လတ်ခတ်တောင် စစ်ကောင်စီတိုက်လေယာဉ်ဖြင့်ဗုံးကြဲရာ ဘာသာရေးအဆောက်အဦးများ ထိခိုက်ပျက်စီး

KNLA ပူးပေါင်းတပ်က စနိုက်ပါဖြင့် ပစ်ခတ်၍ စစ်ကောင်စီတပ် သေဆုံးမှုရှိ

ကရင်ပြည်နယ် မြ၀တီမြို့နယ် လက်ခတ်တောင် ကို စစ်ကောင်စီတပ်က တိုက်လေယာဉ်ဖြင့် ဗုံးကြဲတိုက်ခိုက်ခဲ့ရာ ဘာသာရေးအဆောက်အဦးများ ထိခိုက်ပျက်စီးခဲ့ကြောင်း ကရင်အမျိုးသားလွတ်မြောက်ရေးတပ်မတော်(KNLA)၏ ကော်ဘရာစစ်ကြောင်းက သတင်းထုတ်ပြန်သည်။

တော်လှန်ရေးပူးပေါင်းတပ်များ တိုက်ခိုက်သိမ်းပိုက်ထားသည့် လက်ခတ်တောင်ကို စစ်ကောင်စီက အကြိမ်ကြိမ်ထိုးစစ်ဆင်ခဲ့သော်လည်း အောင်မြင်မှုမရှိဘဲ အထိနာခဲ့ရာ ယနေ့တွင်လည်း ထပ်မံ၍ လေကြောင်း တိုက်ခိုက်လာခြင်းဖြစ်သည်ဟုဆိုသည်။

“သူတို့ လေယာဉ်ပစ်ပြီးတော့ သူတို့ လူတွေကိုတက်ဖို့အစီအစဉ်ရှိမယ်နဲ့ တူတယ်။ ဒါပေမဲ့

တိုက်ပွဲတော့မဖြစ်ဘူး။ လက်နက်ကြီးလည်း ပစ်တယ်။သူတို့ လေယာဉ်ပစ်ပြီးတာနဲ့ သူတို့လူက အားရဝမ်းသာနဲ့ ခုန်ထပြီး လက်ခုပ်တီးတာ စနိုက်ဘာနဲ့ ပစ်လိုက်တယ်။ သေတာ၊မသေတာတော့ မပြောတက်ဘူး။ အဲဒါပြီးတာနဲ့ လက်နက်ကြီးပစ်တာပဲ”ဟု KNU သတင်းရင်းမြစ်က ပြောသည်။

Public Service Announcement

ထိုသို့ လေကြောင်း တိုက်ခိုက်မှုကြောင့် ဘာသာရေးအဆောက်အဦး ထိခိုက်ပျက်စီးမှု ရှိသော်လည်း လူထိခိုက်မှုမရှိဟု ပြောသည်။

စစ်ကောင်စီ၏ လေယာဉ်ဗုံးကြဲမှုများကြောင့် သာသနာပိုင်အဆောက်အဦးများ ပျက်စီးခဲ့ကြောင်း ကော်ဘရာ စစ်ကြောင်းက ထုတ်ပြန်သည်။

ယနေ့ (ဩဂုတ် ၁၈ရက်) နေ့လယ် ၂နာရီခန့်တွင် စစ်ကောင်စီ၏ နေပြည်တော်လေတပ်မှ Yak-130 (Jet-Fighter) လေယာဉ် နှစ်စီးဖြင့် သုံးကြိမ်တိုင်တိုင် ဗုံးကြဲတိုက်ခိုက်လာရာ သာသနာပိုင် အဆောက်အဦးအများအပြား ထိခိုက်ပျက်စီးခဲ့ရကြောင်း ဓာတ်ပုံမှတ်တမ်းနှင့်အတူ ကော်ဘရာ စစ်ကြောင်းက ထုတ်ပြန်သည်။

ထို့နောက် ပူးပေါင်းတပ်က လက်ဖြောင့်တပ်သား စနိုက်ပါဖြင့် ပစ်ခတ်ခြင်းကြောင့် ရန်သူတစ်ဦး သေဆုံးခဲ့သည်ဟု ဖော်ပြထားသည်။

လက်ခတ်တောင်စခန်းကို တော်လှန်ရေးပူးပေါင်းတပ်က ဇူလိုင် ၂၁ရက်တွင် သိမ်းပိုက်ခဲ့သည်။

စစ်ကောင်စီက ယင်းနေရာကို ပြန်ယူရန် ၁၁ကြိမ်ထက်မနည်း ထိုးစစ်ဆင်ခဲ့သော်လည်း လက်ခတ်တောင်ခြေပင် မကပ်နိုင်ဘဲ စစ်ကောင်စီတပ် သေဆုံးထိခိုက်များပြားစွာဖြင့် တပ်ပြန်ဆုတ်သွားကြောင်း ကော်ဘရာ စစ်ကြောင်းက ထုတ်ပြန်ထားသည်။ စစ်ကောင်စီတပ်၏ လက်နက်ခဲယမ်းများစွာ ရရှိခဲ့ကြောင်းလည်း အသိပေးထားသည်။ တိုက်ပွဲအတွင်း တော်လှန်ရေးရဲဘော်အချို့ကျဆုံးထိခိုက်မှုရှိခဲ့သည်။