ရန်ကုန်တိုင်း ကျောက်တံတားမြို့နယ်ရှိ ပြည်တွင်းအခွန်ဦးစီးမှူးရုံး တိုက်ခိုက်ခဲ့သည့် Brave Eagles (UG)အဖွဲ့က ညပိုင်းတွင် ဒဂုံမြို့သစ်အရှေ့ပိုင်းမြို့နယ်ရှိ ပြည်ခိုင်ဖြိုးပါတီရုံးအား ထပ်မံဖောက်ခွဲတိုက်ခိုက်ခဲ့ကြောင်း ယင်းအဖွဲ့မှ တာဝန်ရှိသူက အတည်ပြုသည်။
ယင်းအဖွဲ့က ယနေ့(ဇွန်လ ၅ရက်) နံနက်တွင် ကျောက်တံတားမြို့နယ် ပန်းဆိုးတန်းလမ်းပေါ်ရှိ ပြည်တွင်းအခွန်များဦးစီးဌာန၊ အလယ်အလတ် အခွန်ထမ်းများဆိုင်ရာ အခွန်ဦးစီးမှူးရုံးအား ချိန်ကိုက်ဗုံးအသုံးပြု မစ်ရှင်လုပ်ဆောင်ခဲ့ခြင်းဖြစ်ပြီး ယင်းတိုက်ခိုက်မှုတွင် Non CDM ဒုဦးစီးမှူး၊ Non CDM ဝန်ထမ်း သုံးဦးနှင့် အခွန်ဆောင်သည့် ပြည်သူနှစ်ဦး ထိခိုက်ခဲ့ကြောင်း သတင်းထုတ်ပြန်ထားသည်။
“Non CDM အတွက်ကတော့ ဒီနေ့ဖြစ်စဥ်လိုမျိုးနောက်ထပ်မဖြစ်လာနိုင်ဘူးလို့ မပြောနိုင်ပါဘူး
သတိကြီးကြီးနဲ့ ရုံးတက်ကြပေါ့လို ပြောချင်ပါတယ်” ဟု အထက်ပါတာဝန်ရှိသူက ပြောသည်။
Public Service Announcement
ထို့အပြင် ည ၇နာရီခန့်က ဒဂုံမြို့သစ် အရှေ့ပိုင်းမြို့နယ်ရှိ ပြည်ခိုင်ဖြိုးပါတီရုံးအား အဝေးထိန်းဗုံးဖြင့် ဖောက်ခွဲတိုက်ခိုက်ခဲ့ကြောင်း ၎င်းက ဆိုသည်။
“မြို့နယ်အတွင်းမှာ ပျူစောထီးတွေ၊ ဒလန်တွေထဲမှာက ကြံဖွတ်အများစုပါဝင်ပတ်သတ်နေလို့ လာတိုင်ထားလို့ သတိပေးလိုက်တဲ့သဘောပါ။မကြာခင် စစ်ရေးအရှိန်မြင့်လာမှာပါ ဒလန်တွေ၊ပျုတွေ အလှည့်ပေါ့” ဟု ယင်းတိုက်ခိုက်မှုနှင့်ပတ်သက်၍ ၎င်းက ပြောသည်။
အဆိုပါတိုက်ခိုက်မှုတွင် လူထိခိုက်ဒဏ်ရာရရှိခြင်း မရှိကြောင်း ၎င်းက ဆိုသည်။
အဆိုပါမစ်ရှင် နှစ်ခုစလုံးကို စစ်ကောင်စီ၏ အုပ်ချုပ်ရေး ယန္တယားလည်ပတ်မှု ထောက်တိုင်အနေဖြင့် သတ်မှတ်တိုက်ခိုက်ခဲ့ခြင်းဖြစ်ကြောင်း Brave Eagles က ထုတ်ပြန်ထားသည်။
“Brave Eagles က အရင်က ရန်ကုန်ကစွန့်ခွာပြီး အခု ရန်ကုန်ပြန်ရောက်လာပါပြီ။ ထပ်ပြီးထပ်ပြီး လုံခြုံစွာနဲ့ အရှိန်မြင့်တင်တော့မှာပါ။ ပြည်သူတွေ ကူပေးကြပါဗျာ”ဟု အထက်ပါ တာဝန်ရှိသူက ပြည်သူများကို တောင်းဆိုသည်။
ထို့ကြောင့် ပြည်သူများအနေဖြင့်လည်း စစ်ကောင်စီ၏ ထောက်တိုင်အဖွဲ့အစည်းများနှင့် အဆောက်အဦးများအနီးသို့ ဖြတ်သန်းသွားလာခြင်းမပြုဘဲ ဝေးဝေးမှ ဂရုစိုက်ရှောင်ရှားသွားရန် ယင်းအဖွဲ့က မေတ္တာရပ်ခံထားသည်။
