မကွေးတိုင်း၊ ပခုက္ကူမြို့စက်မှုဇုန် စစ်ဆေးရေးဂိတ်ရှိ စစ်ကောင်စီတပ်အား တိုက်ခိုက်ရာ ဗိုလ်တစ်ဦးအပါအဝင် သုံးဦးသေဆုံးကြောင်း Southern YSO PDF၏ တာဝန်ခံ ကိုအောင်မောင်းက ပြောသည်။
ယမန်နေ့(သြဂုတ် ၁၈ ရက်) နေ့လယ် ၃နာရီခန့်က ပခုက္ကူစက်မှုဇုန် (၆)လမ်းထိပ်ရှိ စစ်ကောင်စီစစ်ဆေးရေးဂိတ်ကို PDF လေးဖွဲ့ပူးပေါင်းပြီး ပြောက်ကျားနည်းဖြင့် အလစ်ဝင်ရောက်ပစ်ခတ်ခဲ့ခြင်းဖြစ်သည်။
ဂိတ်အနီးစောင့်နေသော စစ်သား နှစ်ဦးအား ပစ်ခတ်နိုင်ခဲ့ကြောင်း၊ ထို့နောက် ပထမလိုင်းရှိရဲဘော်များ ကျည်ကုန်သည်အထိ ပစ်ခတ်ပြီး ပြန်ဆုတ်လာချိန် ဒုတိယလိုင်းရှိ ရဲဘော်များက စစ်ဆေးရေးဂိတ်ကို ထပ်မံပစ်ခတ်တိုက်ခိုက်ခဲ့ကြောင်း ကိုအောင်မောင်းက ပြောသည်။
စစ်ဆင်ရေး၌ ဘန်ကာအနီးထိုင်နေသော ဗိုလ်တစ်ဦးထိမှန်ကာ ပခုက္ကူမြို့သပြေညိုဆေးရုံသို့ တက်ရောက်ကုသပြီးနောက် ညအချိန်တွင် သေဆုံးသွားသည်ဟု သတင်းရကြောင်း ၎င်းကဆိုသည်။
Public Service Announcement
“ သူ(နှစ်ပွင့်ဗိုလ်)က အဲဒီဂိတ်မှာဆရာကြီး ဖိုက်တာလုပ်နေတာ။ အဲဒီကောင်က ဘယ်လောက်ဆိုးသလဲဆို အဲဒီဂိတ်မှာထိုင်နေသမျှကာလတလျှောက် ပခုက္ကူမှာ တိုက်ဆောက်ဖို့တောင်ပြင်နေပြီ။” ဟု ကိုအောင်မောင်းက ပြောသည်။
ထို့အပြင် ဂိတ်ရှိ ပျူစောထီးတစ်ဦးလည်း ထိခိုက်ဒဏ်ရာရရှိသည်ဟု ဆိုသည်။ သို့သော် စစ်ကောင်စီတပ်သားများ ထိခိုက်သေဆုံးမှုများအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
“ စက်မှုဇုန်ဘက် ပွဲကသွားတယ်လို့ကြားတယ်။” ဟု ပခုက္ကူမြို့ပေါ်နေထိုင်သူတစ်ဦးက ပြောသည်။
စစ်ဆင်ရေးကို Southern YSO PDF၊ဒေါင်းစစ်သည်၊ ဒေါင်းညီနောင်၊ Yesagyo Revolution Force (YRG)တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
အဆိုပါဂိတ်သည် ပြည်သူများတင်ဆောင်လာသော ကုန်ပစ္စည်းများအား အဓမ္မသိမ်းခြင်း၊ အမျိုးသမီးများအား ထိကပါးရိကပါးပြုလုပ်ခြင်း၊ ပြည်သူများအား စစ်ဆေး ငွေတောင်းခံခြင်းများ ပြုလုပ်နေသော ဂိတ်ဖြစ်ကြောင်း Southern YSO PDF အဖွဲ့က ပြောသည်။
ထို့အပြင် ယမန်နေ့ည ၉ နာရီ ၄၅မိနစ်ခန့်ကလည်း ရေစကြိုမြို့နယ်၊ပခုက္ကူ – မန္တလေး လမ်းမပေါ်၊ ကျောက်လှေခါး ကျေးရွာရှိ စစ်ဆေးရေးဂိတ်ကိုလက်နက်ငယ်ပေါင်းစုံဖြင့် တိုက်ခိုက်ခဲ့ကြောင်း Southern YSO PDF အဖွဲ့က ထပ်မံထုတ်ပြန်သည်။
စစ်ဆင်ရေးကိုမူSouthern YSO PDF၊ Yesagyo Revolution Group(YRG)၊ဒေါင်းညီနောင်၊ Shwe Nyar Myae People Defense Force အဖွဲ့တို့ ပူးပေါင်းဆောင်ရွက်ခဲ့ကြောင်း အသိပေးထားသည်။
ပခုက္ကူမြို့နယ်သည် စစ်ကောင်စီအား ခုခံတော်လှန်မှု အားကောင်းရာဒေသတစ်ခုဖြစ်ပြီး ၎င်းတို့အား လာရောက်တိုက်ခိုက်မည်စိုး၍ အမျိုးသားနှစ်ဦး ဆိုင်ကယ်အတူမစီးရဟုပင် တားမြစ်ထားသည်။
