-“ဒီတစ်ပွဲကပန်းဝင်မယ့်ပွဲဖြစ်တယ်ဆိုတာကိုကောင်းကောင်းခိုင်ခိုင်သက်သေပြခဲ့တယ်လို့ယုံပါတယ်”-ဦးမင်းကိုနိုင်
Return of Salmons (ဆယ်လ်မွန်ငါးတို့အပြန်) ပန်းချီကားကို ဒေါ်လာ ၃၃,၃၃၃ ဖြင့် လေလံအောင်ခဲ့ခြင်းသည် ပြည်သူ့ဘက်က နိုင်ကိုနိုင်မည်ဟု သင်္ကေတပြသည်ဟု ယူဆကြောင်း ယင်းပန်းချီကားကိုရေးဆွဲခဲ့သော ဦးမင်းကိုနိုင်ကပြောသည်။
ယင်းပန်းချီကားကို ဇူလိုင် ၂၃ ညတွင်ပြုလုပ်သည့် ရိုးမခေါ်သံ ကမ်ပိန်းပိတ်ပွဲ၌ လေလံတင်ရောင်းချခဲ့ခြင်းဖြစ်ပြီး ပန်းချီကားကို အမေရိကန်ဒေါ်လာ ၃၃၃၃၃(လက်ရှိဒေါ်လာပေါက်ဈေးဖြင့်မြန်မာငွေဖြင့်ဆိုပါကအကြမ်းဖျင်း ကျပ်သိန်း (၁၂၀၀) ဝန်းကျင်) ဖြင့် လေလံအောင်မြင်ခဲ့ခြင်းဖြစ်သည်။
“ပြည်သူ့ဘက်က နိုင်ကိုနိုင်ရမယ်လို့ သင်္ကေတပြလိုက်တယ်လို့ မြင်ပါတယ်။ လောကနိယာမအတိုင်းပေါ့ဗျာ ။ အဓမ္မကို ဓမ္မကသာလျှင် နိုင်ကြေးပေ့ါ ။ ကိုဂျင်မီပြောသလိုပေါ့ဗျာ ။ တရားတဲ့ဘက်ကနိုင်ကြေးပေါ့ဗျာ” ဟု ယင်းလေလံပွဲတွင် ဦးမင်းကိုနိုင်ကပြောသည်။
ထို့ပြင် သုံးဂဏန်းသည် လမ်းမပေါ်၌ လက်သုံးချောင်းထောင်၍ ငြိမ်းချမ်းစွာ ဆန္ဒပြခဲ့သည့် ပြည်သူများကို ဂုဏ်ပြုသည်ဟု ခံယူကြောင်း ၎င်းကဆက်ပြောသည်။
Public Service Announcement
“အကောင်းဆုံးကတော့ ခွန်အားတွေရတာပါပဲ ။ ကျွန်တော်တို့ ပြည်သူတွေဟာဘယ်တော့မှသွေးမအေးဘူး။ ဘယ်တော့မှ အရှူံးမပေးဘူး။ ဒီတစ်ပွဲက ပန်းဝင်မယ့်ပွဲဖြစ်တယ်ဆိုတာကိုကောင်းကောင်းခိုင်ခိုင်သက်သေပြခဲ့တယ်လို့ယုံပါတယ်။” ဟု ဦးမင်းကိုနိုင်ကပြောသည်။
ပန်းချီကားလေလံကို စင်ကာပူ နှင့် အမေရိကန် နှစ်နိုင်ငံရှိမြန်မာများက ဈေးပြိုင်ပေးကာ အကြိတ်အနယ်လေလံဆွဲခဲ့ပြီး နောက်ဆုံးတွင် အမေရိကန်နိုင်ငံ၌နေထိုင်သည့် ကိုစည်သူဝင်းက အမေရိကန်ဒေါ်လာ ၃၁၀၀၀ ဖြင့် လေလံအောင်ခဲ့ခြင်းဖြစ်သည်။
သို့သော်လည်း လေလံအောင်သူက အမှတ်တရ ဖြစ်စေရန်ရည်ရွယ်၍ လေလံဈေးကို ဒေါ်လာ ၃၃၃၃၃ အထိ ပေးခဲ့ခြင်းဖြစ်သည်။
“တစ်ကျော့ပြန် ၂ ငါးလုံးလိုမျိုးသာ လူပင်လယ်ဖြစ်ခဲ့ရင် ဒီနေ့ဖြစ် မနက်ဖြန်အိမ်ပြန်ရပြီပဲ ။ အဲဒီ့ဟာဖြစ်ဖို့အတွက် တကယ်ကို အတိတ်နမိတ်တွေနဲ့ရောလက်သုံးချောင်းထောင်ခဲ့ကြသလို လက်သုံးချောင်းတွေ ငါးလုံး ” ဟု ရိုးမခေါ်သံ ကမ်ပိန်းကို ဦးဆောင်သူ ဒါရိုက်တာကိုပေါက်ကပြောသည်။
အဆိုပါပန်းချီကားအတွက် ၎င်းတို့မျှော်လင့်ထားသည့် ပမာဏသည် ဒေါ်လာ ၁၅၀၀၀ ခန့်သာရှိသော်လည်း မျှော်လင့်ထားသည်ထက်ပိုမိုရရှိသောကြောင့် ပါဝင်ပေးသူအားလုံးကိုကျေးဇူးတင်ကြောင်းကိုပေါက်ကပြောသည်။
ထို့ပြင် ယင်းပန်းချီကား၏ ဘောင်ကို နွေဦးတော်လှန်ရေးတွင် ကိုယ်လက်အင်္ဂါစွန့်ခဲ့ရသည့် ရဲဘော်တစ်ဦး၏ အင်္ကျီဖြင့် ဖန်တီးပေးမည်ဟုလေလံပွဲ၌ ၎င်းကပြောသည်။
ရိုးမခေါ်သံ” Campaign ကို ရန်ကုန်၊ ပဲခူး၊ ဧရာဝတီ ဒေသများမှ တော်လှန်ရေးရဲဘော်များ၏ ဆယ်လ်မွန်စစ်ဆင်ရေးအတွက် လိုအပ်သည့်ဘတ်ဂျက်ရရှိနိုင်ရန် “ ဇွန် ၂၅ ရက်မှ ဇူလိုင် ၁၆ ရက်အထိပြုလုပ်ခဲ့ခြင်းဖြစ်သည်။
ယင်းကမ်ပိန်းတွင် ဒေါ်လာသုံးသိန်းရရှိရန် မျှော်မှန်းခဲ့ပြီး ယင်းပမာဏထက် ပိုမိုရရှိခဲ့ကြောင်း ကိုပေါက်ကပြောကြားထားသည်။
ယင်းကမ်ပိန်းမှ သိန်းတစ်သောင်းကျော်ရရှိခဲ့သော်လည်း ထောက်ပံ့ပေးရမည့် စစ်ကြောင်း နှစ်ဆယ်ကျော်ရှိသောကြောင့် ယင်းကမ်ပိန်းအတွက် လှူဒါန်းထားသည့် ဦးမင်းကိုနိုင်၏ ပန်းချီကားကို လေလံဈေး ဒေါ်လာ ၃၀၀၀ ဖြင့် ဇူလိုင် ၁၈ ရက်တွင် ဈေးစတင်ဖွင့်ခဲ့ခြင်းဖြစ်သည်။
