စစ်ကောင်စီတပ်အနေဖြင့် တိုက်ပွဲများ၌ ထိခိုက်သေဆုံးမှုများပြားနေရုံသာမက ထွက်ပြေးမှုများလည်းရှိရာ ပြီးခဲ့သည့် ၅လအတွင်း ဗိုလ်မှူး အဆင့် အရာရှိ အပါအဝင် စစ်ကောင်စီတပ်သား ၅၀၀ ဦးကျော် စစ်ကောင်စီကို စွန့်ခွာထွက်ပြေးလာသည်ဟု အမျိုးသားညီညွတ်ရေးအစိုးရ (NUG) ပြည်ထောင်စုဝန်ကြီးချုပ် မန်းဝင်းခိုင်သန်းက ယမန်နေ့က ကျင်းပသော အစိုးရ အဖွဲ့အစည်းအဝေး၌ ပြောကြားသည်။
ဘက်ပေါင်းစုံက ပြိုလဲနေသည့် စစ်ကောင်စီအနေဖြင့် လက်ရှိတွင် Non CDM ဝန်ထမ်းများကို စစ်တပ်၏ အရန်အင်အားအဖြစ် တပ်ရင်းအသွင်ဖွဲ့စည်းတာဝန်ပေးရန် ညွှန်ကြားရသည်အထိ ပြိုလဲနေပြီဖြစ်သည်ဟု ပြောသည်။
“အကြမ်းဖက် စစ်ကောင်စီလက်အောက်မှာ ဆက်လက် တာဝန် မထမ်းဆောင်လိုတော့လို့ ထွက်ပြေးလာကြတဲ့ တပ်မတော်သား တွေလည်း ဩဂုတ်တစ်လတည်းမှာကို ၅၀ ကျော်ရှိပြီး ဧပြီလကနေ ဇူလိုင်လအထိ ၄ လ အတွင်းမှာဆိုရင် စာရင်းအရ ဒုရင်းမှူးအဆင့် ဗိုလ်မှူးတစ်ဦးအပါအဝင် ခန့်မှန်း ၅၀၀ နီးပါးရှိတယ်လို့ သိရပါတယ်။ ဒါဟာ ကျွန်တော်တို့ကို ချိတ်ဆက်လာတဲ့ အရေအတွက်ပဲ ဖြစ်ပြီး မချိတ်လာကြသေးတာလည်း ရှိနေနိုင်တာ ဖြစ်ပါတယ်”ဟု ပြည်ထောင်စုဝန်ကြီးချုပ်က ပြောသည်။
အသိပေးလိုသည်မှာ နွေဦးတော်လှန်ရေးသည် ပြည်သူ့အင်အားနှင့် ရုန်းကန်တိုက်ပွဲဝင်လာခဲ့ရာ လက်ရှိတွင် အောင်မြင်မှု ပန်းတိုင်နီးနေပြီဟု ဝန်ကြီးချုပ်က ပြောသည်။
Public Service Announcement
အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန ပြောရေးဆိုခွင့်ရှိသူ ဦးမောင်မောင်ဆွေကလည်း စစ်ကောင်စီတပ်အနေဖြင့် အင်အားပြုန်းတီးမှု အလွန်များပြားနေကြောင်း၊ တိုက်ပွဲ၌ သေဆုံးဒဏ်ရာရသူများပြားသကဲ့သို့ ထွက်ပြေးသူများလည်း များပြားကြောင်း ပြောကြားထားသည်။
ကရင်အမျိုးသားအစည်းအရုံး(KNU) ပြောရေးဆိုခွင့်ရှိသူ ပဒိုစောတောနီးကလည်း စစ်ကောင်စီတပ်သားများ အနေဖြင့်လက်ရှိ အချိန်ထိ ပြည်သူလူထု ဘက်သို့ ပူးပေါင်းလာနိုင်ကြောင်း အသိပေးထားသည်။ သို့ရာတွင် အချိန်များစွာ မရှိတော့ဟုလည်း သတိပေးသည်။
