နေအိမ် ၉လုံး မီးရှို့ဖျက်ဆီးသွား
စစ်ကိုင်းတိုင်း၊ ပုလဲမြို့နယ်ရှိ တနယ်ကျေးရွာကို စစ်ကောင်စီတပ် ဝင်ရောက်စီးနင်းပြီး ပြည်သူ့ကာကွယ်ရေးအဖွဲ့ခေါင်းဆောင်တစ်ဦးပစ်သတ်ကာ နေအိမ် ၉လုံး မီးရှို့ဖျက်ဆီးသွားကြောင်း ဒေသခံများက ပြောသည်။
ဩဂုတ် ၂ ရက်က ပုလဲမြို့နယ် အင်မထီးရွာပျူစောထီးစခန်းမှလာသော အင်အား ၁၀၀ခန့်ပါ စစ်ကောင်စီတပ်သည် နံနက် ၅နာရီခန့်တွင် တနယ်ကျေးရွာအား စီးနင်းဝင်ရောက်ခဲ့သည်။
ထိုအချိန် ရွာပြင်၌ ကင်းစောင့်နေသော ပကဖခေါင်းဆောင်တစ်ဦး ဖမ်းဆီးသတ်ဖြတ်ခံခဲ့ရကြောင်း ဒေသတွင်းသတင်းရင်းမြစ်များက ပြောသည်။ ထို့အပြင် စစ်ကောင်စီတပ်က PDFရဲဘော်များ၏ ဆိုင်ကယ် ၁၂စီးကိုလည်း မီးရှို့ဖျက်ဆီးသွားကြောင်း ဒေသခံများက ပြောသည်။
“ဇီဖြုကုန်း ရိက္ခာလိုတော့ တခြားရွာတွေ့ကို စစ်ကြောင်းထိုးပြီး အစာရှာထွက်တာ။”ဟု ဒေသခံတစ်ဦးက ပြောသည်။
Public Service Announcement
အဆိုပါ စစ်ကြောင်းကြောင့် ကျေးရွာ၂၀ ခန့်မှ ဒေသခံပြည်သူများ ထွက်ပြေးတိမ်းရှောင်နေရပြီး နေထိုင်စားသောက်ရေးများအတွက် ဒေသတွင်း ပအဖ၊ ပကဖများ၊ အရပ်ဖက်အဖွဲ့အစည်းများက တာဝန်ယူပေးနေရသည်။
ပြီးခဲ့သည့် ဇွန်လ ၂၇ ရက်ကလည်း ပုလဲမြို့နယ်၊ ညောင်ကုန်းရွာတွင် စစ်တပ်က တိုက်လေယာဉ်ဖြင့် ဗုံးကြဲတိုက်ခိုက်မှုကြောင့် သံဃာတော် တစ်ပါးနှင့် ဒေသခံပြည်သူ ၁၀ဦးထက်မနည်း အသက်ဆုံးရှုံးခဲ့ရပြီး အများအပြား ဒဏ်ရာရရှိခဲ့ကာ ဘုန်းကြီးကျောင်း၊ စာသင်ကျောင်းနှင့် အဆောက်အဦးများ ပျက်စီးခဲ့သည်။
