▪︎စစ်ကူတပ်ကိုလည်း မိုင်းဖြင့် နှစ်ကြိမ်တိုက်ခိုက်ခဲ့၊ စစ်ကောင်စီတပ်ထိခိုက်သေဆုံးများနိုင်ဟု ခန့်မှန်း
မန္တလေးတိုင်း မတ္တရာမြို့နယ် အခြေစိုက်အမှတ်(၁၀၁၄) လေကြောင်းရန်ကာကွယ်ရေးတပ်ကို ယနေ့မနက်အစောပိုင်းတွင် ပြည်သူ့ကာကွယ်ရေးတပ်မတော်-မန္တလေး(MDY- PDF)ကရှော့တိုက်ဒုံးအသုံးပြု တိုက်ခိုက်ခဲ့ကြောင်းပြောရေးဆိုခွင့်ရှိသူ ကိုအော်စမွန်ကပြောကြားသည်။
ဇူလိုင် ၁၅ရက်မနက် ၃နာရီခန့်တွင် မတ္တရာမြို့နယ် အင်ကြင်းမြိုင်အခြေစိုက် လေကြောင်းရန် ကာကွယ်ရေးတပ်ကို တိုက်ခိုက်ခဲ့ခြင်းဖြစ်သည်။
“လေကြောင်းရန် ကာကွယ်ရေးတပ် ၁၀၁၄ပေါ့ အင်ကြင်းမြိုင်မှာ အခြေစိုက်တဲ့တပ်ကို ကျွန်တော်တို့က ရှော့တိုက်ဒုံး ၁၀၇ မမနဲ့ တိုက်ခိုက်ခဲ့တာကနေ တိုက်ပွဲစဖြစ်တယ်။ဒီတိုက်ခိုက်မှုနဲ့ တပြိုင်တည်းမှာပဲ အင်ကြင်းမြိုင်တပ်ရဲ့ ရှေ့တန်းကာကင်း စခန်းငယ်တစ်ခုကိုလည်း ဝင်ရောက်စီးနင်းတာမျိုးရှိပါတယ်။ အဲဒီအချိန်မှာ တိုက်ပွဲဖြစ်တဲ့နေရာကို စစ်ကူလာတဲ့ ရန်သူ့စစ်ကြောင်းကို နှစ်ကြိမ် မိုင်းဆွဲဖြတ်တောက်တိုက်ခိုက်ခဲ့တာရှိပါတယ်” ဟု မန္တလေး PDF ပြောရေးဆိုခွင့်ရှိသူက ရှင်းပြသည်။
Public Service Announcement
စစ်ကောင်စီတပ်က ထိခိုက်သေဆုံးမှုရှိပြီး ထိခိုက်သေဆုံးအခြေအနေကို စုံစမ်းဆဲဖြစ်သည်ဟုသိရသည်။
“ရန်သူဘက်က ထိခိုက်ကျဆုံးမှု ထောက်လှမ်းနေတုန်းပဲ။ ကနဦး သိရတာကတော့ ထိခိုက်ကျဆုံးများနိုင်တယ်လို့သိရတယ်။ စစ်ရေးအခြေအနေကတော့ ဆက်လက်တင်းမာနေတုန်းပဲ” ဟု မန္တလေး PDF ပြောရေးဆိုခွင့်ရှိသူဆက်လက် ပြောကြားသည်။
မန္တလေး PDF အနေဖြင့် ယခုနှစ် ဧပြီလအတွင်းက နောင်ချိုမြို့နယ် အတွင်း၌ သပြေညိုစစ်ဆင်ရေးအမည်ဖြင့် စစ်ကောင်စီတပ်ကို တိုက်ခိုက်ခဲ့ရာရက်ပေါင်း ၂၀ ဝန်ကျင်ကြာခဲ့သည်။ စစ်တပ်က အင်အားထောင်ချီအသုံးပြု၍တိုက်ခိုက်သလို SU ၊ YAK-130 အပါအဝင် တိုက်လေယာဥ်များအသုံးပြူ၍ တိုက်ခိုက်ခဲ့သော်လည်း မန္တလေးPDF ကစနစ်တကျ တိုက်ခိုက်ခဲ့သဖြင့် စစ်တပ်မှ အရာရှိများအပါအဝင် အင်အား ၁၀၀ ကျော်သေဆုံးခဲ့ကြောင်း မန္တလေးPDF ကထုတ်ပြန်သည်။
