မကွေးတိုင်း ထီးလင်းမြို့နယ်ရှိ အောင်းမြောက်ကျေးရွာဘက် စစ်ကြောင်းထိုးလာသော စစ်ကောင်စီတပ်ကို ဂန့်ဂေါခရိုင် PDF တပ်ရင်းများပူးပေါင်းပြီး အနီးကပ် ပစ်ခတ်တိုက်ခိုက်ခဲ့ကြောင်း ဂန့်ဂေါခရိုင်တပ်ရင်း(၁၅/၁၆/၁၇)YRA-ထီးလင်းမှ တာ၀န်ရှိသူတစ်ဦးက ပြောသည်။
ကျောက်ထုမှထွက်လာသော အင်အား ၇၀ခန့်ပါ စစ်ကြောင်းနှင့် ရွှေအောင်သာအထိုင်တပ်မှ ထွက်လာသော အင်အား ၆၀ခန့်ပါ ပူးပေါင်းစစ်ကြောင်းကို YRA-ထီးလင်းနှင့် ဂန့်ဂေါခရိုင် တပ် ရင်း ၁၈-YNRF ပူးပေါင်းတပ်မှ မေလ ၄ ရက်နံနက် ၈ နာရီခန့်တွင် အောင်းမြောက်ကျေးရွာအနီး၌ အနီးကပ်တိုက်ခိုက်ခဲ့ခြင်း ဖြစ်သည်။
အဆိုပါတိုက်ခိုက်မှုတွင် စစ်ကောင်စီတပ်မှ ခုနစ်ဦးခန့်သေဆုံးပြီး အများအပြားဒဏ်ရာရခဲ့ရာ ဂျက်ဖိုက်တာတစ်စင်းဖြင့် စစ်ကူပေးရန် ရောက်ရှိလာသောကြောင့် တပ်ပြန်ဆုတ်ခဲ့ရသည်ဟု YRA-ထီးလင်းက ပြောသည်။
အထက်ပါတိုက်ပွဲတွင် တိုက်ပွဲကြာချိန် မိနစ် ၂၀ ခန့်ကြာမြင့်ခဲ့ပြီး ရှေ့တန်းရဲဘော်များဆုတ်ခွာချိန်တွင် လက်နက်ကြီး (၇)ချက်ကာ ပစ်ပေးခဲ့ရာ ထိချက်ကောင်းပြီး စစ်ကောင်စီတပ်သားစုဝေးရာအတွင်း ကျရောက်ပေါက်ကွဲခဲ့သောကြောင့် ယခုထက်ပို၍ ထိခိုက်သေဆုံးများနိုင်ကြောင်း YRA-ထီးလင်းက အသိပေးသည်။
Public Service Announcement
“ ထိခိုက်သေဆုံး နောက်တိုးရှိနိုင်တယ်ဗျ။ အဲ့ဒီနားမှာ တိုက်ပွဲဖြစ်ရင် လက်နက်ကြီးပစ်ရတာ ကံကိုကောင်းတတ်တာဗျ။ အရင်ကလည်း ချက်ကောင်းမိတာတွေနှစ်ခါသုံးခါဖြစ်ဖူးတယ်” ဟု YRA-ထီးလင်းမှ တာ၀န်ရှိသူတစ်ဦးက People’s Spring သို့ ပြောသည်။
PDF ပူးပေါင်းတပ်များ၏ အနီးကပ်တိုက်ခိုက်ခြင်းကိုခံထားရသော စစ်ကောင်စီတပ်စစ်ကြောင်းသည် လက်ရှိတွင် ထီးလင်းနယ် အကြည်ဘန်းကျေးရွာသို့ ၀င်ရောက်နေပြီး ထိတွေ့တိုက်ပွဲများ အချိန်မရွေးထပ်ဖြစ်လာနိုင်ကြောင်း ဂန့်ဂောခရိုင် PDF တပ်ရင်းများက အသိပေးထားသည်။
