မကွေးတိုင်း၊ နတ်မောက်မြို့ရှိ စစ်ကောင်စီတပ် ၏ မြို့အဝင်စစ်ဆေးရေးဂိတ်ကို ဗုံးပစ်တိုက်ခိုက်ခဲ့ကြောင်း အဖိနှိပ်ခံပြည်သူ့တော်လှန်ရေးအင်အားစု (OPRF – PLA)မှ တာဝန်ရှိသူတစ်ဦးက ပြောသည်။
ယမန်နေ့(သြဂုတ် ၂၂)ညနေ ၅နာရီခွဲခန့်က နတ်မောက်မြို့မြောက်ဘက် မြို့အဝင်စစ်ဆေးရေးဂိတ် လုံခြုံရေးဘန်ကာအတွင်းသို့ စက်ရုံထုတ်(လျက်ဆားပုလင်း)လက်ပစ်ဗုံးတစ်လုံး အနီးကပ်ပစ်ခတ်၍ ဖောက်ခွဲတိုက်ခိုက်ခဲ့သည်ဟု ဆိုသည်။
“အနီးကပ်ပါပဲ ပစ်သွင်းနိုင်ခဲ့တာက၊ ဘန်ကာအနီး ရထားလမ်းနားအထိကပ်ပြီး ပစ်ခဲ့တာပါ။ ဘန်ကာကိုထိမှန် ပြုတ်ကျပြီး ဘန်ကာအနီးမှာပဲ ကပ်ကွဲခဲ့တာပါ”ဟု OPRF – PLA မှတာဝန်ရှိသူတစ်ဦးက People’s Spring သို့ ပြောသည်။
ဗုံးပစ်တိုက်ခိုက်ချိန်တွင် ဘန်ကာအတွင်း စစ်ကောင်စီတပ်သားတစ်ဦးရှိနေပြီး ဘန်ကာနောက်ဘက်တွင် စစ်ကောင်စီရပ်ကျေးအုပ်ချုပ်ရေးမှူးအချို့နှင့် စစ်ကောင်စီတပ်သားများရှိရာ ထိခိုက်သေဆုံးမှုရှိနိုင်ကြောင်း ၎င်းက ဆက်ပြောသည်။
Public Service Announcement
“အတည်ပြုဖို့ကတော့ ကျွန်တော် ကိုယ်တိုင်တော့ မကြည့်ရဘူးပေါ့နော်၊ တခုကြားရတယ်။ မနက်ပိုင်းကပေါ့ ဆေးရုံမှာ ဆေးကုသမှုခံယူနေတဲ့ စကစ တပ်သားရှိနေတာတော့ သေချာတယ်။ နောက်ဆက်တွဲတော့ ဆက်မသိရသေးဘူးဗျ”ဟု OPRF – PLA မှတာဝန်ရှိသူတစ်ဦးက ဆိုသည်။
နတ်မောက်မြို့အဝင် စစ်ကောင်စီစစ်ဆေးရေးဂိတ်တိုက်ခိုက်မှုတွင် ဝင်ရောက်ပစ်ခတ်ဖောက်ခွဲခဲ့သည့် ရဲဘော် AZY နှင့် ရဲဘော်ကျော်ကြီးတို့ အထိအခိုက်မရှိ ပြန်လည်ဆုတ်ခွာလာနိုင်ခဲ့ကြောင်း အဖိနှိပ်ခံပြည်သူ့တော်လှန်ရေးအင်အားစု(OPRF – PLA)က အသိပေးထားသည်။
