စစ်ကိုင်းတိုင်း၊ ရွှေဘိုမြို့နယ်၊ ရွှေဘို – ကျောက်မြောင်းလမ်းပေါ်တွင် စစ်ကောင်စီတပ်က ဖမ်းဆီးထားသော PDF ရဲဘော်တစ်ဦးအပါအဝင် လူငယ်နှစ်ဦးကို လူသားဒိုင်းအဖြစ် အသုံးပြုပြီးနောက် သတ်ဖြတ်သွားကြောင်း ဒေသခံများက ပြောသည်။
ဇူလိုင် ၁ ရက်က ရွှေဘိုမြို့နယ်၊ ရွှေဘိုကျောက်မြောင်းလမ်းသို့ ကင်းပုန်းယူစစ်ကြောင်းထိုးလာသော စစ်ကောင်စီတပ်သည် စစ်ကြောင်းအတွင်းလူသားဒိုင်းအဖြစ်ခေါ်ဆောင်လာသော လူငယ် နှစ်ဦးအား ပြန်ဆုတ်ခွာချိန်တွင် သတ်ဖြတ်ထားခဲ့ကြောင်း ဒေသခံများက ပြောသည်။
အဆိုပါ လူငယ်နှစ်ဦးအနက် တစ်ဦးမှာ Myanmar Defense Force – Shwebo မှ တပ်ဖွဲ့ဝင်တစ်ဦးဖြစ်သော ရဲဘော်ဟိန်းဝေအောင်(ခ)စပိဖြစ်ပြီး ဇွန်လ ၂၄ ရက်က ရွှေဘိုမြို့ပေါ်သို့ တော်လှန်ရေးအတွက် ဆက်စပ်ပစ္စည်းများ သွားယူစဥ် ဖမ်းဆီးခံခဲ့ရခြင်းဖြစ်ကြောင်း MDF-Shwe Bo ၏ ပြန်ကြားရေးတာဝန်ခံက ပြောသည်။
ထို့နောက် ဇူလိုင် ၃ ရက်တွင် ၎င်း၏ရုပ်အလောင်းအား စစ်ကောင်စီတပ်က ရွှေဘို-ကျောက်မြောင်းလမ်းဘေးတွင် သတ်ဖြတ်ကာ စွန့်ပစ်ထားကြောင်းသတင်းရ၍ သွားရောက်သယ်ဆောင်ကာ သင်္ဂြိုလ်ခဲ့ကြောင်း အထက်ပါတာဝန်ခံက ပြောသည်။
Public Service Announcement
“အဖမ်းခံရပြီး ကြားထဲမှာဘယ်လိုမှ အဆက်အသွယ်မရဘူး။ လှမ်းထောက်တဲ့အခါ လူငယ်လေးတွေပါသွားတယ်လို့သိရတဲ့အတွက် ကျွန်တော်တို့ ရဲဘော်ပါသွားပြီဆိုတာ သိလိုက်တယ်။ ခါတိုင်းလိုပဲ စစ်ကြောရေးတွေပို့မယ်၊ စစ်ဆေးမေးမြန်းမယ်၊ အမှုတင်မယ်လို့ပဲ ထင်ထားတာ။ ဒါပေမယ့် ၇ လပိုင်း၁ရက်နေ့ စစ်ကြောင်းထိုးတဲ့အခါ သူတို့ကို လူသားဒိုင်းလုပ်တယ်။ ဖမ်းဆီးချုပ်နှောင်ပြီးတော့ စစ်ကြောင်းထိုးတဲ့ရှေ့မှာ သွားခိုင်းတယ်။ အဲနေ့မှာပဲသတ်ဖြတ်လိုက်တယ်လို့ နောက်မှသိရတယ်”ဟု MDF-Shwe Bo ၏ ပြန်ကြားရေးတာဝန်ခံက ပြောသည်။
ရဲဘော်၏ အလောင်းနှင့်အတူတွေ့ရသည့် လူငယ်တစ်ဦး၏ရုပ်အလောင်းမှာမူ မည်သူမည်ဝါဟုမသိရသေးဘဲ ရုပ်အလောင်းတွေ့ရှိရာနေရာတွင် သင်္ဂြိုလ်ပေးခဲ့သည်ဟု သိရသည်။
ကျဆုံးခဲ့သည့် MDF-Shwe Bo တပ်ဖွဲ့ဝင် ရွှေဘိုနယ်သား ရဲဘော်ဟိန်းဝေအောင်သည်(၁၉)နှစ်သာရှိသေးပြီး ၁၀တန်းအထိ တက်ရောက်ခဲ့သူဖြစ်သည်။ စစ်ကောင်စီအာဏာသိမ်းပြီးနောက် ယုံကြည်ချက်ဖြင့် လက်နက်ကိုင်တော်လှန်ရေးထဲ ဝင်ရောက်လာပြီး စစ်ကောင်စီတပ်အား ခုခံတော်လှန်ခဲ့ကြောင်း MDF-Shwe Bo ရဲဘော်များက ပြောသည်။
စစ်ကောင်စီတပ်သည် PDFရဲဘော်များအပြင် ပြည်သူများကိုလည်း စစ်ကြောင်းများတွင်လူသားဒိုင်းအဖြစ် အသုံးပြုပြီးနောက် သတ်ဖြတ်ကာ စွန့်ပစ်ထားခြင်းများ ပြုလုပ်နေသည်။
