ကျောက်ကြီးမြို့နယ် ထွေအုပ်ရုံးအစည်းအဝေးလုပ်နေချိန် ဒရုန်းနဲ့တိုက်ခိုက်ခံရ

ကရင်ပြည်နယ်နဲ့ထိစပ်နေတဲ့ ပဲခူးတိုင်း၊ ကျောက်ကြီးမြို့နယ် ရဲ့ စစ်ကောင်စီထွေအုပ်ရုံးမှာ ဇွန်လ ၉ ရက် မနက်ပိုင်း အစည်းအဝေးလုပ်နေချိန် ဒရုန်းနဲ့ ဗုံးချခံရတယ်လို့ ဒေသခံသတင်းရင်းမြစ်ဆီကသိရပါတယ်။

မနက်ပိုင်း ၁၀နာရီ ခန့်က ထွေအုပ်ရုံးမှာ ဌာနဆိုင်ရာ အဖွဲ့ပေါင်းစုံအစည်းအဝေးလုပ်နေချိန် ဒရုန်းနဲ့ ဗုံးချခံရတာပါ။

ဗုံးဟာ အဆောက်ဦးပေါ် ကျရောက်ပေါက်ကွဲလို့ အစည်းအဝေးတက်ရောက်လာသူတွေထဲက မြို့နယ် စိုက်ပျိုးရေးဦးစီးမှူး သေဆုံးသွားပါတယ်။

ဒါအပြင် မီးသတ်၊ ထွေအုပ်နဲ့ စစ်သား အချို့ ထိခိုက်ဒဏ်ရာရခဲ့တယ်လို့လည်း စစ်ကောင်စီသတင်းတွေကိုဖော်ပြတဲ့ လူမှုကွန်ရက်တွေမှာ ဓာတ်ပုံတွေနဲ့ သတင်းဖော်ပြတာတွေ့ရပါတယ်။

Public Service Announcement

ဒဏ်ရာရသူတွေကိုတော့ ကျောက်ကြီးဆေးရုံကိုပို့ဆောင်ထားတယ်လို့ သိရပါတယ်။

ပြီးခဲ့တဲ့ ရက်ပိုင်း ဇွန်လ ၆ ရက်ကတင် ပဲခူးတိုင်း၊ ညောင်လေးပင်ခရိုင်၊ နတ်သံကွင်းဒေသက စစ်ကောင်စီတပ်စခန်းနဲ့ နယ်မြေရဲစခန်းတွေကို KNU နဲ့ပူးပေါင်းတပ်တွေက ဝင်တိုက်ခိုက်ခဲ့တာရှိပါတယ်။

ဇွန်လ ၆ ရက်ကတိုက်ပွဲမှာတော့ စစ်ကောင်စီဘက်က ၄၀ ဦးသေဆုံးပြီး ၁၂ ဦးဒဏ်ရာရခဲ့တယ်လို့ KNU ထုတ်ပြန်ထားပါတယ်။

ဓာတ်ပုံ − Federal Wings