စစ်ကိုင်းတိုင်း၊ ဝက်လက်မြို့နယ် ဟံလင်းမြို့ဟောင်း၌ တပ်စွဲထားသော စစ်ကောင်စီတပ်စခန်းအား တော်လှန်ရေးအဖွဲ့များ သွားရောက်တိုက်ခိုက်ခဲ့ရာ ထိခိုက်သေဆုံးမှုများရှိကြောင်း 96 Soldiers-PDF အဖွဲ့မှ ကိုဇေယျာလွင်က ပြောသည်။
ဇွန်လ ၁၂ ရက် နံနက် ၅နာရီခွဲခန့်က ဝက်လက်မြို့နယ်၊ ဟံလင်းမြို့ဟောင်း၌ တပ်စွဲထားသော စစ်ကောင်စီ စခန်းအား တော်လှန်ရေးအဖွဲ့ သုံးဖွဲ့ပေါင်းကာ တိုက်ခိုက်ခဲ့ခြင်းဖြစ်သည်။
“စခန်းနားအထိကပ်ပြီး ပစ်ကြတာ။ ဒါပေမယ့် စခန်းကိုအရမ်းကြီးနီးကပ်စွာ ကပ်တာမျိုးတော့မဟုတ်ဘူး။ စခန်းနားမှာ ကန္တာရပင်တွေရှိတော့ အခုအခံအကာအကွယ်မရှိဘူး။ ဟံလင်းမှာ ဒီကောင်တွေတပ်စွဲတာ ၇လ သို့မဟုတ် ၈ လလောက်ရှိပြီ။ အဲကာလအတွင်းမှာ လက်နက်ငယ်နဲ့တိုက်ခိုက်တာမျိုး မရှိဘူး။ ဒါပထမဆုံးပဲ။”ဟု 96 Soldiers-PDF အဖွဲ့မှ ကိုဇေယျာလွင်က ပြောသည်။
ဟံလင်းမြို့ဟောင်းရှိ စစ်ကောင်စီစခန်းအား တိုက်ခိုက်ရာတွင် ထိတွေ့တိုက်ပွဲ မိနစ် ၂၀ခန့် ဖြစ်ပွားခဲ့ရာ စစ်ကောင်စီဘက်မှ လေးဦးသေဆုံးပြီး နှစ်ဦးဒဏ်ရာများရရှိခဲ့ကြောင်း ကျေးရွာဒေသခံများ၏ ပြောစကားကိုကိုးကားကာ 96 Soldiers-PDF အဖွဲ့က ပြောသည်။
Public Service Announcement
အဆိုပါ စစ်ဆင်ရေးအား MDF-Shwebo တပ်ဖွဲ့၊ ဒုံးပျံတပ်ဖွဲ့တို့နှင့် 96 Soldiers-PDF တို့ ပူးပေါင်းတိုက်ခိုက်ခဲ့ပြီး ပူးပေါင်းအဖွဲ့များဘက်က အထိခိုက်အကျဆုံးမရှိ ဆုတ်ခွာနိုင်ခဲ့ကြောင်း အသိပေးထားသည်။
ဟံလင်းမြို့ဟောင်း၌ တပ်စွဲထားသော စစ်ကောင်စီတပ်သည် ဝက်လက်နယ်အတွင်း ကျေးရွာများအား မကြာခဏစစ်ကြောင်းထိုးဖျက်ဆီးမှုများ ပြုလုပ်လေ့ရှိသည်။
