ဆားလင်းကြီးတွင် နေအိမ်မီးရှို့ဖျက်ဆီးခံရသည့် အိမ်ထောင်စု ၁၀၀ ကျော်အတွက် စောင်နှင့်ခေါင်းအုံးများ လှူဒါန်း

ချင်းတွင်းမောင်/People’s Spring

စစ်ကိုင်းတိုင်း၊ ဆားလင်းကြီးမြို့နယ်တွင် စစ်ကောင်စီတပ်က နေအိမ်များမီးရှို့ဖျက်ဆီးခဲ့သည့် အိမ်ထောင်စု ၁၀၀ကျော်အတွက် စောင်နှင့်ခေါင်းအုံးများ လှူဒါန်းခဲ့ကြောင်း ချင်းတွင်းမြစ်ကမ်းဘေးကျေးရွာများ သပိတ်ကော်မတီက ပြောသည်။

ချင်းတွင်းမြစ်ကမ်းဘေးသပိတ်စစ်ကြောင်းမှ ညောင်ပင်ကြီးတဝိုက်ရှိ မီးဘေးသင့် အိမ်ထောင်စုများအား လှူဒါန်းမှုပြုလုပ်ခဲ့ရာ ယခုရက်ပိုင်းအတွင်း ဆားလင်းကြီးမြို့နယ် ကျေးရွာများရှိ မီးဘေးသင့်အိမ်ထောင်စု ၁၀၀ကျော်အတွက် စောင်တစ်ထည် ၊ ခေါင်အုံး နှစ်လုံးစီ လှူဒါန်းခဲ့ကြောင်း ချင်းတွင်းမြစ်ကမ်းဘေးကျေးရွာများ သပိတ်ကော်မတီမှ ကိုအောင်ခန့်ဇော်က ပြောသည်။

ပြီးခဲ့သည့် ဇွန်လ ၉ ရက်က ဆားလင်းကြီးမြို့နယ်၊ ညောင်ပင်ကြီးကျေးရွာရဲစခန်းကို ဒေသတွင်းတော်လှန်ရေးအင်အားစုများက ဝင်ရောက်တိုက်ခိုက်ခဲ့ပြီး ညောင်ပင်ကြီးကျေးရွာ အနီးရှိ ကျေးရွာအများအပြားမှ ဒေသခံပြည်သူများ ထွက်ပြေးတိမ်းရှောင်ခဲ့ရသည်။

Public Service Announcement

ယခုအခါ ၃ လကျော်ပြီဖြစ်သော်လည်း စစ်ကောင်စီတပ်က ထွက်ခွာသွားခြင်းမရှိသေး၍ တိမ်းရှောင်နေရဆဲဖြစ်ပြီး ကျေးရွာ ၆ရွာမှ ဒေသခံပြည်သူတစ်ထောင်ကျော် စားနပ်ရိက္ခာများ လိုအပ်နေကြောင်းလည်း ဒေသတွင်း စစ်ရှောင်ကူညီနေသူများက ပြောသည်။

“စုစုပေါင်းစစ်ရှောင် ထောင်ကျော်တယ်။ ပြန်လို့မရသေးတာ။ ဆန်၊ ဆီ စားသောက်ကုန်တွေရောလိုအပ်နေတယ်။”ဟု ကိုအောင်ခန့်ဇော်က ပြောသည်။

ထို့အပြင် လိုအပ်မှုများရှိနေသေး၍ ပြည်တွင်း၊ ပြည်ပအလှူရှင်များ ပူးပေါင်းပါဝင်နိုင်ကြောင်းချင်းတွင်းမြစ်ကမ်းဘေးကျေးရွာများသပိတ်ကော်မတီက အသိပေးထားသည်။

စစ်တပ်အာဏာသိမ်းပြီးနောက် ကျေးရွာများအား မီးရှို့ဖျက်ဆီးမှုများပြုလုပ်ခဲ့ရာ ၂၀၂၁ မေလ မှ ၂၀၂၃ ဇူလိုင်အထိ စစ်ကိုင်းအတွင်း အိမ်ခြေပေါင်း ၅၇,၅၀၃လုံး မီးလောင်ပျက်စီးခဲ့ကြောင်း Data For Myanmar အဖွဲ့က ထုတ်ပြန်ထားသည်။ သြဂုတ်အတွင်း၌လည်း စစ်ကောင်စီတ​ပ်က စစ်ကိုင်းတိုင်းအတွင်းရှိ ကျေးရွာအများအပြားအား မီးရှို့ဖျက်ဆီးမှုများပြုလုပ်ခဲ့သေးသည်။