လွိုင်ကော် – မိုးဗြဲလမ်းမကြီးတွင် တိုက်ပွဲပြန်ဖြစ်နေပြီး ပိုမိုပြင်းထန်လာနိုင်ကြောင်း ကရင်နီအမျိုးသား များကာကွယ်ရေးတပ်(KNDF)တပ်ရင်း(၂)က ထုတ်ပြန်သည်။
လွိုင်ကော် – မိုးဗြဲလမ်းမကြီးရှိ ကျေးရွာအချို့တွင် စစ်ကောင်စီတပ်များက ဩဂုတ် ၄ ရက်တွင် လှုပ်ရှားမှုများရှိခဲ့ပြီးနောက် ယမန်နေ့(သြဂုတ် ၆ ရက်)တွင် ထိတွေ့မှုရှိခဲ့ကြောင်း အသိပေးသည်။
“မနေ့က ညနေ ၆ နာရီပိုင်းကစပြီး တိုက်ပွဲ ဖြစ်တာပေါ့။ထိတွေ့မှုက တစ်နာရီလောက်တော့ ကြာတယ်”ဟု ကရင်နီပူးပေါင်းတပ်ဖွဲ့ဝင်တစ်ဦးက ပြောသည်။
တိုက်ပွဲမှာ ပြင်းထန်လာနိုင်သည်ဖြစ်၍ ပြည်သူများ စစ်ရေးသတိပြု၍ သွားလာပေးရန်လည်း KNDFက တိုက်တွန်းသည်။
Public Service Announcement
ဇူလိုင် ၂၀ရက် မှစတင်ခဲ့သည့် လွိုင်ကော်-မိုးဗြဲ လမ်းမကြီးတိုက်ပွဲမှာ ဇူလိုင် ၂၅ ရက်အထိ ပထမတစ်ကြိမ် ဖြစ်ပွားခဲ့သည်။
အဆိုပါ တိုက်ပွဲများအတွင်း စစ်ကောင်စီတပ်သား၂၀ ဦးသေဆုံးပြီး ကရင်နီပူးပေါင်းတပ်က လက်နက် ရှစ်လက်ရရှိခဲ့သည်။
ရှမ်းပြည်အခြေစိုက်တပ်များကို ကရင်နီဒေသ သို့ အင်အားဖြည့်တင်းရာတွင် မိုးဗြဲ -လွိုင်ကော်လမ်း ပိုင်းမှာ စစ်ကောင်စီ၏ အဓိက ထောက်ပို့လမ်း ကြောင်း ဖြစ်နေသည်။
အဆိုပါလမ်းပိုင်းကို အပြည့်အဝ ထိန်းချုပ်နိုင်ရန် အတွက် စစ်ကောင်စီက ကြိုးပမ်းနေခြင်းလည်း ဖြစ်သည်။
ထို့အတူ ကရင်နီဒေသတွင်း တိုက်ပွဲများ၌ အထိနာနေသည့် စစ်ကောင်စီက ဇွန်လ ဒုတိယပတ်ကစ၍ ထောင်နှင့်ချီသော ၎င်းတို့တပ်သားများကို ဝေဟင်၊မြေပြင်မှတဆင့် အင်အားဖြည့်တင်းလျက်ရှိသည်။
