ရခိုင်ပြည်နယ်၊ လေးတောင်မြို့တွင်ယမန်နေ့ (မေ ၃၁)နေ့လယ်က မိုးကြိုးပစ်၍ ၁၆နှစ်အရွယ် လူငယ်နှစ်ဦးသေဆုံးသွားကြောင်းဒေသခံများကပြောသည်။
လေးတောင်မြို့တွင် ဗုဒ္ဓဟူးနေ့ နေ့လယ် ၁၂ နာရီခန့်က ရုတ်တရက်မိုးခြိမ်းပြီး မိုးကြိုးဆယ်ကြိမ်ထက်မနည်းပစ်ခဲ့ပြီးနောက် အမှတ် ၁ ရပ်ကွက်မှ လူငယ်နှစ်ဦး မိုးကြိုးထိမှန်သေဆုံးခြင်းဟု ဒေသခံများကပြောသည်။
“ရုတ်တရက်ကြီးဖြစ်တာ။ ကလေးတွေက နှစ်ယောက်စလုံး ခြံထဲမှာ ရှိနေချိန် ဖြစ်တာ။ ဆေးရုံ ပို့တာမရတော့တာ”ဟု ဒေသခံတစ်ဦးကပြောသည်။
သေဆုံးသူနှစ်ဦးမှာ အသက် ၁၆ နှစ်အရွယ် မောင်မြင့်မြတ်အောင်နှင့် အသက် ၁၃ နှစ်အရွယ်မောင်လင်းလင်းထွန်းတို့ဖြစ်သည်ဟု သိရသည်။လေးတောင်မြို့သည် ရမ်းဗြဲမြို့နယ်အတွင်းပါဝင်သော မြို့ဖြစ်သည်။
Public Service Announcement
မိုးကြိုကာလဖြစ်ပြီး မုတ်သုံမိုးတစ်နိုင်ငံလုံးမရောက်သေးသောယခုကာလတွင် မိုးတိမ်တောင်ရာသီဥတုကြောင့် မိုးကြိုးနှင့် လေပြင်းဘေးကို သတိထားရမည့်ကာလဖြစ်သည်။ ပုံမှန်ရာသီဥတုအခြေအနေမဟုတ်ဘဲ ရုတ်တရုတ် မိုးရွာလာပါက ခိုင်ခန့်သော အမိုးအကာများအောက်တွင်သာ နေထိုင်ရန်၊ ကွင်းပြင်နေရာများနှင့် သစ်ပင်ကြီးများအောက်တွင် မနေရန် မိုးကြိုးနှင့်လေပြင်းဘေး သတိပေးချက်များတွင် ဖော်ပြထားသည်။
ပြီးခဲ့သည့် မေလ ၂၄ရက် နံနက်ပိုင်းက ကချင်ပြည်နယ် ဖားကန့်မြို့နယ်တွင် မိုးသက်လေပြင်းကျပြီး မိုးကြိုးပစ်ခဲ့ရာ လူနှစ်ဦးသေဆုံးခဲ့ပြီး နေအိမ်အချို့ ပျက်စီးသွားခဲ့သည်။
