စစ်ကိုင်းမြို့နယ်မြောက်ခြမ်းတွင် စစ်ကောင်စီတပ် စစ်ကြောင်း မိုင်းဆွဲတိုက်ခိုက်ခံရပြီးနောက် ၎င်းတို့က ကျေးရွာ နှစ်ရွာအား မီးရှို့ဖျက်ဆီးသွားကြောင်း ဒေသတွင်း သတင်းရင်းမြစ်များက ပြောသည်။
ယမန်နေ့(မေလ ၂ ရက်) နေ့လည် ၁နာရီခန့်က စစ်ကိုင်းမြို့နယ်၊ ပဒူကျေးရွာမှလာသော စစ်ကား နှစ်စီးသည် လမ်းခုလတ်တစ်နေရာတွင် မိုင်းဆွဲတိုက်ခိုက်ခံရပြီး ထိခိုက်ပျက်စီးမှုများရှိကြောင်း၊ အထိနာသွား၍ ကျောက်ပနန်ရွာနှင့် ရွာသစ်ကျေးရွာမှ နေအိမ်များ မီးရှို့ ဖျက်ဆီးသွားကြောင်း ဒေသခံများက ပြောသည်။
“ဆယ်လုံးလောက်တော့ ပါတယ်ပြောတယ်။ မနေ့ကမိုးတွေရွာလာတော့ တအားပါမသွားတာ။”ဟု ဒေသခံအမျိုးသမီးတစ်ဦးက ပြောသည်။
ထို့အပြင် စစ်ကောင်စီတပ်က လက်နက်ကြီးများဖြင့်ပါ ပစ်ခတ်နေ၍ ကျေးရွာ လေးရွာထက်မနည်း ဒေသခံထောင်ချီ ထွက်ပြေးတိမ်းရှောင်နေရသည်။
မေလ တတိယက စစ်ကိုင်းမြို့နယ် ပဒူကျေးရွာဝန်းကျင်တွင် စစ်ကောင်စီတပ်နှင့် ဒေသတွင်း PDFများ တိုက်ပွဲများဖြစ်ပွားခဲ့ပြီး စစ်ကောင်စီက လေကြောင်းဖြင့်ပါ ပစ်ခတ်တိုက်ခိုက်ကာ ပဒူကျေးရွာကိုလည်း မီးရှို့ဖျက်ဆီးသွားခဲ့သေးသည်။
စစ်ကောင်စီတပ် အာဏာသိမ်းပြီးချိန်မှ၂၀၂၃ ဖေဖော်ဝါရီ ၂၈ရက်အထိ စစ်ကောင်စီနှင့် လက်အောက်ခံအဖွဲ့အစည်းများက မီးရှို့ဖျက်ဆီးမှုကြောင့် အရပ်သားပြည်သူ နေအိမ်ပေါင်း ၆၀,၄၅၉ လုံး ပျက်စီးဆုံးရှုံးခဲ့ပြီး စစ်ကိုင်းတိုင်းတွင် ၄၇,၇၇၈ လုံးဖြင့် အများဆုံး မီးလောင်ပျက်စီးခဲ့သည်။