ဖျက်ဆီးခဲ့ရာ ယင်းအနက် သံချပ်ကာယာဉ် နှစ်စီးကို ပြန်လည်ယူဆောင်ရန် စစ်ကောင်စီတပ်က ကြိုးပမ်းနေကြောင်း ချင်းအမျိုးသားတပ်မတော်(CNA) ပြောရေးဆိုခွင့်ရှိသူ ဆလိုင်းထက်နီက ပြောသည်။
ထို့ကြောင့် သံချပ်ကာယာဉ် နှစ်စီးကို ဖျက်ဆီးထားသည့် ဟားခါးမြို့နယ် ချွန်ကျုံးရွာ၌ ချင်းတပ်ဖွဲ့နှင့် စစ်ကောင်စီတပ်တို့ တိုက်ပွဲဆက်လက်ဖြစ်ပွားခဲ့ပြီး ဧပြီ ၃၀ရက်တိုက်ပွဲတွင် စစ်ကောင်စီတပ်ထံမှ လက်နက် ၃လက်ရရှိခဲ့သည်ဟုဆိုသည်။
“ကျနော်တို့ ဖျက်ဆီးထားတဲ့ တင့်ကား ၂စီးကို ပြန်ယူဖို့ တွန်းနေတဲ့အနေအထားမျိုးမှာရှိတယ်။ တိုက်ပွဲကလည်း ဆက်ရှိနေတယ်။ တင့်ကားကိုတော့ ဆက်ပြီးတော့ မယူနိုင်အောင်တားထားတယ်။ ဆက်လက်ပြီးတော့ ဖျက်ဆီးလိုက်တယ်။ ဒါပေမဲ့ အထဲမှာ ဘယ်လောက်ပျက်စီးသလဲဆိုတာတော့ ကျနော်တို့ မသိဘူး”ဟု ဆလိုင်းထက်နီက ပြောသည်။
တစ်ဖက်တွင်လည်း ဟားခါးမြို့သို့ လာသည့် စစ်ယာဉ်တန်းကို တိုက်ခိုက်စဉ် ခြေပြတ်၊ လက်ပြတ် စသည်ဖြင့် ထိခိုက်ဒဏ်ရာရသည့် စစ်ကောင်စီတပ်ဖွဲ့ဝင်များ ဟားခါးဆေးရုံ၌ ကုသမှုခံယူနေပြီး စစ်ခေါင်းဆောင်မင်းအောင်လှိုင်ကို ဆဲဆိုနေကြသည်ဟု ဆလိုင်းထက်နီက ပြောပြသည်။
Public Service Announcement
မင်းအောင်လှိုင်ကြောင့် ဒုက္ခိတဘ၀ ရောက်ရသည့်အပေါ် ဒဏ်ရာရ စစ်သည်များက ညည်းတွားနေကြခြင်းဖြစ်သည်ဟု ဆိုသည်။
“အဲဒီလိုမျိုးညည်းတွားနေကြတယ်။ သူတို့ လူဖြစ်ရကျိုးမနပ်တော့ဘူး အဲဒါမင်းအောင်လှိုင်ကြောင့် မင်းအောင်လှိုင်ကို ဆဲနေတာ။ အဲဒါလူသားအချင်းချင်းကျနော်တို့ဘက်က စာနာတယ်။ ဒါပေမဲ့ မတက်နိုင်ဘူး”ဟု ဆလိုင်းထက်နီက ပြောသည်။
စစ်ခေါင်းဆောင်များအတွက် အလုပ်မလုပ်ကြရန်၊ ကျန်သည့် စစ်ကောင်စီတပ်ဖွဲ့ဝင်များအနေဖြင့်လည်း ပြည်သူ့ရင်ခွင်ခိုလှုံကြရန် ဆလိုင်းထက်နီက တိုက်တွန်းသည်။
