စစ်ကောင်စီ၏ မြန်မာ ယူ-၂၂ ဘောလုံးအသင်းသည် ယနေ့ (မေလ ၄) ညနေပိုင်းက အရှေ့တောင်အာရှဆီးဂိမ်းပြိုင်ပွဲအဖြစ် အင်ဒိုနီးရှားအသင်းနှင့် ယှဥ်ပြိုင်ရာ ၅ ဂိုး ဂိုးမရှိဖြင့် ဂိုးပြတ်ရှုံးနိမ့်ခဲ့သည်။
ယင်းပွဲတွင် မြန်မာ ယူ-၂၂ အသင်းကို ဂျာမနီလူမျိုး နည်းပြသစ် မိုက်ကယ် ဖိုက်တန်ဘန်နာက ဦးဆောင်ခဲ့ပြီး မလေးရှားလိဂ်တွင် ကစားနေသည့် တောင်ပံကစားသမား ဟိန်းထက်အောင် ပါဝင်ခဲ့သည်။
သို့သော် မြန်မာအသင်းအနေဖြင့် အင်ဒိုနီးရှားအသင်းကို ခြေစွမ်းပိုင်း ယှဥ်ကစားနိုင်ခြင်း မရှိဘဲ ပထမပိုင်းတွင် နှစ်ဂိုး ၊ ဒုတိယပိုင်းတွင် သုံးဂိုး ပေးခဲ့ရကာ ပွဲအပြီး၌ ၅ ဂိုးပြတ်ဖြင့် အရှက်တကွဲ ရှုံးနိမ့်ခဲ့ရသည်။
မြန်မာအသင်းသည် ယခုနှစ် ဆီးဂိမ်းပြိုင်ပွဲ အုပ်စုအဖွင့်ပွဲတွင် တီမောအသင်းကို ၁-၀ ဂိုးဖြင့် အနိုင်ရခဲ့သော်လည်း ဒုတိယမြောက်ပွဲတွင် အင်ဒိုနီးရှားအသင်းကို ၅ ဂိုးပြတ်ဖြင့် ရှုံးနိမ့်ခဲ့သည့်အတွက် ရမှတ် ၃မှတ်ဖြင့် အုပ်စုတွင်း တတိယနေရာ၌ ရပ်တည်နေသည်။
Public Service Announcement
မြန်မာအသင်း အနေဖြင့် ဆီးဂိမ်းပြိုင်ပွဲ အုပ်စုလက်ကျန်ပွဲစဥ်များအဖြစ် အိမ်ရှင် ကမ္ဘောဒီးယား၊ ဖိလစ်ပိုင်အသင်းတို့နှင့် ဆက်လက်ယှဥ်ပြိုင်ရမည် ဖြစ်သည်။
စစ်တပ်အာဏာသိမ်းခံရပြီးနောက်ပိုင်းတွင် လက်ရွေးစင်ဘောလုံးအသင်း အပါအဝင် သက်တမ်းအလိုက် ဘောလုံးအသင်းတို့သည် နိုင်ငံတကာပြိုင်ပွဲများတွင် ရှုံးပွဲများ ဆက်တိုက်ဆိုသလို ကြုံတွေ့နေရကာ ပရိသတ်များ၏ လှောင်ပြောင်ရှုတ်ချခြင်းကိုလည်း ခံနေရသည်။
