စစ်ကိုင်းတိုင်း၊ ဖောင်းပြင်မြို့မှ ချင်းတွင်းမြစ်းအတွင်း စုန်ဆင်းလာသည့် စစ်ကောင်စီ၏ သစ်တင်သင်္ဘောများ သောင်တင်နေစဥ် တိုက်ခိုက်ခံရပြီး ထိခိုက်သေဆုံးမှုရှိကြောင်း ဒေသခံများက ပြောသည်။
ဖောင်းပြင်မြို့မှ ချင်းတွင်းမြစ်ကြောင်းအတိုင်း စုန်လာသည့် သစ်တင်ဖလပ်ရေယာဥ် ၇စီးအနက် တစ်စီးသည် အောက်တိုဘာ ၁၇ရက်က မော်လိုက်မြို့နယ်၊ သဝန်ရွာနှင့် မှုံကြီးကျေးရွာ ရေလက်ကြား၌ သောင်တင်ခဲ့သည်။
ကျန် ၆ စီးမှာ ဆက်လက်မစုန်ဆင်းဘဲ သဝန်၊ မှုံကြီးနှင့် တောင်ပေါက်ကျေးရွာအနီး၌ ကမ်းကပ်၍ စောင့်ဆိုင်းနေခဲ့ကြောင်း ဒေသခံများက ပြောသည်။
အောက်တိုဘာ ၂၀ရက် ညပိုင်းတွင် အဆိုပါ ရေယာဉ်ပေါ်မှ စစ်ကောင်စီတပ်သားများသည် သဝန်ကျေးရွာရောက်ရှိလာသဖြင့် ဒေသခံကာကွယ်ရေးအဖွဲ့များနှင့် ထိတွေ့ပစ်ခတ်မှု ဖြစ်ပွားပြီး စစ်ကောင်စီတပ်သား သုံးဦးသေဆုံးကြောင်း ဒေသခံတစ်ဦးက ပြောသည်။
Public Service Announcement
အောက်တိုဘာ ၂၂ ရက် နံနက်ပိုင်းတွင်လည်း တောင်ပေါက်ကျေးရွာအနီးရှိ စစ်ကောင်စီတပ်များအား ဒေသတွင်းPDFများက (၆၀) မမ၊ (၈၀) မမ၊ (၁၀၇) မမများဖြင့် ပစ်ခတ်တိုက်ခိုက်ခဲ့ရာ သစ်တင်သင်္ဘောတစ်စီး ပျက်စီးသွားကြောင်း၊ စစ်ကောင်စီတပ်သားများ ထိခိုက်သေဆုံးမှုရှိကြောင်း ဒေသတွင်းသတင်းရင်းမြစ်များက ပြောသည်။
“ပြန်တင်သွားတဲ့ အလောင်းတွေလည်းရှိတယ်။ ကျန်နေခဲ့တဲ့ အလောင်းတွေလည်း ရှိတယ်။ စစ်သားအလောင်းအကောင်ဆိုရင် သယ်တယ်။ ပျူတွေဆိုရင် မသယ်ဘူး။”ဟု မော်လိုက်ဒေသခံတစ်ဦးက ပြောသည်။
သို့သော် စစ်ကောင်စီတပ်၏ ထိခိုက်သေဆုံးမှုများအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
“မနေ့က သောင်တင်နေတဲ့ သစ်ဖလပ်ကိုပစ်ထားခဲ့ပြီး ကျန် ငါးစီးနဲ့ မီးလောင်နေတဲ့ ဖလပ်နောက်တွန်း တစ်စီး စုစုပေါင်း ခြောက်စီးဟာ မော်လိုက်မြို့ကို ရောက်တယ်။ ဒီနေ့မနက်တော့ မော်လိုက်မြို့ကနေ စုန်သွားပါပြီ။ ဒေသခံကာကွယ်ရေးအဖွဲ့များနဲ့ ပြည်သူများဘေးကင်းတယ်လို့ သိရပါတယ်။”ဟု ဒေသတွင်းPDF နှင့် နီးစပ်သည့်ဒေသခံက ပြောသည်။
ယင်းတိုက်ခိုက်မှုကို MLPDF(မော်လိုက် – ပကဖ)နှင့် ဒေသတွင်းပူးပေါင်းအဖွဲ့များက တိုက်ခိုက်ခဲ့ခြင်း ဖြစ်သည်။ မော်လိုက် (ပကဖ) ထံ ဆက်သွယ်မေးမြန်းရန် ဆက်သွယ်ရာ လက်တလောဆက်သွယ်၍ မရသေးပေ။
စစ်ကောင်စီရေယာဥ်များပေါ်၌ သစ်များအပြင် ပြည်သူများထံမှ လုယူလာသောပစ္စည်းများ၊ နွားများလည်း တင်ဆောင်သွားကြောင်း ဒေသခံများက ပြောသည်။
အဆိုပါ ရေယာဉ်အုပ်စုကြောင့် ချင်းတွင်းမြစ်ဘေးရှိ ခဝဲ၊ခါတွန်၊သဝန်၊မှုံကြီး၊ယူးဝ၊ဝါးရုံသာ၊အင်ကုန်း၊ပန်းသာ၊တပ်ကုန်းစသည့် ကျေးရွာများထွက်ပြေးတိမ်းရှောင်ခဲ့ရကြောင်း သတင်းရရှိသည်။
