ပဲခူးရိုးမအစပ်သို့ စစ်ကြောင်းထိုးလာသည့် စစ်ကောင်စီတပ် မိုင်းဆွဲတိုက်ခိုက်ခံရ

ရန်သူ့ဘက်မှ နှစ်ဦးသေဟု MRF- နတ္တလင်း ပြော

ပဲခူးတိုင်းအနောက်ခြမ်း၊ နတ္တလင်းမြို့နယ်အတွင်း စစ်ကြောင်းထိုးနေသည့် စစ်ကောင်စီတပ်အား မိုင်းဆွဲတိုက်ခိုက်ခဲ့ကြောင်း သာယာဝတီခရိုင် PDF တပ်ရင်း (၃၈၀၁)၊ တပ်ခွဲ(၄) MRF-Nattlin မှ တာဝန်ရှိသူတစ်ဦးက ပြောသည်။

နတ္တလင်းမြို့နယ် ပဲခူးရိုးမအစပ်ရှိ ကြက်မနက်ကျေးရွာအနောက်ကုန်းဘက်မှ ပျဥ်းမခေါင် ကျေးရွာမြောက်ဘက်သို့ ဇူလိုင် ၄ ရက် နေ့လယ် ၁ နာရီခန့်က အင်အား(၃၀)ကျော်ဖြင့် စစ်ကြောင်းထိုးလာသော စစ်ကောင်စီတပ်ကို ကြားဖြတ်မိုင်းဆွဲတိုက်ခိုက်ခဲ့ခြင်း ဖြစ်သည်။

တိုက်ခိုက်မှုကြောင့် စစ်ကောင်စီတပ်မှ နှစ်ဦးထက်မနည်းသေဆုံးကာ ထိခိုက်ဒဏ်ရာရသူများလည်းရှိသည်ဟု ဆိုသည်။ ထို့အပြင် လက်နက်ကြီး၊ လက်နက်ငယ်များဖြင့် ပြန်လည်ပစ်ခတ်ခဲ့သော်လည်း ရဲဘော်များအထိအခိုက်မရှိ ဆုတ်ခွာနိုင်ခဲ့ကြောင်း MRF-Nattin က အသိပေးသည်။

“(စစ်ကောင်စီတပ်များ)ရှိသေးတယ်ဗျ။ နှစ်ကြောင်းထိုးတာ တစ်ကြောင်းကတော့ ပြန်ဆုတ်သွားတယ်။ တစ်ကြောင်းကျန်သေးတယ်။ ပဲခူးရိုးမထဲမှာ ရှိနေပါတယ်”ဟု တိုက်ခိုက်မှုအပြီး စစ်ကောင်စီတပ်စစ်ကြောင်းအခြေအနေအား MRF-Nattlin မှ တာဝန်ရှိသူတစ်ဦးက People’s Spring သို့ ပြောသည်။

Public Service Announcement

မိုင်းဆွဲတိုက်ခိုက်ခံရသော အင်အား(၃၀)ကျော်ပါစစ်ကြောင်းသည် တိုက်ခိုက်ခံရမှုအပြီး နောက်ပြန်ဆုတ်သွားသော်လည်း အင်အား(၅၀)ဝန်းကျင်ပါ အခြားစစ်​ကောင်စီတပ် စစ်ကြောင်းတစ်ခုမှာ ရိုးမအစပ်၌ ဆက်ရှိနေ၍ ထိတွေ့မှုအချိန်မရွေးဖြစ်လာနိုင်ကြောင်း ၎င်းက ဆက်ပြောသည်။

ထို့ကြောင့် စစ်ကောင်စီတပ် ခြေကုပ်ယူထားသည့်နေရာများ၊ စစ်ကြောင်းထိုးနေသည့် လမ်းပိုင်းများအပါ အဝင် ရန်သူရှိနေသည့်နေရာများကို အချိန်မရွေးတိုက်ခိုက်သွားမည်ဖြစ်၍ ပြည်သူ များ ၎င်းတို့နှင့် ပူးပေါင်းဆောင်ရွက်ခြင်း၊ အနီးဝန်းကျင်၌ သွားလာနေထိုင်ခြင်းများ မပြုကြရန် MRF-Nattlin က အသိပေးထားသည်။