ရွှေဘိုမြို့အဝင်၌ ရိက္ခာတင်ယာဥ်နှင့် စစ်ကောင်စီတပ်သားများ တိုက်ခိုက်ခံရ

စစ်ကိုင်းတိုင်း၊ ရွှေဘိုမြို့အဝင်၌ ရိက္ခာတင်ယာဥ်နှင့် စစ်ကောင်စီတပ်သားများအား တိုက်ခိုက်ရာ ထိခိုက်သေဆုံးမှုရှိကြောင်း BLACK WOLF – ARMY၏ သတင်းနှင့် ပြန်ကြားရေးတာဝန်ခံက ပြောသည်။

သြဂုတ် ၁၅ ရက် ညနေ ၃နာရီဝန်းကျင်က ရွှေဘိုမြို့ တထပ (၂)မှလာသည့် စစ်ကောင်စီ၏ ရိက္ခာတင်ယာဥ်အား မိုင်းဆွဲတိုက်ခိုက်ခဲ့ကြောင်း BLACK WOLF – ARMY၏ သတင်းနှင့် ပြန်ကြားရေးတာဝန်ခံက ပြောသည်။

တိုက်ခိုက်မှုကြောင့် စစ်သား သုံးဦးသေဆုံးကြောင်း အတည်ပြုနိုင်ပြီး ကျန်ဒဏ်ရာရသူများအား နာရေးကားဖြင့် လာရောက်တင်ဆောင်သွားကြောင်း အထက်ပါတာဝန်ခံက ဆိုသည်။

Public Service Announcement

“အင်အား ၅၀ လောက်ပါတယ်။ ပါရိက္ခာပို့မယ့်ကားပါ။”ဟု အထက်ပါတာဝန်ခံက ပြောသည်။

အလားတူ ယင်းနေ့ညနေ ၃ နာရီခွဲခန့်က ရွှေဘိုမြို့အဝင် မုခ်ဦးအနီးတွင် တပ်စွဲထားသောအင်အား ၅၀ ဦးပါ စစ်ကောင်စီတပ်သားများအား တိုက်ခိုက်ရာ တစ်ဦးသေဆုံးသည်ကို မျက်မြင်အတည်ပြုနိုင်ကြောင်း BLACK WOLF – ARMY၏ သတင်းနှင့် ပြန်ကြားရေးတာဝန်ခံက ပြောသည်။

ထို့နောက် ဒရုန်းဖြင့် ဗုံးချ၍ နောက်တစ်ကြိမ် ထပ်မံတိုက်ခိုက်ခဲ့သည်ဟု ဆိုသည်။

စစ်ဆင်ရေးများကို BLACK WOLF – ARMY နှင့် Who am i – Army ၊ Forest Fighter တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။

တော်လှန်ရေးအင်အားစုများသည် ပြီးခဲ့သည့် သြဂုတ် ၄ ရက်ကလည်း ရွှေဘိုကျားကြီး ၊ ရွှေဘိုမင်း ၊ တိုက်နယ်ပကဖ(၆) တို့နှင့်အတူရွှေဘိုမြို့နယ်၊ ကော့ရွာ (ပျူရွာ) အား လက်နက်ကြီး သုံးလုံးပစ်ခတ်ကာ ဒရုန်းဖြင့် တစ်ကြိမ်ဗုံးချတိုက်ခိုက်ခဲ့သေးသည်။

မြို့အထွက်ဂိတ်အပါအဝင် ရွှေဘိုမြို့ရှိ စစ်ကောင်စီ စစ်ဆေးဂိတ်များမှာ ပြည်သူများအားစစ်ဆေး ငွေတောင်းခံမှုများ ပြုလုပ်နေပြီး မော်တော်ကားနှင့်ဆိုင်ကယ်များအား မတရားဖမ်းဆီး သိမ်းဆည်းနေကြောင်း ဒေသခံများက ပြောသည်။