ပြည်သူကိုပစ်မှတ်ထား လက်နက်ကြီးပစ်ခတ်မှုများ ဆက်လုပ်ပါက ထပ်မံလက်တုံ့ပြန်မည်ဟု သတိပေး
ပြည်သူကိုပစ်မှတ်ထား လက်နက်ကြီးပစ်ခတ်မှုများ ဆက်လုပ်ပါက ထပ်မံလက်တုံ့ပြန်မည်ဟု သတိပေးစစ်ကောင်စီတပ်၏ မင်းတပ်မြို့အခြေစိုက် ခလရ(၂၇၄)တပ်ရင်း၊ မင်းတပ်ရဲစခန်း ၊ ကန်ပက်လက်လမ်းခွဲရှိ စစ်ကောင်စီ၏ စစ်ဆေးရေးဂိတ်များကို ရှော့တိုက်ဒုံး၊ ရှော့ကတ်အလုံး ၃၀ ဖြင့် တိုက်ခိုက်ခဲ့ကြောင်း မင်းတပ် ချင်းကာကွယ်ရေးတပ်(CDF)က ယနေ့ သတင်းထုတ်ပြန် သည်။
စစ်ကောင်စီက မင်းတပ်မြို့နယ်ရှိ ကျေးရွာများသို့ လက်နက်ကြီးများ ရမ်သမ်းပစ်ခတ်ခြင်းများ ပြုလုပ်နေ၍ ပြည်သူလူထုအသက်အိုးအိမ်ဆုံးရှုံးမှုများပြားလာလျက်ရှိရာ စစ်ကောင်စီ၏ ထိုသို့ ပစ်မှု ကျူးလွန်ခြင်းများကို ပြန်လည်တုံ့ပြန်သည့်အနေဖြင့် မေလ ၂၅ရက်တွင် တိုက်ခိုက်မှုများ လုပ်ဆောင်ခဲ့ခြင်းဖြစ်သည်ဟု ဆိုသည်။
ထိုသို့ တိုက်ခိုက်မှုများကြောင့် ခလရ(၂၇၄)၊ ကန်ပက်လက်လမ်းခွဲရှိ စစ်ဆေးရေးဂိတ်နှင့် မင်းတပ်ရဲစခန်းတို့အတွင်း ကျရောက်ပေါက်ကွဲမှုများရှိခဲ့ပြီးပျက်စီးထိခိုက်မှုများကို အတည်ပြုရန် စိစစ်နေဆဲဖြစ်သည်ဟု ထုတ်ပြန်သည်။
မေလ ၂၆ရက်တွင်လည်း ကျောက်ထုမှ တက်လာသည့် စစ်ကောင်စီအင်အား ၁၈၀ခန့်ကို ကျောက်ထု – မင်းတပ်လမ်းပိုင်းတစ်နေရာ၌ မဟာမိတ်ပူးပေါင်းတပ်ဖွဲ့များက ပဒေသာမိုင်းဖြင့် မိုင်းဆွဲတိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုများရှိခဲ့သည်ဟု ဆိုသည်။
Public Service Announcement
ယခု စစ်ဆင်ရေးများကို မင်းတပ် CDF၊ မတူပီ CDF တပ်ရင်း(၁)၊ စစ်ဒေသ(၁) ဂန့်ဂေါခရိုင် တပ်ရင်း(၃)နှင့် တပ်ရင်း(၁၃)တို့ ပူးပေါင်းဆောင်ရွက်ခဲ့သည်ဟု အသိပေးသည်။
စစ်ကောင်စီများအနေဖြင့် တိုက်ပွဲဖြစ်ပွားခြင်းမရှိဘဲ ပြည်သူ့အသက်အိုးအိမ်ကို ထိခိုက်စေလိုသည့် ရည်ရွယ်ချက်ရှိရှိဖြင့် မင်းတပ်နယ်ရှိ ကျေးရွာများကို လက်နက်ကြီးများ ပစ်ခတ်မှု ဆက်လက် ကျူးလွန်လာပါက မင်းတပ် CDFအနေဖြင့် ဆက်လက် တုံ့ပြန်သွားမည်ဟု ထုတ်ပြန်ထားသည်။
မင်းတပ်နယ်အတွင်း စစ်ရေးအခြေအနေများနှင့် ပတ်သတ်၍ မေးမြန်းရန် CDF ပြောရေးဆိုခွင့်ရှိသူ ဆလိုင်းဟာအွမ်ထံသို့ ယနေ့ ဆက်သွယ်ရာအဆက်အသွယ်မရသေးပေ။
