စခန်းသိမ်းတိုက်ပွဲဆင်နွှဲရာ ရဟတ်ယာဥ်ဖြင့်လာပစ်၍ ဆုတ်ခွာခဲ့ရဟုဆို
စစ်ကိုင်းတိုင်း၊ စစ်ကိုင်းမြို့နယ်ရှိ ပဒူတိုက်နယ်ရဲစခန်းကို စခန်းသိမ်းတိုက်ပွဲဆင်နွှဲရာ စစ်ကောင်စီက ရဟတ်ယာဥ်ဖြင့် လာရောက်ပစ်ခတ်ခဲ့၍ ဆုတ်ခွာခဲ့ရကြောင်း ဒေသတွင်းတော်လှန်ရေးအင်အားစုများက ပြောသည်။
ယမန်နေ့ (မေလ ၂၂ရက်)က စစ်ကိုင်းမြို့နယ်ရှိ ပဒူတိုက်နယ်ရဲစခန်းကို စခန်းသိမ်းတိုက်ပွဲဆင်နွှဲခဲ့ကြောင်း၊ သို့သော် စခန်းအား သိမ်းပိုက်ရန်ကြိုးစားတိုက်နေစဥ် စစ်ကောင်စီတပ်က ရဟတ်ယာဥ်ဖြင့် အကြိမ်ကြိမ်လာရောက်ပစ်ခတ်ခဲ့၍ ပြန်လည်ဆုတ်ခွာခဲ့ကြောင်း 96 Soldiers-PDF အဖွဲ့က အသိပေးသည်။
“ပဒူ ရဲစခန်းပေါက်ထိ ကပ်ရောက်နိုင်ခဲ့တယ်။ မနက် ကိုးနာရီခွဲကစပြီး နှစ်ဖက်ပစ်ခတ်တိုက်ခိုက်တယ်။ နေ့ခင်း ၁၂ လောက်မှာ ပုဇင်း(လေယာဥ်)နဲ့ ပထမတစ်ကြိမ် လေးခါပစ်တယ်။ ဒုတိယတကြိမ် သုံးခါပစ်တယ်။ လေယာဥ်နဲ့လာပစ်လို့ ပြန်ဆုတ်ခဲ့တာပါ။”ဟု တိုက်နယ်စွန် PDF အဖွဲ့တာဝန်ခံက ပြောသည်။
တိုက်ပွဲအတွင်း နှစ်ဖက်ထိခိုက်မှုများရှိပြီး စစ်ကောင်စီတပ်က ပဒူရွာကို လေကြောင်းတိုက်ခိုက်ပြီးနောက် မီးရှို့ဖျက်ဆီးရာ ညပိုင်းအထိ လောင်ကျွမ်းခဲ့သည်။
Public Service Announcement
ပဒူရဲစခန်းတိုက်ခိုက်မှုကို 96 Soldiers-PDF နှင့် နယ်မြေခံ ပကဖများ၊ တပ်ရင်းတပ်ဖွဲ့များစုပေါင်း၍ ပူးပေါင်းတိုက်ခိုက်ခဲ့ကြောင်း အသိပေးထားသည်။
“အစတုန်းကတော့ ပဒူစခန်းကကောင်တွေက ကျွန်တော်တို့ကဖြစ်ရင်တောင် ပြည်သူဘက်ကလိုက်မှာဆိုပြီး ပြည်သူနဲ့သင့်တင့်အောင်နေတာ။ တကယ်လည်းဖြစ်ရော သူတို့ဘက်က(စစ်ကောင်စီဘက်က)ပဲ ဝင်ပစ်သွားတယ်ပြောတယ်။ အခုထိလည်း ရွာထဲမှာရှိနေတုန်းပဲ။ ရွာလည်းတော်တော်ကုန်လောက်ပါပြီ။ပဒူမှာ တပ်ချမယ်လည်းကြားတယ်။”ဟု ဒေသခံတစ်ဦးက ပြောသည်။
စစ်ကောင်စီတပ်သည် မေလ ၁၉ ရက် နံနက်ပိုင်းကစတင်ကာ ပဒူရွာသို့ ထိုးစစ်ဆင်ခဲ့ပြီး ဒေသတွင်းပြည်သူ့ကာကွယ်ရေးပူးပေါင်းတပ်ဖွဲ့များနှင့် ပဒူ၊ ကန်ကြီးကုန်း၊ဆည်လေးကျေးရွာတဝိုက်တွင် တိုက်ပွဲများ ဆက်တိုက်ဖြစ်ပွားခဲ့သည်။
အဆိုပါ တိုက်ပွဲများကြောင့် စစ်ကိုင်းနယ်ရှိ ကျေးရွာ (၈)ရွာထက်မနည်း ထွက်ပြေးတိမ်းရှောင်နေရပြီး စစ်ဘေးရှောင်များ၏ ယာဉ်တိမ်းမှောက်၍ အမျိုးသမီးတစ်ဦးသေဆုံးကာ ကလေးငယ်တစ်ဦးလည်း အုတ်တံတိုင်းပိသေဆုံးခဲ့သည်။
ထို့အပြင် ပြည်သူ့ကာကွယ်ရေးတပ် စခန်းတစ်ခုလည်း မီးရှို့ဖျက်ဆီးခံခဲ့ရပြီး စစ်အုပ်စုထောင်ထားသော မိုင်းနင်းမိ၍ ပြည်သူ့ကာကွယ်ရေးရဲဘော် လေးဦး ကျဆုံးခဲ့ကြောင်း၊စစ်အုပ်စုဘက်ကလည်း အထိနာခဲ့ကြောင်း ကျောက်ဆည် K.S PDF အဖွဲ့က အသိပေးသည်။
