ဖယ်ခုံမြို့နယ်သို့ စစ်ကြောင်းသုံးကြောင်းဖြင့် ထိုးစစ် ဆင်လာသော စစ်ကောင်စီတပ်မှနှစ်လအတွင်း အရာရှိ စစ်ကြောင်းမှူးများအပါအဝင် ၆၂ ဦး သေဆုံးကြောင်း ဖယ်ခုံ PDF က ယနေ့ ထုတ်ပြန်သည်။
ဧပြီ ၁ ရက်ကစ၍ ဇွန်လ ၂ ရက်အထိ တပ်မ ၆၆ လက်အောက်ခံ တပ်ရင်းများက ဖယ်ခုံမြို့ အနောက်ဖက်ခြမ်း ရှိလွယ်ဟွဲ နှင့် လွယ်လုံရွာသို့ စစ်ကြောင်းတစ်ကြောင်း၊ ခေါင်းအိ နှင့် စက်တော်ရွာဖက်တွင် စစ် ကြောင်းတစ်ကြောင်း နှင့် လတူးဖက် စစ်ကြောင်းတစ်ကြောင်း စုစုပေါင်းစစ်ကြောင်း (၃) ကြောင်းဖြင့် ထိုးစစ်ဆင်လာခဲ့ခြင်းဖြစ်သည်။
“တိုက်ပွဲအခြေအနေ ကဆက်ဖြစ်ဖို့ပဲရှိတယ်။ အခုလက်ရှိ စစ်ကောင်စီစစ်ကြောင်း တွေက မူလ ထိုးစစ်ဆင်ဖို့စခဲ့တဲ့နေရာတွေမှာတပ်တည်ထားတုန်းလို့ ပြောလို့ရတယ်”ဟု ဖယ်ခုံ မြို့တိုက်ပွဲ၌ ရှိနေသည့် အလယ်ပိုင်းတိုင်းတပ်ဖွဲ့ဝင်တစ်ဦးက လူထုနွေဦးသို့ ပြောသည်။
ထိုသို့ထိုးစစ်ဆင်လာမှုကို ဖယ်ခုံ PDF (တပ်ရင်းအမှတ် – ၁၀၀၂) နှင့်အတူ KNDF ၊ PDF-လွိုင်ကော် ၊ဒီးမော့ဆို-PDFs စစ်ကြောင်း၊ ဒီးမော့ဆို Local-PDFs စစ်ကြောင်း၊ မိုးဗြဲPDF (1001 နှင့် 1007)၊ တပ်ရင်းအမှတ် 1008၊ 1009၊1003၊KRU ၊NPT-PDF တပ်ရင်းများ နှင့် အလယ်ပိုင်းတိုင်း အထူး တပ်ဖွဲ့ တို့စုပေါင်း၍ ပြန်လည်ခုခံတိုက်ခိုက်ခဲ့သည်။
တိုက်ပွဲများအတွင်း စစ်ကောင်စီဘက်မှ အရာရှိ၊စစ်ကြောင်းမှူးများအပါအဝင် စုစုပေါင်း၆၂ ဦး သေဆုံး ပြီး အများအပြားထိခိုက်ဒဏ်ရာရခဲ့ကြောင်းအသိပေးသည်။
စစ်တပ်ကအထိနာသောကြောင့် စစ်ကောင်စီက လေကြောင်းတိုက်ခိုက်မှု အကြိမ်ရေများစွာပစ်ခတ်၊ကျဲချ သည်သာမက ဖယ်ခုံ စကခ(၇) နှင့် ၃၃၆ တပ် မှလက်နက်ကြီး ပစ်ကူများစွာပေးခဲ့သည်ဟု ထုတ်ပြန်ချက်၌ ဖော်ပြ သည်။
နှစ်လ ကျော်တိုက်ပွဲအတွင်းတွင် PDF နှင့် KNDF တို့မှ ရဲဘော်(၃) ဦး ကျဆုံးခဲ့ရပြီး ရဲဘော်အချို့လည်း ထိခိုက်ဒဏ်ရာရခဲ့သည်။