စစ်ကိုင်းနှင့် ဆားလင်းကြီးနယ်တွင် နေအိမ်များမီးရှို့ခံထားရသည့် ပြည်သူများ စားဝတ်နေရေးခက်ခဲနေ

စစ်ကိုင်းတိုင်း၊ စစ်ကိုင်းနှင့် ဆားလင်းကြီးမြို့နယ်တွင် စစ်ကောင်စီတပ်၏ လက်တလောမီးရှို့ဖျက်ဆီးခံထားရသည့် ဒေသခံပြည်သူများမှာ စားဝတ်နေရေးအခက်အခဲများ ရှိနေကြောင်း ဒေသတွင်းစစ်ဘေးရှောင် ကူညီနေသူများက ပြောသည်။

ဇွန်လ ၉ ရက်မှစတင်ကာ စစ်ကိုင်းမြို့နယ်၊ ဆားတောင်တိုက်နယ်ရှိ ကျေးရွာများနှင့် ဆားလင်းကြီးမြို့နယ်၊ ညောင်ပင်ကြီးစခန်းဝန်းကျင်ရှိ ကျေးရွာများအား စစ်ကောင်စီတပ်က မီးရှို့ဖျက်ဆီးမှု ရက်တစ်ပတ်နီးပါး ပြုလုပ်ခဲ့သည်။

ညောင်ပင်ကြီးကျေးရွာအနီးရှိ ကျေးရွာများကို စစ်ကောင်စီတပ်က ရက်သတ္တပတ်ကျော်သည်အထိ မီးရှို့ဖျက်ဆီးနေရာ ကျေးရွာ ငါးရွာထက်မနည်း၊ နေအိမ် ၃၀၀ကျော် မီးလောင်ပြာကျခဲ့သည်။

စစ်ဘေးရှောင်ဦးရေ ထောင်ချီရှိနေပြီး လက်တလောစားနပ်ရိက္ခာအခက်အခဲများရှိနေ​ကြောင်း ဒေသတွင်း စစ်ဘေးရှောင်ကူညီနေသူများက ပြောသည်။

Public Service Announcement

“အခက်ခဲရှိတယ်။ ရေရှည်မှာမလွယ်ဘူး။ လောလောဆယ် စစ်ရှောင်အတွက်ငွေလိုနေပါတယ်။”ဟု ချင်းတွင်းမြစ်ကမ်းဘေးကျေးရွာများသပိတ်ကော်မတီမှ ကိုအောင်ခန့်ဇော်က ပြောသည်။

အလားတူ စစ်ကိုင်းမြို့နယ်၊ ဆားတောင်တိုက်နယ်အတွင်းရှိ ကျေးရွာများကို ဇွန်လ ၉ ရက်ကတည်းက စစ်ကောင်စီတပ်က စစ်ကြောင်းထိုးမီးရှို့နေ၍ ကျေးရွာအများအပြားမှ အိမ်ခြေရာနှင့်ချီ မီးရှို့ဖျက်ဆီးခံထားရသည်။ သာဇင်ရွာမှာ အိမ်ခြေ ၇၀၀ခန့် ပြာကျခဲ့ပြီး အမျိုးသမီးတစ်ဦးသေဆုံးခဲ့သည်။

စစ်ဘေးရှောင်ပြည်သူများအား အနီးဝန်းကျင်ရွာများက ချက်ပြုတ်ကျွေးမွေးနေသော်လည်း စစ်ဘေးရှောင်အရေအတွက်များပြားနေ၍ လက်တလောစားရေးသောက်ရေးအခက်အခဲများတွေ့နေကြောင်း ဒေသခံများက ပြောသည်။

“သာဇင်ရွာမှာက စေတီလေးတစ်ဆူနဲ့ ဇရပ်ကလေးတစ်ဆောင်ပဲ ကျန်ရစ်ခဲ့တယ်။ အကုန်ပြာကျသွားတာ။”ဟု ဒေသခံတစ်ဦးက ပြောသည်။

စစ်ကောင်စီတပ်မှာ အဆိုပါကျေးရွာများအတွင်း တပ်စွဲထား၍ မီးလောင်ပျက်စီးသည့် နေအိမ်အရေအတွက်မှာ အတိအကျမသိရသေးပေ။

ဆားလင်းကြီးနယ်ရှိ ကျေးရွာများမှာ ညောင်ပင်ကြီးစခန်းစီးနင်းတိုက်ခိုက်ခံရပြီးနောက် မီးရှို့ခံရခြင်းဖြစ်ပြီး ဒေသခံပြည်သူ သုံးဦးထက်မနည်း သေဆုံးခဲ့သည်။

ညောင်ပင်ကြီးရဲစခန်းသိမ်းပြီးနောက် စစ်ကောင်စီကတပ်စွဲထား၍ ဒေသခံပြည်သူ သုံးထောင်ကျော် ထွက်ပြေးတိမ်းရှောင်နေရကြောင်း၊ စစ်ဘေးရှောင်ပြည်သူများမှာ နီးစပ်ရာကျေးရွာများ၌ ခိုလှုံနေရပြီး စားဝတ်နေရေးအခက်အခဲတွေ့နေရကြောင်း အညာပစ်တိုင်းထောင်လေးများအဖွဲ့က ပြောသည်။

“ယာယီစစ်ရှောင်စခန်း လေးနေရာတော့ရှိတယ်။တချို့ပြည်သူတွေက လယ်ကွင်းပြင်ထဲ အမိုးမလုံအကာမလုံနဲ့ စစ်ရှောင်နေရတယ်M စစ်ရှောင်တွေအနေနဲ့ဒီနေနဲ့ဆို၉ရက်ရှိပြီ။ရက်ကြာလာတော့ စားဝတ်နေရေးအခက်ခဲဖြစ်တာပေါ့ဗျာ။” ဟု အညာပစ်တိုင်းထောင်လေးများအဖွဲ့ဦးဆောင်သူက ပြောသည်။

စစ်ကိုင်းတိုင်းတွင် အာဏာသိမ်းစစ်ကောင်စီတပ်နှင့် ၎င်း၏ အပေါင်းအပါများ မီးရှို့ဖျက်ဆီးမှုကြောင့် ၂၀၂၁ မေ ၁ ရက်မှ ၂၀၂၃ မေ ၃၁ ရက်အထိ နေအိမ်ပေါင်း၅၃,၈၁၆ လုံး ပျက်စီးဆုံးရှုံးခဲ့ကြောင်း Data For Myanmar က ထုတ်ပြန်ထားသည်။