စစ်ကောင်စီကို စစ်နည်းဗျူဟာကျကျ ပိုမိုထိရောက် စွာ တိုက်ခိုက်ချေမှုန်းနိုင်ရန် ပြည်သူ့ကာကွယ် ရေးတပ်မတော်၊ ရန်ကုန်တိုင်းစစ်ဒေသခွဲ၏ ပထမဆုံးတပ်ရင်းကို ယနေ့ စတင်ဖွဲ့စည်းလိုက်ကြောင်း ရန်ကုန်တိုင်းစစ်ဒေသခွဲဌာနချုပ်က အသိပေးထုတ်ပြန်သည်။
အဆိုပါတပ်ရင်းမှာ တပ်ရင်း(၅၁၀၁) ဖြစ်ပြီး အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန၏ လမ်းညွှန်ချက်များအတိုင်း လေ့ကျင့်ရည်ပြည့်ဝ၍ တိုက်ရည်ခိုက်ရည် ကောင်းမွန်ပြီး အမိန့်နာခံမှုအားကောင်းသော စစ်သည်တော် ကောင်းများဖြင့် စုဖွဲ့ထားကြောင်း ကြေညာခဲ့သည်။
ကာကွယ်ရေးဝန်ကြီးဌာနသည် ၂၀၂၁ မေလ ၅ ရက်တွင် ပြည်သူ့ကာကွယ်ရေးတပ်မတော် (PDF) ကို စတင်ဖွဲ့စည်း၍ အကြမ်းဖက်စစ်ကောင်စီအား အပြီးတိုင် အမြစ်ဖြတ် ချေမှုန်းရေးအတွက် နိုင်ငံတစ်ဝန်းရှိ စစ်ဒေသခွဲနယ်မြေ အသီးသီးတွင် တပ်ရင်း/ တပ်ဖွဲ့များ ဖွဲ့စည်းကာ စစ်ရေးလှုပ်ရှားမှုများစဉ်ဆက်မပြတ် လှုပ်ရှားဆောင်ရွက်နိုင်ရန် ဆောင်ရွက်လျက်ရှိသည်။
ရန်ကုန်တိုင်းစစ်ဒေသခွဲအနေဖြင့်နယ်မြေအခြေအနေအရ သာမကလုံခြုံရေးအရ ယခင်ကမြို့ပြပြောက်ကျားလှုပ်ရှားမှုများဖြင့်သာ စစ်ကောင်စီ ၏ ထောက်တိုင်များကို တိုက်ခိုက်ခဲ့ရာ ကာကွယ်ရေးဝန်ကြီးဌာနမှ ရန်ကုန်တိုင်းစစ်ဒေသခွဲအတွင်း တပ်ရင်း/ တပ်ဖွဲ့များဖွဲ့စည်းရန် ညွှန်ကြားလာ၍ ယခုကဲ့သို့စုဖွဲ့လိုက်ခြင်းဖြစ်သည်ဟု ဆိုသည်။
Public Service Announcement
ရန်ကုန်တိုင်းစစ်ဒေသခွဲ တပ်ရင်း/တပ်ဖွဲ့များကို ကာကွယ်ရေးဝန်ကြီးဌာနမှ ချမှတ်ထားသည့် စစ်ဘက်ဆိုင်ရာ ကျင့်ဝတ်စည်းကမ်းများနှင့်အညီ စနစ်တကျစုဖွဲ့သွားမည်ဖြစ်ကြောင်းလည်း အသိပေးထားသည်။
“ မြို့ပြရဲ့အခြေအနေဟာ တအိအိနဲ့ ဖြစ်လာသလို ရဲ ဘော်တွေလည်းတနေ့ထက်တနေ့နုတ်ယူခံနေကျရတယ်။ရန်ကုန်ဟာဗျူဟာကျတဲ့ မြို့ပြဖြစ်သလို ရန်သူ့လက်လုံးလုံးမရောက်သွားဖို့အရေးကြီးတဲ့ နေရာဖြစ်တယ်။အရင်ကရော အခုရော ရသလိုလုပ်နေရတဲ့ အပိုင်းတွေရှိတယ်။ဒါတော့ ရန်သူကို သတင်းမပေးလိုဘူး။အခုလို စနစ်တကျဖွဲ့စည်းပြီး စနစ်တကျ ထောက်ပံ့မှုတွေ ပိုရှိလာရင် ကပွဲတွေ ပိုမြိုင်လာလိမ့်မယ်။တော်လှန်သံတွေ ပိုကြားရမယ်ဆိုတာ သေချာပြောနိုင်တယ်” ဟု ရန်ကုန်အခြေစိုက် UG အဖွဲ့ဝင်တစ်ဦးက ပြောသည်။
