စစ်ကိုင်းတိုင်း၊ ခင်ဦးမြို့နယ်တွင် ကင်းပတ်လာသည့်စစ်ကောင်စီတပ်သားနှစ်ဦးအား ပစ်ခတ်ရှင်းလင်းနိုင်ခဲ့ပြီး သေနတ်နှစ်လက် သိမ်းဆည်းနိုင်ခဲ့ကြောင်း ခင်ဦးပကဖအဖွဲ့က သတင်းထုတ်ပြန်သည်။
ယနေ့ (မေလ ၁၀ ရက်နေ့) မွန်းလွဲ ၁၂ နာရီ မိနစ် ၄၀ ခန့်က ခင်ဦးမြို့နယ် မူးတိမ်ချောင်းတံတား တပ်စွဲထားသော စစ်ကောင်စီတပ်မှ စစ်သား၂ဦးသည် ခင်ဦး-ရေးဦး ကားလမ်းပေါ်သို့ ရောက်ရှိလာစဉ် ဒေသတွင်းတော်လှန်ရေးရဲဘော်များနှင့် ထိပ်တိုက်တွေ့ကာ ထိတွေ့မှု ဖြစ်ပွားခဲ့ကြောင်း ခင်ဦးပကဖအဖွဲ့က အသိပေးသည်။
တိုက်ပွဲချိန် (၃)မိနစ်ခန့် ကြာမြင့်ခဲ့ပြီး စစ်သားနှစ်ဦးလုံးကို အသေပစ်ခတ်နိုင်ခဲ့ကာ ၎င်းတို့ကိုင်ဆောင်လာသော MA 1- ၁လက်၊ AK 47-၁လက်၊ 5.56 ကျည်-၁၅တောင့်၊ ကျည်ဘောက် (၃)ဘောက်စသည့် ပစ္စည်းများအားသိမ်းဆည်းနိုင်ခဲ့ကြောင်း ခင်ဦးပကဖအဖွဲ့ကဆိုသည်။
“ခုနောက်ပိုင်းကာကွယ်ရေးအဖွဲ့တွေက စခန်းသိမ်းတာတွေများလာတော့ သူတို့တပ်စွဲရာကင်းစခန်းအနီးမှာ ကင်းပုန်းဝပ်ကြတာနဲ့တူတယ်။ သူတို့ကရေဦး-ခင်ဦးကားလမ်းပေါ်တက်လာတာ။ အဲဒီအချိန်မှာ မြို့နယ်ပကဖတွေနဲ့ Local မဟာမိတ်တွေပေါင်းပြီး တိုက်ပွဲဖြစ်ကြတာ။ ၃ မိနစ်လောက်ကြာတယ်။ အဲနှစ်ကောင်အလောင်းက ခုချိန်ထိလာမကောက်သေးဘူး။”ဟု ခင်ဦးမြို့နယ်သတင်းမှန်ပြန်ကြားရေး အဖွဲ့ဝင်တစ်ဦးက ပြောသည်။
Public Service Announcement
ထိုစစ်ဆင်ရေးကို ခင်ဦးမြို့နယ် ပြည်သူ့ကာကွယ်ရေးအဖွဲ့ (မြို့နယ် ပကဖ)၊ နယ်မြေခံ ကာကွယ်ရေးအဖွဲ့ (LDF)များမှရဲဘော်များ ပူးပေါင်းတိုက်ခိုက်ခဲ့သည်ဟု သိရသည်။
ခင်ဦးမြို့ပေါ်တွင် ပြီးခဲ့သည့် ဖေဖော်ဝါရီလ ၃ ရက်နေ့ကလည်း နယ်ထိန်းခေါင်းဆောင်တစ်ဦးအား ပစ်ခတ်ရှင်းလင်းပြီး G3 လက်နက်တစ်လတ် သိမ်းဆည်းရမိခဲ့သေးသည်။
