စစ်ကိုင်းတိုင်း ပုလဲမြို့နယ်တွင် ယနေ့ နံနက်ပိုင်းကဖြစ်ပွားသည့် တိုက်ပွဲအတွင်း ပိတ်မိနေသည့် စစ်ကောင်စီစစ်ကြောင်းကို ကယ်ထုတ်နိုင်ရေးအတွက် လေကြောင်းအသုံးပြုတိုက်ခိုက်ခဲ့ရသည်။
ပုလဲမြို့နယ် ကျေးနင်းကြီးရွာအနီးတွင် စစ်ကောင်စီတပ်စစ်ကြောင်းကို ဒေသတွင်းရှိ ပြည်သူ့ကာကွယ်ရေးမဟာမိတ်တပ်ဖွဲ့များက ယနေ့(ဩဂုတ် ၇ရက်) နံနက် ၁၀နာရီခွဲခန့်တွင် ပိတ်ဆို့တိုက်ခိုက်ခဲ့ရာ စစ်ကောင်စီက လေကြောင်းအသုံးပြု တုံ့ပြန်ခဲ့ခြင်း ဖြစ်သည်။
“ပုလဲနယ်ရောက်နေတဲ့ စစ်ကြောင်းက မုံရွာ(နမခ)ကို ပြန်ဆုတ်ဖို့ ဇီးဖြူကုန်းရွာကို ရောက်လာတယ်။ အဲ့ဒါကို အဖွဲ့ပေါင်းစုံက ပိတ်ထားတော့ လေကြောင်းပစ်ကူခေါ်တာ။ စက်သေနတ်နဲ့ ပတ်ပစ်သွားတာ”ဟု ပုလဲမြို့နယ်ပြည်သူ့အုပ်ချုပ်ရေးအဖွဲ့ခေါင်းဆောင် ဦးဇော်ထက်ကပြောသည်။
မြေပြင်တိုက်ပွဲသည် ၄၅မိနစ်ခန့်ကြာခဲ့ပြီး စစ်ကောင်စီဘက်မှထိခိုက်မှုကို မသိရသေးသလို လေကြောင်းတိုက်ခိုက်မှုကြောင့် ထိခိုက်မှုမရှိခဲ့ကြောင်းလည်း ဦးဇော်ထက်က ပြောသည်။
Public Service Announcement
စစ်ကောင်စီစစ်ကြောင်းသည် ယနေ့ညနေတွင် ကျေးနင်းကြကျေးရွာသို့ ဝင်ရောက်နေကြောင်း သတင်းရရှိသည်။ ထို့အပြင် ကျေးရွာအတွင်းမှ နေအိမ်များ မီးရှို့ဖျက်ဆီးနေပြီး သေနတ်ဖြင့် ရမ်းသမ်းပစ်ခတ်နေ၍ ပြည်သူများ သတိပြုကြရန် ပြည်ထောင်စုလွတ်မြောက်ရေးတပ်ဦး(ULF)က ထုတ်ပြန်ထားသည်။
